Adu ti masmasdaaw iti kinamanagsakripisio dagiti tumultulong iti konstruksion idiay Warwick. Kuna ti direktor ti kompania a nangikabil kadagiti elebeytor iti maysa a trabahador: “Nakaskasdaaw ti ar-aramidenyo. Kaaduan a tao ita ket naimut iti orasda.”

Idi naammuanna ken dagiti kakaduana a dagiti agibangbangon iti sangalubongan a hedkuarter dagiti Saksi ni Jehova idiay Warwick, New York, ket volunteer, impagarupda nga asideg laeng ti naggapuan dagitoy a Saksi ken Sabado ken Domingo laeng ti trabahoda. Nasdaawda idi naammuanda nga adda dagiti nagikkat iti trabaho ken naggapuda iti nadumaduma a paset ti pagilian tapno umayda tumulong iti sumagmamano a bulan, wenno tawtawen pay ketdi.

Idi ngudo ti 2015, agarup 23,000 a Saksi ti nagboluntario idiay Warwick a kaduada dagiti miembro ti pamilia ti United States Bethel. Adda met 750 a construction worker a saan a Saksi ni Jehova a timmulong tapno maipalpas ti trabaho sigun iti eskediul. Nagdakkel ken nagsayaat ti epektona kadagitoy a trabahador ti pannakipagtrabahoda kadagiti Saksi ni Jehova.

Kastoy ti insurat ti manedyer ti maysa a kompania nga agar-aramid iti tawa ken pagdiding: “Masmasdaaw dagiti trabahador ti kompaniami a karaman iti daytoy a proyekto gapu iti ugali dagiti nakatrabahuanda. Isu nga adu kadakami ti mayat nga agtrabaho iti daytoy a proyekto.”

Adda sabali pay a kompania a nangipatulod kadagiti trabahador tapno tumulong iti panangipatakder kadagiti residence building. Idi nalpasen ti kontrata ti kompania, kayat ti tallo a trabahadorda ti agtalinaed iti Warwick. Nagikkatda iti trabahoda sa simrekda iti sabali a kompania a madama pay laeng idi nga agtrabtrabaho sadiay.

Nagsayaat ti epektona iti dadduma a trabahador dagiti maitunos iti Biblia nga ugali nga impakita dagiti Saksi. Adda lalaki nga agtrabtrabaho iti kompania a nagaramid iti pundasion dagiti building. Kalpasan ti sumagmamano a bulan a panagtrabahona idiay Warwick, nadlaw ni baketna a simmayaat ti ugali ken panagsasaona. Maragragsakan a nangibaga: “Nagdakkel ti nagbaliwanna!”

Adu kadagiti Saksi a nagtrabaho iti site ket babbai. Saanda la a nagmaneho iti bus, nagdalus iti kuarto, ken nagtrabaho iti opisina no di ket inurnosda pay ti trapiko, nagmanehoda iti heavy equipment, pinagsisilpoda dagiti fiber-optic cable, inikkanda iti proteksion dagiti tubo, nagikapetda iti drywall, nagiplastarda iti tubo, ken timmulongda iti panagbuhos. Nakagaggagetda!

Napaliiw ti saan a Saksi a nangikabil kadagiti atep a no bumaban iti bus dagiti aggaassawa, adda dagiti agkibin a mapan iti trabahoda. Nagustuanna dayta. Nakitana met a kasla saan a mabambannog dagiti babbai. “No makitam dagiti naasawaan a babbai iti site, kunam no simmurotda laeng iti asawada,” kinunana. “Ngem no agtrabahodan, adu ti malpasda! Adun a proyekto ti nagtrabahuak iti intero a New York City, ngem awan pay ti nakitak a kastoy.”

Sabsabali ti winter idi 2014/2015 isu a nagmayat koma ti agkukot iti uneg ti balaymo imbes nga agmalmalem nga agtrabahoka iti ruar. Malagip ni Jeremy, maysa a Saksi a timmulong iti panangyurnos iti trabaho iti site: “No nalamiis idi ti panawen, masansan a damagen kaniak ti maysa a foreman ti maysa a kompania, ‘Agobra met inton bigat dagiti babbai a kaduayo?’

Nasurok a 35 a drayber ti bus ti nabayadan a mangdagas ken mangitulod kadagiti volunteer idiay Warwick manipud iti paggigiananda.

Sakbay ti maysa a biahe, timmakder ti drayber sa simmango kadagiti pasaherona. “Magusgustuankayo nga imanehuan,” kunana. “Pangngaasiyo man ta ag-email-kayo ken boss-ko ket ibagayo a ditoyak lattan. Nagadu ti naammuak iti Biblia gapu kadakayo. Diak idi ammo ti nagan ti Dios ken addanto gayam ti paraiso ditoy daga. Saanakon a mabuteng a matay. Awan pangisukatak iti pannakikaduak kadakayo. Makitadakto idiay Kingdom Hall inton sumaruno a day-off-ko.”

Kuna ni Damiana, maysa a Saksi a volunteer idiay Warwick: “Maysa nga aldaw, idi nakalugankamin iti bus, kuna ti draybermi nga adda kano ibagana. Kunana nga addan 4,000 a Saksi nga intulod ken dinagasna iti nadumaduma a construction site-tayo iti New York. ‘Adda latta babassit a diyo pagpapadaan,’ kunana, ‘ngem baybay-anyo latta dagita ken agtitinnulongkayo. Nagmayat dayta.’ Imbagana pay a magusgustuanna ti makisarsarita kadakami.

“Idi nalpasen nga agsao, dinamag ti maysa a Saksi nga adda iti bus, ‘Magusgustuam kadi no agkakantakami?’

“Nagkatawa sa imbagana, ‘Wen! Kantaentayon ti 134?’” *