Nagturpos ti maika-134 a klase ti Watchtower Bible School of Gilead idi Sabado, Marso 9, 2013, iti educational center dagiti Saksi ni Jehova idiay Patterson, New York. Ditoy nga eskuelaan a masanay dagiti nabayagen a ministro dagiti Saksi ni Jehova tapno agbalinda a mas nabunga iti ministerioda. Agdagup iti 9,912 ti amin a nakipagragsak kadagiti nagturpos nga estudiante a pakairamanan ti adu a gagayyem, kapamilia, ken dadduma a bisita.

Ni Mark Sanderson a miembro ti Bagi a Manarawidwid dagiti Saksi ni Jehova ti tserman iti programa. Impalagipna iti tallaong ti inagurasion ti Gilead School a naangay 70 a tawenen ti napalabas, idi Pebrero 1, 1943. Iti daydi nga okasion, kastoy ti imbaga ti presidente ti eskuelaan a ni Nathan Knorr a panggep ti Gilead: “Ginasut ken rinibu ti mabalin pay a mapakaammuan [iti naimbag a damag ti Pagarian ti Dios] no ad-adu pay koma ti trabahador iti talon. Babaen iti asi ti Apo, ad-adunto pay.” Umiso kadi ni Brother Knorr?

Usigem ti maysa a pagarigan. Di nagbayag kalpasan ti panangrugi ti eskuelaan, sinarungkaran ni Brother Knorr ti Mexico tapno agbirok kadagiti lugar a mabalin a pakaidestinuan dagiti misionero a nasanay iti Gilead. Bayat ti isasarungkarna, naawis a makimiting ti amin a kongregasion iti 240 a kilometro manipud iti Mexico City, ket 400 ti dimmar-ay. Ita a dandani 70 a tawenen ti napalabas sipud idi simmangpet iti Mexico dagiti kaunaan a nagturpos iti Gilead, nasurok a 200,000 la ketdi ti dumar-ay no adda manen mayawis a kasta a miting iti dayta met la lugar!

“Ania ti Adda iti Imam?” Kasta ti tema a naibasar iti Exodo 4:2 a palawag ni Anthony Griffin a miembro ti Branch Committee iti United States. Iti dayta a salaysay, insaludsod ti Dios ken Moises: “Ania dayta adda ita imam?” Insungbat ni Moises: “Maysa a sarukod.” Inusar ni Jehova ti sarukod kas simbolo ti autoridad ken annongen nga intedna ken Moises. (Exodo 4:5) Nagballigi ni Moises idi inusarna ti autoridad agpaay a pakaidayawan ti Dios, ngem napagurana ti Dios idi inusarna dayta tapno itan-ok ti bagina ken pagungtanna dagiti kakabsatna, kas iti inaramidna idiay “Meriba.”​—Numeros 20:​9-​13.

Inyarig ni Brother Griffin ti sarukod ni Moises iti pannakasanay nga inawat dagiti estudiante ti Gilead. Pinaregtana dagiti estudiante a dida usaren dayta tapno agbalinda a naturay iti sabsabali. Imbes ketdi, imbalakadna kadakuada: “Usarenyo ti naited kadakayo agpaay a pakaidayawan ken pakaitan-okan ni Jehova, ken itultuloyyo ti agbalin a bendision kadagiti pagserbianyo.”

“Laglagipenyo ti Manna.” Intampok ni Stephen Lett a miembro ti Bagi a Manarawidwid dagitoy uppat a leksion a masursurotayo iti manna a simimilagro nga inted ti Dios kadagiti Israelita iti let-ang.

• Itultuloyyo ti aggaggaget. (Numeros 11:8) Tapno mabenepisiaran dagiti Israelita iti manna, masapul nga alistuanda ti agpidut iti dayta ken isaganada dayta sakbay a kanenda.​—Exodo 16:21.

• Dikay pulos agreklamo kadagiti probision ni Jehova. (Numeros 11:​5, 6) Nagtanabutob dagiti Israelita maipapan iti manna. Imbilang ti Dios a panagreklamo dayta kontra kenkuana. Kas iti manna, ti naespirituan a taraon a maaw-awattayo ket saan a kanayon a makapagagar, ngem kanayon a makapasalun-at. Kanayon koma ngarud nga agyamantayo kadagiti amin a probision ni Jehova.

• Naan-anay nga agtalek nga ipaayannakayo ni Jehova. Inaldaw nga impaay ti Dios ti manna, agraman ti doble a kaadu dayta iti aldaw sakbay ti Sabbath. (Exodo 16:22-​26) Makapagtalektayo met nga ipaay ti Dios dagiti kasapulantayo.​—Mateo 6:​11.

• Saan a pulos a mabendisionan ti nasukir. (Exodo 16:19, 20, 25-​28) Awan ti naala dagiti Israelita a nangpadas nga agpidut iti manna no aldaw ti Sabbath. Nakaunget pay ketdi ni Jehova kadakuada. Awan met ti naganab dagidiay nagala iti ad-adu a manna para iti simmaganad nga aldaw ta inigges ken bimmangsit dayta.

Kalpasanna, binalakadan ni Brother Lett dagiti estudiante a laglagipenda dagiti nasursuroda iti manna tapno ni Jehova ‘luktanna kadakuada dagiti aribengbeng ti langlangit ket pudno a mangibukbok kadakuada iti bendision agingga nga awanen panagkasapulan.’​—Malakias 3:​10.

“Agsaganakayo Para iti Biag Idiay Baro a Lubong.” Inlawlawag ni William Samuelson a manangaywan iti Theocratic Schools Department a nupay magagarantayo iti biag iti baro a lubong, napatpateg ti panagbalin a nakasagana. Masapul a ‘nasimbeng koma ti panagpampanunottayo.’​—1 Pedro 4:7.

Nasimbeng ti panunottayo no umiso ti panangmatmattayo iti kinaimperpektotayo. Ditay rumbeng nga ipabasol ken Satanas wenno iti lubong a konkontrolenna ti amin a pagkamaliantayo, nalabit gapu ta pampanunotentayo nga idiayto laengen baro a lubong a korehirentayo dagiti pakapilawantayo kalpasan nga ikkaten ti Dios dagita a dakes nga impluensia. Ita pay laeng, kabaelantayon a labanan dagiti dakes a galad a kas iti panagimbubukodan no ‘ikawestayo ti baro a personalidad.’​—Efeso 4:​24.

“Idissoyo ti Bolpenyo.” Inusar ni Mark Noumair nga instruktor ti Gilead ti ilustrasion maipapan iti bolpen a mangirepresentar iti “tendensia ti tao a mangisurat iti bukodna nga iskrip iti biag.” No ‘idissotayo ti bolpentayo,’ kaipapananna a palpalubosantayo a ni Jehova ti mangisurat iti iskrip.

Maysa a pakdaar ni Ari Saul maipapan iti daytoy a banag. Idi rugrugi ti panagarina, isu ket naemma, napakumbaba. ken saan a natangsit. (1 Samuel 10:22, 27; 11:13) Ngem idi agangay, “isursuratnan ti bukodna nga iskrip,” babaen ti panangitan-okna iti bagina ken panangaramidna kadagiti impagarupna nga umiso. Isu ket inlaksid ti Dios gapu iti kinasukirna.​—1 Samuel 14:24; 15:10, 11.

Uray no matalek agingga ita dagiti estudiante, impalagip kadakuada ni Brother Noumair a masapul nga itultuloyda nga aramiden ti trabaho ti Dios maitunos iti pamay-anna. Impakdaarna kadagiti estudiante: “Saan a gapu ta us-usarennatayo ti Dios ket garantia daytan a maragsakan isuna kadatayo.” Kas pagarigan, sinukir ni Moises dagiti bilin ti Dios idi simimilagro a nangparuar iti danum manipud iti maysa a bato. Nabaelanna nga agpayso ti nangparuar iti danum ngem dina nagun-odan ti bendision ni Jehova.​—Numeros 20:​7-​12.

“Ipakaammotayo ti Napigsa a Timek ti Anghel nga Agtaytayab iti Nagtangatangan.” Imbasar ti instruktor ti Gilead a ni Sam Roberson ti palawagna iti Apocalipsis 14:​6, 7. Kalpasanna, impayaktona kadagiti estudiante dagiti nabiit pay a kapadasanda iti panangasabada. Kas pagarigan, bayat nga agpapaungar ti maysa nga estudiante kalpasan a naopera, kinasabaanna ti maysa a nars iti ospital. Taga-Peru ti nars isu nga impakitana kenkuana ti retrato dagiti Saksi a mangaskasaba idiay Chachapoyas, Peru, iti jw.org a Web site. Gapu iti dayta, ti nars ken ni lakayna ket nakipagadal iti Biblia.

“Sinikapannak . . . iti Kasta Nasikapanak.” (Jeremias 20:7) Ininterbiu ni Allen Shuster a miembro ti Branch Committee iti United States ti dua nga agassawa manipud iti klase. Panagriknada a ‘sinikapan’ ida ni Jehova. Kasano? Idi damo, nagduaduada a dida kabaelan ti ageskuela iti Gilead. Ngem idi madaman ti panageskuelada, agsasaruno ti tulong a naawatda isu a nagballigida met laeng. Kastoy ti imbaga ni Sister Marianne Aronsson kas panangapresiarna iti pannakasanayna iti Gilead: “Diakton pulos problemaen no ania ti adalek​—ta naamirisko a ti tunggal bersikulo ti Biblia ket kas iti maysa a gameng.”

“Tuladenyo ti Pammatida.” Ni David Splane a miembro ti Bagi a Manarawidwid ti nangiparang iti kangrunaan a palawag iti programa. Imbasarna ti temana iti Hebreo 13:7 a kunana: “Laglagipenyo dagidiay mangidadaulo kadakayo, isuda a nangisao kadakayo ti sao ti Dios, ket bayat nga ut-utobenyo ti pagbanagan ti kababalinda tuladenyo ti pammatida.” Kasano nga impakita dagidiay “mangidadaulo” iti trabaho dagiti Saksi ni Jehova 70 a tawenen ti napalabas ti pammatida?

Idi Septiembre 24, 1942, inyurnos ni Nathan Knorr nga agmiting dagiti direktor ti dua a korporasion nga us-usaren dagiti Saksi ni Jehova ken insingasingna a maipasdek ti maysa a baro nga eskuelaan​—ti Gilead​—a mangsanay kadagiti misionero a mangidaulo iti trabaho a panangasaba kadagiti baro a teritoria. Ngem kasla saan idi a maitutop ti mangipasdek iti kasta nga eskuelaan. Manarimaan ti Sangalubongan a Gubat II, isu a narigat wenno imposible ti mangibaon kadagiti misionero iti adu a pagilian. Nagsuek met ti ekonomia ti lubong idi 1930’s, isu a ti pondo ti organisasion para iti eskuelaan ket umdas laeng para iti lima a tawen. Nupay kasta, impakita dagidi a kakabsat ti pammatida babaen ti sangsangkamaysa nga iyaanamongda iti dayta a singasing.

Impakita met dagiti nagturpos kadagiti nagkauna a klase ti Gilead ti mapagwadan a pammatida. Nagbalinda a kontento ken dida inayat ti kuarta. (Hebreo 13:​5, 6) Impagarup ti adu kadakuada a didan pulos makita dagiti kapamiliada agsipud ta dida met kabaelan ti mangipatulod iti pleteda nga agbakasion. Kinapudnona, sa la nakita ti adu a misionero dagiti kapamiliada kalpasan ti 10 wenno 15 a tawen a kaaddada kadagiti nakaidestinuanda. Ngem kombinsidoda nga itultuloy ni Jesus nga aywanan ida ken dagiti kapamiliada a kas iti kanayon nga ar-aramidenna.​—Hebreo 13:8.

Kalpasan nga insalaysayna ti pakasaritaan ti dadduma a nagserbi kadagiti narigat a teritoria iti sabali a pagilian sakbay pay ti panageskuelada iti Gilead, imbaga ni Brother Splane kadagiti estudiante: “Dakayo a nagsasayaat nga agkabannuag a lallaki ken babbai, talaga nga itultuloyyo ti maipagpannakkel a pakasaritaan dagiti immun-una a nageskuela iti Gilead School 70 a tawenen ti napalabas. . . . Sapay koma ta siraragsak nga agserbikayo ken Jehova iti sadinoman a pakaibaonanyo.”

Iti maudi a paset ni Brother Splane, adda impabuyana a video dagiti ladawan ti 77 a nagturpos iti Gilead nga agserserbi itan iti sanga nga opisina dagiti Saksi ni Jehova iti United States, agraman ti dua a nagturpos iti kaunaan a klase idi 1943. Dagiti ladawan ket naakompaniaran iti kanta nga inusar dagiti Saksi ni Jehova iti panagdaydayawda iti napalabas a 70 a tawen.

Kalpasan a naawat dagiti estudiante dagiti diplomada, maysa kadagiti nagturpos ti nangbasa iti surat ti apresasion ti klase. Ni Brother Sanderson ti nangserra iti programa babaen ti panangipaganetgetna a nupay no 70 a tawenen ti napalabas, agpayso pay laeng ti imbaga ni Brother Knorr iti kaunaan a klase ti Gilead: “Sadinoman ti pakaibaonanyo, laglagipenyo a maysakayo . . . nga agibumbunannag iti Pagarian; ken ti katan-okan a pribilehio a maipaay iti asinoman ditoy daga ket ti panagbalin nga agibumbunannag a mangikankanta iti panagdaydayaw ita, sakbay ti Armagedon. . . . Agingga nga adda pribilehioyo a mangasaba, mangasabakayo koma.”