“Nariknami ti aglaplapusanan nga ayat!” Dayta ti nakuna ti maysa a babai idiay Ukraine a dimngeg iti napateg a surat nga imbasa ni Stephen Lett a miembro ti Bagi a Manarawidwid dagiti Saksi ni Jehova. Isu ket maysa kadagiti 165,000 a Saksi a dimngeg iti palawag ni Brother Lett bayat ti ibibisitana iti dayta a pagilian idi Mayo 10 ken 11, 2014.

Dagiti palawag a naibatay iti Biblia ken ti pannakaibasa dayta a surat ket naipatarus iti lima a lengguahe ken naikonektar iti agarup 700 a Kingdom Hall iti intero a Ukraine.

Iti isu met la a petsa, dayta a surat ket binasa ni Mark Sanderson a miembro met laeng ti Bagi a Manarawidwid kas paset ti programa a nayurnos kadagiti kakabsattayo iti intero a Russia. Naipatarus dayta a programa iti 14 a lengguahe, ken nangngeg ti 180,413 iti nasurok a 2,500 a kongregasion iti Belarus ken Russia a nakaikonektaran dayta.

Ti surat a naggapu iti Bagi a Manarawidwid ket naiturong iti amin a kongregasion iti Russia ken Ukraine. Binasa dayta ni Brother Sanderson iti Russian a nakatignayan ti sanga nga opisina ti Russia a mangisurat iti kastoy: “Natukay unay ti rikna dagiti kakabsat gapu iti napalalo a pannakaseknan ti Bagi a Manarawidwid iti daytoy a paset ti lubong. Nariknami amin a kas man la siiirut nga inarakupnakami ti Bagi a Manarawidwid.”

Panggep ti surat a liwliwaen ken pabilgen dagiti Saksi iti rehion a nariribuk ti kasasaadna iti politika. Binalakadanna dagiti kakabsat nga itultuloyda ti agbalin a ‘saan a paset ti lubong’ babaen ti panagtalinaedda a neutral mainaig kadagiti napolitikaan nga isyu iti lubong.—Juan 17:16.

Gapu iti dayta, pinaregta ti Bagi a Manarawidwid dagiti Saksi a taginayonenda ti nasinged a relasionda ken Jehova babaen ti kararag, panagadal, ken panangutob iti Sao ti Dios. Naipalagip iti amin a dimngeg nga aniaman ti maipasango kadakuada a pannubok, masiguradoda ti pannakatungpal ti kari ti Dios iti Isaias 54:17: “Aniaman nga igam a mabukelto maibusor kenka saanto nga agballigi.”

Nagleppas ti surat ti Bagi a Manarawidwid babaen kadagitoy a sasao: “Ay-ayatendakayo unay. Namnamaenyo a kanayon a pampanunotendakayo ken ikarkararagdakayo ken Jehova.”

Kastoy ti nakuna ti sanga nga opisina iti Ukraine maipapan kadagita nga ibibisita: “Napalaus ti panagyaman dagiti kakabsat iti nadungngo a pannakaseknan ken kinaimbag ti Bagi a Manarawidwid. Ti ibibisita da Brother Lett ken Brother Sanderson iti Ukraine ken Russia iti agpada a petsa ket nalawag nga ebidensia iti panagkaykaysa ti ili ti Dios ken nangipakita kadagiti kakabsat iti kasta unay a panagayat kadakuada ni Jehova ken ni Jesus. Umanamongkami amin a naintiempuan dayta nga ibibisita, ket napabilegkami nga agtultuloy nga agserbi ken Jehova iti laksid ti aniaman a rigat a maipasango kadakami.”