Ni Harold Corkern, a katulongan iti Publishing Committee ti Bagi a Manarawidwid, ket nangipaay iti Nainkasuratan a palawag a natemaan iti “Itultuloyyo nga Aramiden ti Amin a Kabaelanyo.” Regular nga adda bumisbisita nga agpalawag iti Warwick a mangparegta kadagiti trabahador.

Ti puraw a plastik a trapal protektaranna dagiti trabahador ken makatulong kadakuada a mangileppas iti trabahoda bayat ti winter. Daytoy a seksion ti pasdek ti ayanto ti panganan, infirmary, kosina, ken paglabaan.

Agsagsagana dagiti elektrisian nga agikapet iti waya. Nasurok a 12,000 a metro (40,000 pie) a kable ti naikapeten kadagiti residence building. Apaman a nagatang ti daga iti Warwick, nangrugin ti trabaho mainaig iti elektrikal ken agtultuloy dayta agingga a malpas ti proyekto.

Maysa a trabahador a mangikabkabil iti duct tape iti balkonahe tapno maisagana para iti waterproofing. Ditoy, dagiti balkonahe iti kangatuan a kadsaaran ket makalupkopan iti polymethyl methacrylate (PMMA)—maysa a water-resistant membrane nga alisto a mai-apply kas likido.

Agama nga elektrisian nga agikapkapet iti waya ti koriente a mapan iti tunggal kuarto.

Mangmangan iti pangngaldaw dagiti mabisin a trabahador iti temporario a panganan. Inaldaw a nasurok a 2,000 a pangaldaw ti maisagsagana.

Agikabkabil dagiti trabahador iti landok para iti basement kadagiti maintenance shop.

Surat dagiti ubbing, nga agyamyaman kadagiti trabahador. Adu dagiti boluntario nga apagbiit laeng. Kinapudnona, agarup 500 a baro a trabahador ti linawas a sumangpet. Iti bulan ti Pebrero, agarup 2,500 ti inaldaw a nagtrabaho iti proyekto iti Warwick.

Agarup 60 a porsiento iti proyekto ti nalpasen. Manipud Enero agingga iti Abril 2015, nairingpas ti estruktura dagiti residence building ken ti estruktura a landok ti Offices/Services Building. Bayat dayta a tiempo, rinugian met dagiti trabahador nga iplastar dagiti konkreto a diding iti Maintenance Building, aramiden ti pagnaan a mamagkonektar kadagiti residence, ken tarimaanen ti dam iti Sterling Forest Lake (Blue Lake).

Buya ti maysa nga stair tower manipud iti baba. Dagiti nabayadan a kontraktor ti nagipatakder kadagiti pormas daytoy lima ti kadsaaranna a tower, ket dagiti boluntario a Saksi ti nagibuhos iti semento iti dayta.

Iti nalamiis nga aldaw, agikabkabil dagiti trabahador iti landok para iti umuna a kadsaaran. Agarup 127 a sentimetro (50 pulgada) ti nagtinnag a niebe iti Warwick manipud Enero agingga iti Marso. Palpalaen dagiti trabahador dagiti niebe tapno nawaya ti agtrabaho, ken adda dagiti estasion a pagpapudotan dagiti trabahador.

Maikapkapet ti metal a galba iti nasaksakbay ti pannakasangalna a balabala dagiti atep. Iti ngudo ti Abril, nakompleto ken naikapeten ti kaaduan a bayangbayang (gabled roof) dagiti residence building. Malpas a maatepan ti Residence B iti katengngaan ti Hunio.

Buya ti Residence B manipud iti tower crane.

Iti Resident Parking Garage, kitkitaen dagiti tubero dagiti drowing. Nasurok a 3,400 nga aprobado a drowing ti konstruksion ti kasapulan para iti intero a proyekto.

Manipud iti boom lift, agikabkabil dagiti trabahador iti plastik a trapal tapno maprotektaran ti pasdek. Adu a panagsanay ti maar-aramid tapno masigurado a natalged ti panagusar kadagiti lift ken dadduma pay nga equipment. Dagiti klase mainaig iti kinatalged ramanenna ti panagusar kadagiti boom lift, scissor lift, proteksion tapno saan a matnag, dagiti kangrunaan a prinsipio iti kinatalged, panagusar iti respirator, ken rigging/signaling.

Buya dagiti residence building manipud iti laud. Iti ngudo ti Abril, kapigsa ti pannakatrabaho ti mekanikal ken elektrikal iti Residence A, B, ken D, kas makita iti daytoy a retrato. Nairugi metten ti panagikapet iti drywall, tile, ken panagpintura iti Residence C (saan a makita ditoy retrato).

Dua a trabahador iti boom lift a mangikabkabil iti vapor-permeable air barrier iti makinruar a paset dagiti diding. Agarup dua a bulan ti mabusbos iti panagikabil iti barrier iti tunggal residence building.

Agibangbangon dagiti mason iti pader a granite. Daytoy a pasdek ti ayanto ti receiving dock ken nagduduma a support service.

Suksuktan ti maysa a natangdanan a bumabatok (diver) ti daan a valve iti Blue Lake. Iti maysa laeng a talmeg ti button, mabalinen nga ages-es ti dan-aw tapno saan nga aglayus no adda bagyo.