Bigbigbigen ti Estonia ti “Maysa a Dakkel a Gapuanan”
Ti Baro a Lubong a Patarus ti Nasantuan a Kasuratan nga Estonian ket nainominar iti Language Deed of the Year Award iti Estonia para iti 2014. Iti 18 a nainominar, daytoy ti nakaala iti maikatlo a puesto iti maudi a panagbobotos.
Daytoy a baro a patarus ti Biblia, a nairuar idi Agosto 8, 2014, ket impaayan ti pammadayaw ti nalaing iti lengguahe a ni Kristiina Ross iti Institute of the Estonian Language. Dineskribirna ti Baro a Lubong a Patarus kas “nalaka ken makaay-ayo a basaen.” Innayonna: “Ti pannakaaramid dayta ket nakatulong iti pannakapasayaat ti trabaho a panagipatarus iti Estonia.” Ni Rein Veidemann, a propesor iti literatura ken kultura ti Estonia, inawaganna dayta a baro a patarus kas “maysa a dakkel a gapuanan.”
Naipablaak ti umuna a kompleto a Biblia nga Estonian idi 1739, ket sipud idin, dadduma pay a patarus ti napataud. Apay ngarud a ti Baro a Lubong a Patarus ket “maysa a dakkel a gapuanan”?
Kinaumiso. Maysa a nalatak a Biblia nga Estonian a naipablaak idi 1988 ti makomendaran iti panangipatarusna iti nagan ti Dios kas “Jehoova” (Jehova) iti nasurok nga 6,800 a daras iti Hebreo a Kasuratan (Daan a Tulag). * Kasta met laeng ti inaramid ti Baro a Lubong a Patarus nga Estonian ken ad-adu pay ti nagparanganna. Kadagiti paset nga adda nalawag a pangibatayan a maaramat dayta, inusar met ti Baro a Lubong a Patarus ti nasantuan a nagan iti Kristiano a Griego a Kasuratan (Baro a Tulag).
Kinalawag. Ti kadi Baro a Lubong a Patarus ket umiso ken nalaka a maawatan? Ti mararaem a nagipatarus iti Biblia a ni Toomas Paul insuratna iti diario nga Eesti Kirik (Simbaan ti Estonia) a ti Baro a Lubong a Patarus “naragpatna ti kalat a pannakaipatarus iti umiso ken nalaka a maawatan nga Estonian.” Innayonna: “Maipasiguradok kadakayo a daytoy ti damo a gundaway a naragpat daytoy a kalat.”
Mabembenepisiaranda kadagiti pagsayaatan ti patarus nga Estonian
Nagsayaat ti panangawat dagiti taga-Estonia iti Baro a Lubong a Patarus. Maysa nga estasion ti radio iti pagilian ti nangilatang iti 40 a minuto a programa a ti baro a Biblia ti topiko. Kayat dagiti panguluen ti relihion ken dagiti miembroda ti maaddaan iti kopia isu a kinontakda dagiti Saksi ni Jehova. Maysa nga eskuelaan dagiti babaknang idiay Tallinn ti nagkiddaw iti 20 a kopia ti Baro a Lubong a Patarus tapno mausar iti klase. Magusgustuan dagiti taga-Estonia ti agbasa iti libro, ket maragsakan dagiti Saksi ni Jehova a mangipaay iti umiso ken nalaka a maawatan a patarus ti kasayaatan pay laeng ti pannakaisuratna a libro.
^ par. 5 Kalpasan nga insalaysay ni Ain Riistan, a tserman ti New Testament Studies iti University of Tartu, no kasano a nangrugi a baliksen dagiti taga-Estonia ti nagan ti Dios kas “Jehoova,” kastoy ti kunana: “Panagkunak, mayanatup unay ita dayta a sao a Jehoova. Iti laksid ti nangrugianna, addaan dayta iti nakapatpateg ken napnuan kaipapanan para iti adu a henerasion—Jehoova ti nagan ti Dios a nangibaon iti Anakna a mangsubbot kadagiti tattao.”
Baka Kayatmo Met ti
NAGPAPATEG A PANNURSURO TI BIBLIA
Adda Kadi Nagan ti Dios?
Adu ti titulo ti Dios, kas iti Mannakabalin-amin, Namarsua, ken Apo. Ngem agarup 7,000 a daras a nausar ti personal a nagan ti Dios iti Biblia.
MASANSAN A MAISALSALUDSOD
Umiso Kadi ti New World Translation?
Apay a naiduma ti New World Translation iti adu a sabali a patarus?
TRABAHO A PANAGIPABLAAK
No Kasano a Naaramid ti Baro a Biblia
Buyaem no kasano a naaramid ti New World Translation. Apay a masapul a mausar ti adu a panawen, kuarta, ken panagregget tapno laeng mapataud ti nagmayat a baro a Biblia?