Idi Septiembre 14, 2013, nagtataripnong ti agarup 10,500 para iti panagturpos ti maika-135 a klase ti Watchtower Bible School of Gilead iti educational center dagiti Saksi ni Jehova idiay Patterson, New York. Sansanayen dayta nga eskuelaan dagiti aduan kapadasanen a ministro dagiti Saksi ni Jehova tapno agbalinda pay a mas epektibo kadagiti annongenda.

Ni Guy Pierce a miembro ti Bagi a Manarawidwid dagiti Saksi ni Jehova ken tserman ti programa imbasarna ti panglukat a komentona iti Mateo 28:19, 20: “Inkayo ngarud ket mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo.”

Kinuna ni Brother Pierce a dagita a sasao ni Jesus ti nangrugian ti trabaho nga agtultuloy a maar-aramid agingga ita. Bayat a mangar-aramidtayo iti ad-adalan, isursurotayo kadagiti tattao a tungpalenda ti amin nga imbilin ni Jesus. Siempre, karaman iti dayta ti bilin nga ikasaba “daytoy naimbag a damag ti pagarian.” (Mateo 24:14) Iti kasta, tunggal baro nga adalan ket agbalin a manangaskasaba ken mannursuro iti Pagarian. Ania ti resulta dayta? “Umad-adu ti populasion [ti lubong],” kinuna ni Brother Pierce, “ngem kasta met ti ili ti Dios.”

“Nangtedda iti Nalablabes Ngem iti Pudno a Kabaelanda.” Ni Thomas Cheiky a miembro ti Branch Committee iti United States ti nagpalawag a naibasar iti 2 Corinto 8:​1-4. Nupay nakapangpanglaw dagiti kongregasion ti Macedonia idi umuna a siglo, impakpakaasida nga agdonarda para kadagiti agkasapulan a kakabsatda idiay Jerusalem. Kasta met ti kinaparabur ken sakripisio nga ipakpakita dagiti estudiante ti Gilead.

Makunatay met a naannad dagiti taga-Macedonia ta dida nangted iti aglaplapusanan nga uray la nabaybay-andan dagiti kapamilia wenno ti personal a panagdaydayawda iti Dios. Binalakadan ni Brother Cheiky dagiti estudiante a tuladenda dagiti taga-Macedonia babaen ti kanayon a panagbalinda a balanse iti panangtedda.

“Nalpasen ti Klase.” Intampok ni Samuel Herd a miembro ti Bagi a Manarawidwid no apay a masapul a laglagipen dagiti estudiante ti kapadasanda iti Gilead School. Kas iti napintas a musika a mangngeg iti agsapa nga agmalmalem a malaglagip ti maysa a tao, dagiti agkakapintas a kapadasan iti Gilead ti mangpabileg kadagiti estudiante uray no nabayag a nalpasen ti klase.

Impalagip ni Brother Herd kadagiti estudiante nga awan limitasion ti memoria ti Dios. Ninagananna ti tunggal maysa kadagiti binilion a bituen iti uniberso ken dina pulos malipatan ti maysa man kadagita. (Salmo 147:4) Lallalo a dina pulos malipatan ti panagregget dagiti estudiante iti Gilead! Nakaurnongda iti “gameng idiay langit” ket awan ti makatakaw kadagita nga agkakapateg a pakalaglagipanda nga intalimeng ni Jehova iti memoriana.​—Mateo 6:20.

Yantangay dinto malipatan ti Dios ti aramid ken ayat dagiti estudiante para kenkuana, rumbeng laeng a kanayon a laglagipen dagiti estudiante dagiti kapadasanda iti Gilead. “No dagiti agkakapintas a pakalaglagipan daytoy nga eskuelaan ti mangparagsak iti aldawyo,” kinuna ni Brother Herd, “diyo liplipatan a pagyamanan Daydiay makinggapuanan iti rag-oyo—ni Jehova. Dikay mauma a manglagip kadagiti bambanag. Sigurado a kanayonto a magunggonaankayo.”

“Maliwliwakayo iti Di Mailadawan a Pannakabalin ni Jehova.” Ti instruktor iti Gilead a ni Sam Roberson pinaregtana dagiti estudiante a no maipasangoda kadagiti baro a problema, agpannurayda iti pannakabalin ni Jehova imbes nga iti bukodda a pigsa. Kuna ti Efeso 3:20 a ti Dios kabaelanna ti “mangaramid a nawadwadwad unay a lab-awanna ti amin a bambanag a dawaten wenno panunotentayo.” Ditay pulos matukod ti pannakabalinna isu nga uray ti sasao a ‘nawadwadwad unay a lab-awanna ti amin a panunotentayo’ ket kurang a mangdeskribir iti dayta, ta kuna ti bersikulo a kabaelanna ti “nawadwadwad” ngem iti dayta.

Ituktukon ni Jehova iti tunggal Kristiano ti di mailadawan a pannakabalinna. Isu ket kas iti “maysa a nakaam-ames a mannakabalin,” wenno nabileg, iti nakaro a pakarigatan. (Jeremias 20:11) Impalagip ni Brother Roberson kadagiti estudiante a tulongan ida ni Jehova tapno mapagballigianda ti aniaman a problema wenno pakarigatanda.

“Pagtalinaedenyo ti Dignidadyo iti Panagserbiyo iti Pagarian.” Inlawlawag ni William Samuelson, a maysa pay nga instruktor iti Gilead, a nakagun-od dagiti estudiante iti dignidad iti panagserbida iti Pagarian iti dua a pamay-an. Pinaneknekanda a maikarida iti panagraem gapu iti trabahoda sakbay ken bayat ti panageskuelada, ken agtultuloy a makagun-odda iti dayaw ken panagraem babaen ti panagbalinda a pannakabagi ti kangatuan a gobierno iti uniberso—ti Pagarian ti Dios.

Kasano a mapagtalinaed dagiti estudiante ti dignidadda? Pinaregta ida ni Brother Samuelson nga ipaayda ti dayaw ken Jehova ken ipakitada ti panagraemda iti sabsabali, kas iti inaramid ni Jesus kadagiti nakalangenna uray no masapul a korehiren wenno balakadanna ida. Ania ti resultana? Kas ken apostol Pablo, manayonan dagiti estudiante ti dignidadda ken maipadayagda ti ministerioda imbes a ti bagida.​—Roma 11:13.

“Ti Autoridad Dagiti Kabalio Adda Kadagiti Ngiwatda.” Impakita ti maysa pay nga instruktor iti Gilead a ni Michael Burnett no kasano a makituntunostayo iti kaitungpalan ti Apocalipsis 9:19 kada usarentayo dagiti nasursurotayo kadagiti Nakristianuan a gimong tapno makapagsaotayo nga addaan autoridad iti panangasabatayo. Kalpasanna, nakikadua iti saritaan dagiti estudiante bayat nga iyes-estoria wenno iyak-aktoda dagiti kapadasanda iti ministerio kabayatan ti kaaddada iti Gilead. Kas pagarigan, natukay ti maysa nga estudiante ti interes ti gasoline boy babaen ti panangisaludsodna iti “Kaano a nangrugi ken nagpatingga ti naituding a pampanawen dagiti nasion?” (Lucas 21:24) Idi sinarungkaranna, natulonganna dayta a lalaki a masungbatan ti saludsod babaen iti Daniel kapitulo 4, agraman ti apendise iti libro nga Ania a Talaga ti Isursuro ti Biblia?

“Napatibker Dagiti Pusoda.” Ininterbiu ni Adrian Fernandez a miembro ti United States Branch Committee ti dua a nagturpos a pagassawaan. Insalaysay ni Brother Helge Schumi a gapu ta adda dagiti nailanad iti Biblia a dadduma nga agserserbi iti Dios a timmangsit kalpasan a nakaawatda kadagiti naisangsangayan a pribilehio, masansan a karaman iti kurso iti Gilead ti balakad maipapan iti panagtalinaed a napakumbaba. (2 Cronicas 26:16) Nalagip met ni Brother Peter Canning daytoy a nainsiriban a balakad iti maysa a lektiur iti Gilead maipapan iti panagsursuro iti lokal a lengguahe: “Dikay agpannakkel. Sisasaganakayo koma nga agbalin a nakakatkatawa iti imatang ti sabsabali.” Nagyaman ti dua a pagassawaan gapu ta ti kurso ti nangpabileg kadakuada para iti ad-adu pay a trabaho, isu a napatibker dagiti pusoda.​—Hebreo 13:9.

“Agrag-okayo Agsipud ta ti Nagnaganyo Nailanaden iti Langlangit.” (Lucas 10:20) Ni Geoffrey Jackson iti Bagi a Manarawidwid ti nangiparang iti kangrunaan a palawag. Saan a kas kadagidiay nakapageskuela idin iti Gilead, kaaduan kadagiti nagturpos ita ti saan nga umawat iti baro nga annongen wenno maaddaanto kadagiti makapagagar a kapadasan iti panangasaba kadagiti teritoria a di pay naas-asak. Kasano koma ti reaksionda?

Idi nagsubli ti 70 nga adalan nga imbaon ni Jesus a mangasaba, makaparagsak ti impadamagda nga iti nagan ni Jesus, naparuarda dagiti demonio. (Lucas 10:1, 17) Binigbig ni Jesus a talaga a makaparagsak dagita a resulta, ngem kinunana: “Nupay kasta, dikay pagrag-oan daytoy, a naipasakup kadakayo dagiti espiritu, ngem agrag-okayo agsipud ta ti nagnaganyo nailanaden iti langlangit.” (Lucas 10:20) Impakitana ngarud a saan a kanayon a maaddaanda kadagiti kasta a makaparagsak a kapadasan. Saan a dagiti resulta ti masapul nga ipangpangrunada no di ket ti kinamatalekda ken Jehova ken ti ‘pannakailanad ti naganda iti langit.’

“Agaplikar met kadatayo ita ti insuro ni Jesus kadagiti 70 nga adalan,” kinuna ni Brother Jackson. Saan koma a dagiti resulta ti kangrunaan a nakaibasaran ti rag-otayo wenno pangrukodantayo iti kinamatalektayo. Imbes ketdi, masagraptayo ti rag-otayo ken mapaneknekantayo ti kinamatalektayo no agtalinaedtayo a nasinged ken Jehova ken naregta nga agserbi kenkuana.

Uray ni Jesus ket naipasango met kadagiti makapaupay situasion. Kas pagarigan, kalpasan ti namilagruan a panangpakanna iti rinibu a tattao, rinugiandan ti sumurot kenkuana. (Juan 6:10-14, 22-24) Ngem idi agangay, adu kadakuada ti naitibkol iti pannursuro ni Jesus, isu a ti makaparagsak nga iyaadu dagiti adalan ket nagresulta iti dandani naggigiddan a panangpanawda kenkuana. (Juan 6:48-56, 60, 61, 66) Ngem naiduma dagiti matalek nga apostol ta determinadoda nga agtalinaed a kadua ni Jesus. Nagsayaat ti inyulidanda ta impangpangrunada saan laeng a dagiti resulta no di ket ti kinamatalekda ken ti relasionda ken Jehova.​—Juan 6:​67-​69.

Konklusion. Inawat dagiti estudiante ti diplomada sa binasa ti maysa kadakuada ti surat ti panagyaman ti klase. Iti konklusion ni Brother Pierce, imbagana a ti ili ti Dios, agraman dagiti nagturpos iti Gilead, ket saan met ketdi nga espesial a tattao iti lubong. (Aramid 4:13; 1 Corinto 1:27-31) Ngem akseptaren ni Jehova ti dedikasiontayo ken ipaayannatayo iti nasantuan nga espirituna. Ket nupay mabalin a saan a dayawen ni Jehova ti edukasiontayo, kinuna ni Brother Pierce, “Dayawenna ti kinasungdotayo, ti kinamatalektayo, ken ti debosiontayo kenkuana.”