Di umiso: Saan nga agselselebrar dagiti Saksi ni Jehova iti Easter gapu ta saanda a Kristiano.

 Umiso: Mamatikami a ni Jesu-Kristo ti Manangisalakan kadatayo, ken ar-aramidenmi ti amin a kabaelanmi a ‘mangsurot a sisisinged kadagiti addangna.’—1 Pedro 2:21; Lucas 2:11.

 Di umiso: Saankayo a mamati a napagungar ni Jesus.

 Umiso: Mamatikami a nagungar ni Jesus; bigbigenmi a napateg daytoy iti pammati dagiti Kristiano ken ipagpaganetgetmi daytoy iti panangaskasabami.—1 Corinto 15:3, 4, 12-15.

 Di umiso: Saankayo a maseknan kadagiti annakyo ta maikapkapisda iti ragsak ti panangselebrar iti Easter.

 Umiso: Ay-ayatenmi dagiti annakmi—ikagkagumaanmi a sanayen ken tulongan ida nga agbalin a naragsak.—Tito 2:4.

•   Saan a naibatay iti Biblia ti Easter.

•   Imbilin ni Jesus a laglagipentayo ti ipapatayna, saan a ti panagungarna. Tinawen a selselebraranmi daytoy, nga aw-awaganmi iti Memorial, kas panglaglagip iti anibersario iti ipapatayna sigun iti lunar a kalendario iti Biblia.—Lucas 22:19, 20.

•   Patienmi a ti nagtaudan dagiti kustombre iti Easter ket naibatay iti nagkauna a ritual dagiti agdaydayaw iti diosa ti kinabunga, isu a saan nga anamongan daytoy ti Dios. Kalkalikaguman ti Dios ti “naipamaysa a debosion,” ken saanna a kayat ti panagdaydayaw a nalaokan kadagiti aramid a dina anamongan.—Exodo 20:5; 1 Ar-ari 18:21.

 Patienmi a ti desisionmi a saan a mangselebrar iti Easter ket naibatay iti Biblia, a mangiparparegta iti panangusar iti “praktikal a kinasirib ken ti pannakabael nga agpanunot” imbes a surotenmi lattan dagiti tradision ti tao. (Proverbio 3:21; Mateo 15:3) Nupay ilawlawagmi dagiti patpatienmi maipapan iti Easter no adda agsaludsod, raraemenmi ti desision dagiti tattao a mayat a mangselebrar iti dayta.—1 Pedro 3:15.