Idi Oktubre 7, 2013, inruar dagiti Saksi ni Jehova ti JW Library, maysa a mobile device app a mausar iti panagbasa ken panagadal iti Biblia. Daytoy a libre a Bible app itampokna ti innem nga Ingles a patarus ti Biblia, a pakairamanan ti King James Version ken ti 2013 a rebision ti New World Translation of the Holy Scriptures. *

Minilion ti agdepdepende kadagiti smartphones, tablets, wenno kadagiti umasping a gadyet para iti trabaho ken komunikasion. Ngem gapu ta dagiti agus-usar kadagiti gadyet ket nalaka laengen a makabirok iti impormasion a mausar iti panagadal iti Biblia iti jw.org, apay pay la a naaramid ti JW Library?

Umuna, di kasapulan dayta nga app ti koneksion ti Internet apaman a na-install-en, isu a mausar latta uray awan ti Internet. Maikadua, nangnangruna a nadisenio dayta nga app a mangtulong iti agbasbasa tapno nalakana a biroken dagiti teksto ken maadalna a naimbag ti Biblia. Kasano?

No damom a luktan ti JW Library, agparang dagiti nagan dagiti libro ti Biblia. No mangpilika iti maysa a libro ti Biblia, ipakita ti sumaruno nga iskrin ti listaan dagiti kapitulo ti pinilim a libro. Makatulong daytoy tapno maluktam ti maysa a bersikulo iti sumagmamano laeng a segundo. Adda pay dadduma a features dayta nga app a makatulong iti panagadal ti Biblia:

• Dagiti footnote a mangipakita kadagiti alternatibo a patarus ken dadduma pay nga impormasion

• Dagiti cross reference kadagiti mainaig a bersikulo ti Biblia

• Maysa a search feature a mangiturong iti agus-usar iti amin a pagparangan ti sao wenno sasao

• Maysa nga outline of contents iti rugi ti tunggal libro ti Biblia

• Maysa a table a mangipakita iti nagan ti mannurat ti tunggal libro ken no sadino ken kaano a naisurat, agraman ti kapaut ti panawen a saklawen dayta

• Dagiti de kolor a mapa, tsart, time lines, ken diagram

Kas iti amin a publikasion dagiti Saksi ni Jehova, maipapaay a libre ti JW Library. Daytoy a libre a Bible app, nga interamente a masupsuportaran babaen iti boluntario a kontribusion, ket nai-download-en iti nasurok a maysa a milion a daras. (2 Corinto 9:7) Padasem dayta ket sigurado a matulongannaka daytoy a naidumduma a maitugottugot a libraria!