Adu a publikasion dagiti Saksi ni Jehova ti addaan kadagiti nagpipintas ken de kolor a ladawan a maibagay iti artikulo. Ngem saan idi a kanayon a kasta. Ti kaunaan a ruar ti Zion’s Watch Tower a naipablaak idi 1879 ket awanan kadagiti ladawan. Iti pinullo a tawen, bin-ig a letra laeng ti makita kadagiti publikasionmi a sagpaminsan nga addaan iti ilustrasion wenno retrato a black-and-white.

Ngem aduanen ita iti ladawan ti adu kadagiti publikasionmi. Dagiti mismo nga artist ken retratistami ti mangipapaay iti kaaduan nga artwork ken adu nga ilustrasion ken retrato a makitkitam kadagiti publikasion ken iti daytoy a website. Makatulong ti naannad ken detalyado a panag-research iti panangaramid kadagiti ladawan a makaisuro kadagiti napateg a kinapudno ken historia nga isursuro ti Biblia.

Kas pagarigan, kitaem ti ladawan a naipakita iti daytoy nga artikulo a damo a makita iti kapitulo 19 ti libro a Naan-anay nga Ikasabam ti Pagarian ti Dios. Ti lugar ket iti nagkauna a Corinto. Kas nadeskribir iti kapitulo 18 ti Aramid a libro ti Biblia, ni apostol Pablo ket nakatakder iti sango ti bema, wenno tugaw ti mangukom. Dagiti researcher ket nangipaay iti impormasion iti artist maipapan kadagiti nakabakab dagiti arkeologo a nainaig iti posision ken kolor dagiti marmol nga estruktura a makita iti lugar a mabalin a dimmatagan ni Pablo ken Galion. Nangted met dagiti researcher iti impormasion maipapan iti bado dagiti Romano idi umuna a siglo tapno ti prokonsul a ni Galion, a makita iti tengnga ti ladawan, ket mailadawan a nakakawes iti bado dagiti natan-ok ti saadna iti imperio. Isu ket nakakawes iti atiddog a bado a tunika ken toga nga addaan iti akaba a maris lila a payping (piping) ken nakasapatos iti calcei. Sigun kadagiti researcher, no nakatakder ni Galion iti bema, nakasango la ketdi isuna iti amianan a laud. Iti kasta, ti artist ket naaddaan iti ideya no kasano kalawag ti panangidrowingna iti dayta nga eksena.

Mangar-aramidkami iti catalog dagiti ladawan ken retrato tapno maidokumento ti research ken tapno mabalin a mausarto manen dagita. Adu a tawen nga indulinmi dagiti artwork ken ilustrasion kadagiti dadakkel a sobre sigun iti publikasion a nakausaranda. Naurnos dagiti retrato sigun iti topiko. Idi immadun dagita, rimmigat ti panangbirok ken panangusar manen kadagita.

Idi 1991, nakaaramidkami iti searchable database a maibagay kadagiti naisangsangayan a kasapulanmi. Maawagan dayta iti Image Services System ket nai-catalog iti dayta ti nasurok nga 440,000 a ladawan. Malaksid kadagiti retrato a nausaren kadagiti publikasionmi, rinibu pay a retrato ti nai-catalog tapno mausar kadagiti publikasionmi iti masanguanan.

Nakarekord ti adu a detalye—agraman no kaano ken no sadino a nausar ti retrato, dagiti nagan ti tunggal tao iti retrato, ken ti panawen nga ipaspasimudaag ti naretrato nga eksena. Dakkel ti maitulong ti nadaras a panangsapul kadagiti maitutop a retrato no maisagsagana dagiti baro a publikasion.

No dadduma, agkiddawkami iti permiso kadagiti indibidual wenno komersial a kompania nga usarenmi dagiti retrato a kukuada. Kas pagarigan, nalabit kasapulanmi ti retrato dagiti pannakasingsing ti planeta a Saturn para iti maysa nga artikulo ti Agriingkayo! Dagiti tumultulong a katrabahuanmi ti agbirok iti maitutop a ladawan sada kontaken ti makinkukua tapno agkiddawda iti permiso nga usarenmi dayta. Ti dadduma ket mangted a dagus iti permiso kas panangapresiarda iti sangalubongan a trabahomi a panangisuro iti Biblia. Adda met dagiti agpabayad wenno agkiddaw nga i-print-mi ti credit line-da. Apaman nga addan tulagan, ti ladawan ket mabalinmin nga usaren iti publikasionmi ken mai-catalog iti database-mi.

Ti dadduma kadagiti publikasionmi ita ket aduanen iti ladawan. Kas pagarigan, iti daytoy a website, addaankami iti Nailadawan nga Estoria ti Biblia agraman kadagiti namaris a broshur a kas iti Listen to God, a mangisuro kadagiti napateg a leksion babaen iti sumagmamano laeng a sasao. Dagita a broshur ket magun-odan met kadagiti nayimprenta nga edision. Amin dagita ken ti dadduma pay a nayimprenta a publikasionmi ken dagiti adda iti website-mi ket mangisursuro maipapan iti Biblia.