Nasuroken a 100 a tawen nga agdisdisenio ken agibangbangon dagiti Saksi ni Jehova kadagiti lugar a paggigimongan. Dagitoy a lugar a pagdaydayawan ket maaw-awagan iti Kingdom Hall. Adda kadi Kingdom Hall a maibangbangon iti asidegyo? Ania ti maitulong ti Kingdom Hall iti komunidadyo?

Nadisenio dagiti Kingdom Hall a mangnayon iti pintas ti komunidad. “Kayatmi a ti tunggal Kingdom Hall ket agbalin a maysa kadagiti kapipintasan ken desente a patakder iti komunidad,” kuna ni Jason, a tumultulong a mangorganisar iti panangibangon iti Kingdom Hall iti United States. Innayon pay ti maysa a Saksi nga architect a miembro ti design team, “Kayatmi a ti maibangon ket agbalin a napintas a regalo iti komunidad ken makaipaay iti positibo nga impluensia iti aglawlawna.”

Saksi ni Jehova dagiti agtrabaho iti konstruksion. Boluntario nga usarenda ti oras ken paglainganda, ken pagragsakanda unay ti makaibangon kadagiti pasdek a nangato ti kalidadna. Masansan a mapaliiw ti dadduma ti dekalidad a trabahoda. Kas pagarigan, iti maysa a kalkalpas a proyekto idiay Richmond, Texas, U.S.A, kinuna ti inspektor a ti atep ti Kingdom Hall ti maysa kadagiti kasayaatan nga atep a nakitana. Iti isla ti Jamaica, adda building inspector a nangikuyog kadagiti baro nga inspektor iti maysa a maibangbangon a Kingdom Hall ket kinunana: “Dikay pakadanagan dagitoy a tattao. Sursuroten a naimbag dagiti Saksi ni Jehova ti plano, napulpulido pay ketdi ti aramidenda ngem iti kidkiddawen dagiti local building code.” Imbaga met ti inspektor iti maysa a siudad ti Florida, U.S.A., “Addan dagiti ininspeksionko nga ospital ken dadakkel a proyekto ti gobierno, ngem awan ti kastoy a kinaorganisado. Nagsayaat a talaga ti maar-aramidanyo.”

Nagsayaat ti epekto dagiti gimong iti Kingdom Hall iti biag dagiti umat-atender. Natulonganda nga agbalin a nasaysayaat nga amma, inna, ken annak. Kuna ni Rod, a miembro ti maysa a Kingdom Hall design team: “Maisursuro iti amin a Kingdom Hall dagiti nangato a moral nga estandarte, a pagimbagan ti amin a komunidad.” Innayonna: “Ditoy a makabirokka iti tulong no adda pakarigatan. Iti uneg, mariknam a nadungngo ken mannakigayyem dagiti tattao. Makaawis dayta ken makatulong iti amin nga agkasapulan iti liwliwa ken mayat a mangammo iti ad-adu pay maipapan iti Dios.”

Dagiti umat-atender iti Kingdom Hall ket interesado iti pagimbagan dagiti kaarrubada, ken alistoda a tumulong no adda kalamidad. Kas pagarigan idi 2016, kalpasan a dinalapus ti bagyo nga agnagan Matthew ti Bahamas, 254 a balay ti tinarimaan dagiti Saksi ni Jehova. Iti maysa a purok, nalayus ti balay ti 80 ti tawenna nga agnagan Violet. Inasitganna ti maysa a grupo dagiti Saksi a tumultulong iti relief work. Imbagana a bayadanna ida iti aniaman a maawatna a tulong. Saanda nga immawat iti kuarta ngem sinuktanda latta ti adu a paset ti atep ni Violet tapno saanen nga agtedted. Nangikabilda pay iti baro ken napapintas a drywall tapno matarimaan ti kisame ti salasna. Inarakup ni Violet ti amin a miembro ti grupo, namin-adu a nagyaman ken sipipigsa a kinunana, “Talaga a tattaonakayo ti Dios!”

Tapno kanayon a nasayaat ti kondision dagiti Kingdom Hall, adda programa dagiti Saksi ni Jehova a mangsanay kadagiti Saksi iti lokal a kongregasion a mangmantener kadagiti Kingdom Hall. Nagsayaat ti resultana. Kas pagarigan, iti maysa a komunidad iti Arizona, inawat ti maysa a babai ti awis a makigimong. Napaliiwna ti nagsayaat a pannakamantener ti Kingdom Hall ken bimmilib idi naammuanna ti maipapan iti maintenance program, ta ikagkagumaan dagiti Saksi a pasayaaten ti pasdek uray nasayaaten ti kondisionna. Ti babai ket maysa a mannurat iti diario ti ilida. Idi agangay, naireport iti dayta a diario ti nasayaat a pannakamantener ti Kingdom Hall. Kuna ti artikulo iti udina, “Maragsakankami . . . nga adda Kingdom Hall iti lugartayo.”

Mabirokam dagiti Kingdom Hall iti amin a komunidad iti intero a lubong. Maragsakankami a mangawis kenka. Masiguradom a sibabara nga awatendaka.