Siam a Saksi ni Jehova idiay Australia ti napadayawan kadagiti sertipiko kas panangapresiar iti panangipaayda iti “nagsayaat a serbisio” kadagiti balud iti maysa kadagiti kadakkelan nga immigration detention center iti Australia. Ti pammadayaw kadagiti Saksi ket impaay ti Curtin Immigration Detention Centre iti asideg ti Derby, Western Australia. *

Kada lawas, dagiti balud ket sarsarungkaran dagiti Saksi tapno denggenda dagiti kapadasan dagiti nasao a balud ken ipakaammoda kadakuada ti makaliwliwa ken mangted-namnama a mensahe ti Biblia. “Dagus a makita ti epekto ti isasarungkar dagiti Saksi kadagiti balud,” kinuna ni Christopher Riddoch, ti liaison officer iti tay-ak ti relihion ken kultura iti nadakamat a center. Sigun kenkuana, simmayaat ti karirikna dagiti balud ken naragragsakda kalpasan ti isasarungkar dagiti tattao a bigbigenna “nga interesado unay a sumayaat ti kasasaad dagiti balud.”

Imbaga pay ni Mr. Riddoch a ti sertipiko a naited kadagiti Saksi ket simple la pamay-an ti panagyaman gapu iti nasaona a “panangpasayaatda iti biag dagiti balud nga adda iti aywanmi.” Kinunana a dagiti Saksi ket “pakaidayawan dagiti pamiliada, kongregasion, ken karelihionanda.”