Idi 2016, naikkan iti pribilehio dagiti Saksi ni Jehova a mangidemostra iti pagimbagan dagiti video ken artikulo iti website a jw.org iti edukasion iti grupo dagiti mannursuro iti Probinsia ti Zamboanga del Norte iti Pilipinas. Sakbay dayta, bimmisita dagiti Saksi iti Department of Education ti probinsia nga adda iti kabeserana a Dipolog City. Dagiti administrador ket nagbilib iti jw.org isu nga inawisda dagiti Saksi a mangiparang iti 30 a minuto a presentasion iti maangay a tallo a seminar para kadagiti mannursuro iti nagduduma a munisipalidad ti Zamboanga del Norte.

Nangipakita dagiti Saksi kadagiti napili a video ken artikulo iti website iti 300 a mannursuro nga immatender iti tunggal seminar. Nagusgustuan dagiti immatender ti topiko a “Ti Umiso nga Aramidem No Adda Utangmo.” Adu a mannursuro ti nangibaga a saan laeng a dagiti estudiante ti matulongan ti presentasion no di ket uray pay dagiti mannursuro. Inawat ti amin ti tract a Pakasarakantayo Kadagiti Sungbat iti Napapateg a Saludsod iti Biag? a mangipakita iti adu a makapainteres ken makatulong nga impormasion a magun-odan iti jw.org. Adda met dagiti mannursuro a nag-download kadagiti video iti website.

Naballigi ti tallo a presentasion isu nga inyurnos ti Department of Education iti probinsia dagiti kanayonan a presentasion a makatulong iti agarup 600 a guidance counselor ken dadduma pay a mannursuro. Adu manen ti nangyebkas iti apresasionda.

Adda dagiti immatender a nangilawlawag idi agangay no kasano a nakatulong kadakuada dagiti presentasion ken ti website. “Agyamanak unay,” kuna ti maysa a mannursuro. “Nakitak a makatulong ti site iti panangisurok kadagiti estudiantek.” Inamin met ti maysa a mannursuro: “Nagadu ti masursurok, nangruna ti panangsango iti stress. Nagdakkel ti maitulong ti website saan laeng a kadagiti agtutubo no di ket uray pay kadagiti tumataenganen.”

Nasurok a 350 a mannursuro nga immatender kadagiti presentasion iti jw.org ti dimmawat iti ad-adu pay nga impormasion. Gapuna, inikkan ida dagiti Saksi kadagiti kanayonan a literatura ken makatulong a balakad manipud iti Biblia.

Naragragsakan dagiti Saksi ni Jehova ta nasurok a 1,000 a mannursuro ti immatender kadagiti presentasion iti jw.org iti Zamboanga del Norte ken nasursuroda no kasano a ti website a jw.org ket nabileg a katulongan iti panangisuro. Daytoy a napateg nga alikamen iti panangisuro ket makatulong kadagiti mannursuro iti intero a lubong ta mangipaay daytoy iti aglaplapusanan a giya iti wagas ti panagbiag, iti moral, ken iti naespirituan. *