Dagiti tattao iti sadinoman ket matultulongan ti jw.org. Dagiti sumaganad ket sumagmamano laeng iti adu nga ebkas ti apresasion a naipatulod iti sangalubongan a hedkuarter dagiti Saksi ni Jehova agingga idi Mayo 2014.

“Ti ages-eskuela a bassit pay nga anakko ket mangyawid no kua kadagiti lapis, babassit nga ay-ayam, ken anteohos pay ketdi dagiti gagayyemna. Namin-adun nga inlawlawagmi a panagtakaw ti ar-aramidenna ken dakes dayta. Saannakami nga ipangpangag agingga nga in-download-mi ti video a Dakes ti Agtakaw iti jw.org. Nagdakkel ti naitulongna ken dayta ti eksakto a kasapulan ti anakmi. Idi nabuyana, imbagana a kayatnan nga isubli amin nga inyawidna ta kombinsidon nga iti imatang ti Dios, dakes ti agtakaw. Talaga a natulongannakami daytoy a website!”​—D. N., Africa.

“Magusgustuan dagiti annakmi ti website. Ida-download-da dagiti animated video a makatulong kadakuada nga ad-adda a mangyaplikar kadagiti prinsipio ti Biblia maipapan iti panagulbod ken panagtakaw. Masursuroda met ti agkakapateg a galad a mausarda iti unos ti panagbiagda isu a dakkel ti maitulongda iti kagimongan.”​—O. W., West Indies.

“Ibilangko idi a nagrigat ti ageskuela isu a kayatko payen ti sumardeng. Ngem maysa nga aldaw, nabasak ti artikulo nga ‘Isardengko Kadin ti Ageskuela?’ iti website a jw.org. Impaawatna nga adda maitulong kaniak ti panageskuela. Naammuak a no ageskuelaak, masanayak para iti masanguanan ken matulongannak nga agbalin a responsable.”​—N. F., Africa.

“Dagiti balakad daytoy a website para kadagiti agtutubo ti nangisuro kaniak no kasanok a pagtalinaeden dagiti nasayaat nga ugalik iti eskuelaan. Nasursurok nga ipasnek ti panagadalko ken liklikan dagiti pakasingaan.”​—G., Africa.

“Inyestoria ti katrabahuak a mabul-bully ti anakna a babai idiay eskuelaan. Padana met la a babai ti kangrunaan a mangar-aramid iti dayta. Saan a nasayaat ti epekto dayta iti anakna nga uray la dina kayaten ti mapan ageskuela iti sumagmamano nga aldaw ta mabutbuteng unay. Inlawlawagko kenkuana ti sumagmamano a punto ti whiteboard animation a Maparmekmo ti Bully Uray Dika Lumaban, a mabuya iti jw.org. Nagustuanna unay ti balakad nga agpakatawa tapno mabaliwan ti taray ti saritaan. Sinuruanna ti anakna no kasano ti panangsango iti bully. Nagbanaganna, naturtureden ti anakna no mapan ageskuela. Idi agangay, simmayaat ti situasion ken nagbalin payen a mannakigayyem ti mangbul-bully kenkuana.”​—V. K., Eastern Europe.

“Pagyamanan iti artikulo a napauluan iti ‘Apay a Sugsugatek ti Bagik?’ a mabasa iti jw.org. Nabayagen a problemak dayta. Impagarupko no sisiak ti kasta ket no ibagak iti sabsabali, didak maawatan. Talaga a nakatulong kaniak dagiti pagarigan iti artikulo. Adda met laengen makaawat kaniak!”​—Agtutubo a babai a taga-Australia.

“Gapu iti jw.org, nalaklaka a makagun-odak iti tulong maipapan kadagiti problema a mangap-apektar kadagiti agtutubo. Adda artikulo a nangnangruna a nakatulong kaniak a mangilasin kadagiti kita ti panangbastos isu a naamirisko a biktimaak gayam idi iti kasta. Ita, ammokon dagiti umiso a pamay-an a mangsango iti dayta.”​—T. W., West Indies.

“Nakaal-alikuteg ti tin-edyer nga anakko. Masansan a marigatanak unay gapu iti agbaliwbaliw ken di maispeling a kababalinna. Gapu iti dayta, marigatankami nga agtungtong. Maysa nga aldaw, linuktak ti jw.org iti seksion a para kadagiti agassawa ken nagannak. Nagadu nga artikulo ti nakitak a makatulong iti situasionko ken nangisuro kaniak no kasanok a kasarita ti anakko. Nabenepisiaran met isuna iti jw.org. Ibagbaganan kaniak ti riknana agraman dagiti pakaragsakan ken pakadanaganna.”​—C. B., Africa.

“Para kadakami a nagannak, tultulongannakami ti jw.org tapno naragsak ti panangisuromi kadagiti annakmi. Kas pagarigan, ti whiteboard animation maipapan iti panangbirok iti pudno a gayyem ti nakatulong kadakuada a maaddaan iti umiso a pannakaawat maipapan iti pannakigayyem ken no kasano a makigayyemda kadagidiay nasayaat ti impluensiana kadakuada. Masansan a naintiempuan ti kaadda ti maysa nga artikulo iti jw.org a makatulong kadakami a mangsolbar iti problema dagiti annakmi. Naglaon dayta iti nagadu a balakad.”​—E. L., Europe.

“Innem a tawenen sipud idi nagkallaysakami ken baketko. Kas iti dadduma nga agassawa, marigatankami a pagtunosen ti agduma nga estilo ti pannakisaritami, dimmakkelanmi a pamilia, ken kapanunotanmi kadagiti bambanag. Iti jw.org, nagustuak ti artikulo a napauluan iti ‘No Kasano ti Dumngeg a Naimbag.’ Praktikal ti balakadna maipapan iti panangpasayaat iti abilidad a dumngeg. Binasak dayta sa impabasak met ken baketko. Inkagumaanmi nga iyaplikar dagiti makatulong a singasingna.”​—B. B., West Indies.

“Makatawenen a makitimtimpuyogak kadagiti Saksi ni Jehova ket kayatko nga iyebkas ti apresasionko gapu iti website a jw.org. Adu ti nasursurok iti dayta a site, agraman ti panangkontrolko iti kinamanagpungpungtotko ken no kasano nga agbalinak a nasayaat nga asawa ken ama. Talaga a maikunak a gapu iti jw.org, nasalbar ti relasionmi nga agassawa.”​—L. G., West Indies.

“Gimmanaygayak manen gapu iti jw.org. Limmaingak nga agsenias babaen kadagiti video iti American Sign Language. Panagriknak idi a diak makaaramid kadagiti makapnek a kalat iti biag. Ngem idi nabuyak ti video a Seeing God’s Word in My Language, rimmagsakak ken bimmileg ti determinasionko a kanayon a mangpanunot kadagiti positibo a banag.”​—J. N., Africa.

“Talaga a nagpateg ti jw.org. Maysaak a boluntario a tumultulong kadagiti umel, nangruna kadagiti agtutubo nga umel. Gapu iti adu ken nadumaduma a reperensia iti sign language, limmaingak nga agsenias. Tinulongannak ti website a mangasistir kadagidiay kayatda a pasayaaten ti relasionda iti pamilia ken gagayyemda.”​—K. J., West Indies.

“Maysaak a bulsek a natulongan ti jw.org. Ipapaayannak kadagiti impormasion nga adu pay a bulan ti mapalabas sakbay a maawatko no maipatulod iti koreo. Pinasayaat dayta a website ti biag ti pamiliak ken pinagbalinnak a makatulong a miembro ti komunidad. Gapu iti dayta, kagiddankon dagiti makakita a gagayyemko nga umawat iti impormasion.”​—C. A., South America.

“Para kadagidiay saan a makabasa iti Braille wenno awan umdas a kuartada a paggatang kadagiti libro a Braille, talaga a maysa a gameng ti jw.org. Babaen kadagiti makaisuro nga audio recording-na, mangngegan dagiti bulsek dagiti kabaruan nga impormasion maipapan iti nadumaduma a topiko. Nadisenio dayta a site para iti amin a kita ti tao. Iparpariknana kadakami a bulsek nga adda serbimi ken pasetkami iti kagimongan.”​—R. D., Africa.

“Naiduma ti website-yo iti dadduma a narelihiosuan a site ta saan a napno kadagiti narelihiosuan a termino ken sasao a maawatan laeng ti padi. Dinaka met gabsuonan iti nagadu nga impormasion nga uray la matikawka. Simple ken direkta ti website-yo. Nalawag dayta ken saan a napno iti pilosopia. Dina pagparangen a komplikado ti pammati. Imbes ketdi, isursurona a kabaelan uray ti ordinario a tao ti maaddaan iti pammati.”​—A. G., Asia.

“Nakapimpiman! Kasta ti biagko no awan ti jw.org. Iti lubong nga adda iti naespirituan a kinasipnget, daytoy a website ket kas iti bombilia a mabalinko a gangtan a dagus. Insigida a makitak ken mangngegak dagiti artikulo a mangilawlawag iti panangmatmat ti Dios kadagiti bambanag ken maammuak dagiti sungbat ti adu a saludsodko iti biag.”​—J. C. , West Indies.

“Apresiarek amin a naawatko a naespirituan a tulong ditoy mismo a tengnga ti kabakiran iti South America. No awan daytoy a website, awan direksion ti biagko.”​—M. F., South America.