Nalaka a madandanagan dagiti tattao a nakaro ti sakitna, ken masansan a kumaro ti panagdanagda no masapul a mayospitalda. Gapuna, naireport iti maysa a pagbasaan para kadagiti espesialista iti salun-at nga “ipakita dagiti panagadal a nakapatpateg iti salun-at dagiti pasiente no maipaay ti emosional ken naespirituan a kasapulanda.” *

Tapno maited dagita a kasapulan, mangipapaay dagiti Saksi ni Jehova iti liwliwa manipud iti Biblia ken praktikal a tulong kadagiti nayospital a padada a Saksi. Dagiti panglakayen ti mangyun-una iti pannakabisita dagiti agsaksakit a kakongregasionda. Ngem kasanon no masapul a maagasan ti maysa a Saksi iti ospital nga adayo iti pagtaenganda? Kadagiti dadakkel a siudad iti intero a lubong, nangorganisar dagiti Saksi ni Jehova kadagiti Patient Visitation Group (PVG). Dagiti panglakayen a karaman kadagitoy a grupo ket regular a bumisbisita kadagiti ospital tapno tulonganda dagiti pasiente a Saksi ken dagiti pamiliada a naggapu iti sabali a paset ti pagilian, wenno uray kadagiti naggapu iti sabali a pagilian. Nasurok a 28,000 a boluntario ti karaman iti agarup 1,900 a PVG iti innem a kontinente. *

Kuna ni William, a miembro ti PVG: “Naliwliwa dagiti Saksi ken dagiti saan a Saksi a kapamiliada babaen laeng ti kaaddak sadiay a makisarita ken dumngeg kadakuada. Ipaspasiguradok kadakuada nga ammo ni Jehova a Dios ti situasionda ken ipatpategna ida. Ap-apresiaren dagiti pasiente ken dagiti kapamiliada no maikararaganda.”

Adu ti nangibaga iti apresasionda iti naawatda a pammaregta kadagiti ibibisita ti PVG. Dagitoy ti sumagmamano a pagarigan manipud iti United States, nga agarup 7,000 a miembro ti PVG ti mangbisbisita kadagiti pasiente.

• Imbaga ni Priscilla: “Pagyamanan iti panangbisitayo ken Tatang iti ospital idi naistrok. Natukay ti pusona iti ibibisitayo! Nasdaaw ta adda gayam ti kasta a probision. Panagkunak, nakatulong ti ibibisitayo iti napartak a panagimbagna.”

• Ni Ophilia, nga anak ti natay a pasiente, imbagana iti pannakabagi ti PVG: “Ap-apresiaren unay ni Mommy ti ibibisitayo! Ammona nga imbaonnakayo ni Jehova. Pagyamanan iti pannakaseknanyo.”

• Maladladingitan ken madandanagan ti maysa a pasiente idi naammuanna a sumagmamano laengen nga aldaw ti panagbiagna. Nakikadua kenkuana ni James, a miembro ti PVG, ken nangipaay iti makaliwliwa a teksto ti Biblia a mabasa iti Filipos 4:6, 7. Imbaga ni James: “Idi binisitak iti simmaruno nga aldaw, dakkel ti nagbalbaliwan ti kababalinna. Uray no nataninganen, positibo itan a tulongan ni Jehova, ket talaga a siak ti naparegta!”

Insurat ni Pauline, a natay ni lakayna iti ospital nga adayo iti pagtaenganda: “Agyamanak unay iti tulongyo bayat ti karirigatan a tiempo para iti pamiliami. Makaliwliwa ti pannakaammo nga umaydakami kitaen iti ospital iti tengnga ti rabii uray no agtrabahokayo pay kabigatanna. Pagyamanan ta nangyurnoskayo iti pagturoganmi amin nga 11 ken ti kanayon a panangkomustayo kadakami. Agyamanak ken Jehova ken iti organisasionna iti panangipaay iti kasta a tulong tapno maliwliwakami.”

Nairaman da Nicki, Gayle, ken Robin iti aksidente ti lugan a napasamak agarup 300 a kilometro (200 mi) manipud iti pagtaenganda. Napakaammuan ni Carlos, a miembro ti PVG, ket napanna kinita ida iti ospital a nakaitarayanda. Kinuna ni Carlos, “Imbagak a tulongak ida iti aniaman a kasapulanda. Inaywanak ti bassit nga aso ni Nicki tapno makastrek ni Nicki iti ospital ket maagasan.” Kalpasanna, simmangpet met ti sabali pay a miembro ti PVG, a ni Curtis, ken ni baketna. Nagtalinaedda iti ospital agingga a simmangpet dagiti kapamilia dagiti pasiente kalpasan ti sumagmamano nga oras. Kinuna ti maysa a gayyem ti pamilia: “Naliwliwa dagiti tallo iti pannakaasikasoda. Ket ti kabsat ni Nicki a ni Robin, a saan a Saksi ni Jehova, ket masmasdaaw iti tulong nga impaay dagiti miembro ti PVG.”