Rinugianen dagiti Saksi ni Jehova nga ibangon ti pasilidad ti baro a sangalubongan a hedkuarterda iti asideg ti Sterling Forest Lake (Blue Lake) iti away ti New York State. Kasano ti panangsalaknibda kadagiti atap nga animal, mulmula, ken ti aglawlaw sadiay?

Nagaramid dagiti Saksi iti temporario nga alad iti aglawlaw ti lugar a pagibangbangonan tapno malapdan dagiti timber rattlesnakes, eastern box turtles, ken wood turtles a sumrek iti lugar a mabalin a pakadangrananda. Ti alad ket regular a masukimat tapno masigurado a saan a makastrek dagiti animal ken di mapupok iti lugar nga ayan dagiti trabahador. Inton malpas ti konstruksion, maikkatto met laeng ti alad. Aniaman a rattlesnake a masarakan iti asideg ti pasilidad ket iyakar ti maysa a nasanay a mangaramid iti dayta a sitatalged.

Napukan dagiti kayo bayat dagiti bulan iti tiempo ti lam-ek tapno saan a madisturbo ti panagitlog dagiti eastern bluebirds. Kalpasan ti konstruksion kadagiti apektado a lugar, mangikabilto dagiti Saksi kadagiti kahon a pagitlogan tapno maallukoy dagiti billit nga agsubli.

Ur-urnosen ken daldalusanda met ti dadduma a lugar bayat ti Oktubre ken Marso tapno maiwaras ken agtubo ti aniaman a bukel ti agpegpeggaden a maungaw a hyssop skullcap. Masursurot daytoy nga eskediul uray no awan kadagita a mula ti nasarakan iti lugar ti proyekto iti Warwick sipud idi 2007.

Ti Sterling Forest Lake, nga adda iti igid ti lugar ti konstruksion ti pagnanaedan ti nadumaduma a makalangoy a tumatayab agraman dagiti lames, a kas iti trout, bass, pickerel, ken perch. Tapno maprotektaran ti danaw, nagpili dagiti diseniador iti nadumaduma a teknik iti konstruksion a saan a makadangran iti aglawlaw. Karaman kadagitoy ti panagmula iti atep dagiti pasdek, a mangdalus iti aniaman a rugit nga aggapu iti tudo ken mangkissay iti pannakaurnong ti danum. Mapagtalinaed ken masalsalakniban met dagiti datin a mula iti aglawlaw ti danaw.

Kuna ti maysa a Saksi a tumultulong kadagitoy a paset ti proyekto, “Uray no kasapulan ti kanayonan a panagplano ken tiempo a panangaramid iti dayta, determinadokami a mangprotektar iti aglawlaw ti Warwick.”