Kalpasan ti napigsa a tudtudo idiay makin-amianan nga Italy idi maudi a paset ti Nobiembre 2016, nalayus ti dadduma a purok iti abagatan ti ili ti Moncalieri. Iti dadduma a lugar, nasurok a maysa ket kagudua a metro (1.6 ft) ti kaadalem ti danum. “Awan asinoman wenno aniaman a liniklikan ti danum,” inreport ti maysa a newspaper. Agarup 1,500 a residente ti dagus a pinagbakuit ti lokal nga autoridad, ket imbag laengen ta alisto dagiti rescue team, isu nga awan ti natay. Ngem nadadael ti sanikua ti adu a pamilia.

Dagus a nagtignay dagiti team a buklen dagiti Saksi iti dayta a lugar. Tinulonganda dagiti apektado a pamilia babaen ti panangiruarda kadagiti pitak ken basura iti balayda ken babaen ti panangsalbarda kadagiti muebles ken personal a bambanag. Idi a ti maysa a team nga addaan iti equipment ken taraon nakitada a nabangenan ti maysa a kalsada, pinalubosan ida dagiti autoridad a lumasat tapno matulonganda ti maysa a pamilia nga agkasapulan iti tulong. Timmulong dagiti boluntario kadagiti padada a Saksi kasta met kadagiti tattao a sabali ti pammatida.

Kas pagarigan, napno iti danum ti basement ti maysa nga apartment. Idi napaatiananen ti basement, adu a Saksi ti timmulong iti padada a Saksi nga agnagan Antonio ken ti pamiliana a mangdalus iti basement-da. Kalpasanna, timmulong dagiti boluntario iti dadduma pay a residente iti dayta a building. Nagpipilada ket iti sumagmamano laeng nga oras, nadalusanen ti amin a basement. Nagyamyamanda amin iti dayta a tulong. Ni Viviana, a maysa kadagiti residente, inasitganna ti baket ni Antonio ket agyamyaman ken aglulua nga imbagana: “Pangngaasiyo ta idanonyo ti panagyamanko kadagiti kakabsatyo—naidumdumakayo a talaga!”

Iti maysa a purok nga apektado unay iti layus, napaliiw dagiti residente ti itutulong dagiti team dagiti Saksi kadagiti naapektaran iti didigra. Natignay ti dadduma a residente iti nakitada, isu a nagboluntarioda a tumulong kadagita a team ket naragsakanda a sumurot iti instruksion ti team leader.

Naperdi ti adu a paset ti balay ti maysa a lalaki, ket napno iti pitak ti garahena. Nasdaaw ta adda walo a Saksi a timmulong a nangdalus iti garahena iti diretso nga uppat nga oras. Kas apresasion, inarakupna ti dadduma a boluntario sa im-post-na iti social media ti panagyamanna iti “nakapatpateg a tulongda.”

Kuna ti maysa a Saksi: “Timmulongkami iti sumagmamano a di Saksi a kaarrubami, nga adu kadakuada ti agtawenen iti 80. Dadduma kadakuada ti aglulua nga agyamyaman iti itutulongmi.” Ti maysa a kaarruba nga aktibo iti lokal a simbaan a Katoliko imbagana kadagiti Saksi nga ap-apresiarenna unay ti tulongda sa innayonna: “Makaparagsak a makita nga uray nagduduma ti pammatitayo, agtitinnulongtayo.” Kuna ti sabali pay a lalaki: “Pasensiakayon ta am-ammodakayo laeng kas bumisbisita kadagiti tattao iti bigat ti Domingo imbes nga iti tulong nga ipapaayyo.”