Idi Hulio 2013, maysa a makapagagar a surat ti impatulod ti Bagi a Manarawidwid dagiti Saksi ni Jehova kadagiti misionero ken dadduma pay nga adda iti espesial nga amin-tiempo a panagserbi nga adda iti sabali a pagilian. Nadakamat iti surat ti maysa nga urnos a panangtulong kadagidiay agserserbi iti sabali a pagilian iti panagbiaheda a mapan kadagiti rehional ken internasional a kombension a maaramid iti 2014 agingga iti nasapa a paset ti 2015.

Ti panggep daytoy nga urnos ket saan laeng a tapno tulongan dagidiay agserserbi iti sabali a pagilian a makapan iti kombension no di ket tapno makalangenda ti pamilia ken gagayyemda. Nadakamat pay iti surat a ti organisasion ti mangbayad iti round-trip a tiket iti eroplano.

Nupay adda ti kastan nga urnos iti napalpalabas, naiduma iti daytoy a tawen. Iti sidong ti panangiwanwan ti Teaching Committee ti Bagi a Manarawidwid, ti agi-book kadagiti tiket ket ti kabubuangay a departamento, ti World Headquarters (WHQ) Travel.

Apaman a naipatulod dagiti surat ti imbitasion, mangrugin a makaawat ti WHQ Travel kadagiti kiddaw para iti tiket iti eroplano. Idi Enero 2014, nakaad-adun dagiti agsangpet a kiddaw. Ti grupo a natudingan a mangasikaso kadagiti eskediul ti biahe ket nagbirok ken nagi-book kadagiti itinerary para kadagiti adda iti espesial nga amin-tiempo a panagserbi iti intero a lubong.

Narikut ti dadduma a ruta ti biahe. Dagiti agbiahe manipud Reykjavík, Iceland ket masapul a mapan idiay Cochabamba, Bolivia. Dadduma nga aggapu iti Nouméa, New Caledonia kasapulan nga agtayabda a mapan idiay Antananarivo, Madagascar. Dadduma met nga agbiahe manipud Port Moresby, Papua New Guinea ti agturong idiay Seattle, Washington, U.S.A., ken adda met dagiti aggapu iti Ouagadougou, Burkina Faso a mapan idiay Winnipeg, Canada.

Agarup 19,000 a tiket ti eroplano ti nai-book ti WHQ Travel team a buklen ti lima a tao. Babaen ti panangusarda kadagiti pondo nga indonar dagiti kongregasion a nairanta para iti daytoy a panggep, nakagatang ken nakaipatulodda kadagiti tiket para iti agarup 4,300 a biahero iti 176 a pagilian.

Napalalo ti panagyaman dagiti naipaayan iti daytoy a probision. Insurat ti maysa a pagassawaan a misionero: “Agsublikami itan iti nakaidestinuanmi idiay Southeast Asia. Agyamyamankami unay iti panangtulongyo kadakami a makaawid iti pagilianmi nga England tapno makaduami ti pamiliami iti damo a gundaway bayat ti lima a tawen. No awan daytoy a probision a nangtulong kadakami, dikam koma nakaawid. Isu a naimpusuan nga agyamankami kadakayo amin a namagbalin a posible ti panagawidmi.”

Insurat ti maysa a misionero nga agserserbi idiay Paraguay: “Kayatmi ken ni baketko nga iyebkas ti naimpusuan a panagyamanmi gapu iti gundawaymi nga umatender iti internasional a kombension idiay New Jersey, U.S.A. Iti nasapa a paset ti 2011, inrugimin ti nagplano a mapan idiay United States tapno makitami ti sangalubongan a headquarter ket inyurnonganmi dayta. Ngem idi Hunio iti dayta a tawen, naawiskami nga agbisita kadagiti kongregasion ti sign-language idiay Paraguay. Kaipapanan dayta a kanayon nga agbiahekami a mapan iti nadumaduma a lugar. Inus-usigmi a naimbag ket inkeddengmi a saanmin nga ituloy ti biahemi a mapan idiay United States ket gumatangkami laengen iti lugan tapno ad-adu ti magapuananmi iti baro nga annongenmi. Idi kuan, nakaawatkami iti imbitasion nga umatender iti internasional a kombension. Natungpal met laengen ti arapaapmi! Agyamyamankami la unay ken Jehova iti kinaimbag ken kinadungngona.”

“Kayatmi nga iyebkas ti napalaus a panagyamanmi babaen iti daytoy ababa nga e-mail!” Daytoy ti surat ti agassawa manipud Malawi. “Adu la ketdi a trabaho dayta, agraman nausar nga oras ken kuarta tapno maasikaso ti adu nga itinerary. Apresiarenmi ti panagbannogyo ken kangrunaan iti amin, ti kinaparabur ti organisasion ni Jehova tapno posible a makaawidkami nga umatender iti internasional a kombension ken makiinniliw iti pamilia ken gagayyemmi.”

Magusgustuan dagidiay adda iti WHQ Travel daytoy nga annongenda. “Naisangsangayan ti pribilehio a tumulong kadagiti misionero a makaawid tapno makitada ti pamilia ken gagayyemda,” kuna ni Mileivi. “Gapu iti daytoy, naapresiarko unay ti nauneg a panagayat ti organisasion kadagidiay agserserbi iti sabali a pagilian,” innayon ni Dorise. Kinuna met ti overseer ti departamento a ni Rodney: “Makaparagsak ta karamanak iti daytoy a proyekto.”

Maragragsakan dagiti Saksi ni Jehova iti intero a lubong a nangipaay iti daytoy a naayat a regalo para kadagiti nagagaget ken managsakripisio a kakabsatda.