Idi Hulio 2 agingga iti 24, 2016, madandanagan pay laeng dagiti tattao idi naisayangkat ti maika-103 a Tour de France, ti sikat a lumba ti bisikleta iti lubong. Ngamin, iti tawen sakbayna, nasurok a 100 ti natay iti panagatake dagiti terorista iti France. Ken bayat ti maysa a nailian a selebrasion idi Hulio 14, 2016, nagmaneho iti trak ti maysa a terorista sana dinungpar dagiti tattao nga agbuybuya iti fireworks iti siudad ti Nice. Adda 86 a natay ken adu ti nasugatan.

Bayat a mabutbuteng ken agladladingit dagiti tattao, magagaran dagiti Saksi ni Jehova a mangted iti namnama ken mangliwliwa kadagiti napabutngan nga umili ti France. Gapuna, nangipuesto dagiti Saksi kadagiti cart nga addaan publikasion kadagiti ruta ti Tour de France. Nasurok a 1,400 a Saksi ti nagboluntario a makiraman, ket nakaipaimada iti nasurok 2,000 a publikasion a naibatay iti Biblia kadagiti tattao nga agbirbirok iti sungbat kadagiti kapatgan a saludsod iti biag.

Dagiti agbuybuya a fans a sumursurot kadagiti lumulumba—iti kada ili a paset ti ruta—ket masmasdaaw a makakita kadagiti Saksi iti nagadu a lokasion. Dagiti mangimanmanehar iti Tour de France namin-adu a pinadayawanda dagiti Saksi gapu iti nasayaat a pannakaorganisar ti trabahoda. Kunada: “Kasla addakayo iti amin a pagdalanan ti lumba!” Imbaga ti adu nga agbuybuya: “Adda met dagiti Saksi ni Jehova ditoy!” Gapu ta sumagmamano nga aldawen nga agbuybuya iti lumba ti maysa a drayber, sidadayaw a saanna nga inawat idi ikkanda iti tract. Imbagana nga adda uppat a tract a naiteden kenkuana!

Nagusioso ti dadduma ta kanayon nga adda dagiti Saksi, isu nga iti umuna a gundaway, nangalada iti publikasion kadagiti cart. Kasta ti napasamak iti maysa nga empleado ti television sports network a nakalagip a nakitana dagiti Saksi iti Tour de France idi napan a tawen. Ita a tawen, nagdesision a mapan iti cart ket innalana ti libro a Ti Sekreto ti Kinaragsak iti Pamilia gapu ta naglaon daytoy iti topiko a napateg kenkuana. Idi nabasana ti sumagmamano a panid ti libro iti luganna, imbagana kadagiti kakaduana ti maipapan iti cart, ket nangalada met iti publikasion maipapan iti nagduduma a topiko.

Dadduma a napan nagbuya binirokda dagiti Saksi ni Jehova ken imbagada dagiti problemada. Imbaga ti maysa nga agtutubo a babai a naawanan idi iti namnama ket planona payen ti agpakamatay iti dayta met la nga aldaw babaen ti panagpadungpar iti tren. Ngem idi naammuanna ti makapalag-an rikna a mensahe, nga adda natalna a masanguanan inton agturay ti Pagarian ti Dios, naliwliwa ken nagdesision a saanen nga agpakamatay. Imbaga pay ti maysa a babai kadagiti Saksi: “Itultuloyyo ti nasayaat a trabahoyo!”

Inamin ti maysa a lalaki a nakasaklay a managsuspetsa isuna kadagiti estranghero, ngem inawatna ti tulong ti maysa a babai a desente ti badona idi naammuanna a maysa a Saksi ni Jehova. Kinunana: “Agyamanak ta nakais-isemkayo ken desente ti panagbadbadoyo. Agtalek dagiti tattao a makakitkita kadakayo.”