Resrespetuen dagiti Saksi ni Jehova dagiti gobierno ken dagiti simbolo dagita. Respetuenmi met no pilien ti dadduma ti agsapata iti nasion, bandera, wenno mangkanta iti kanta ti pagilian.

 Ngem saan a makipartisipar dagiti Saksi ni Jehova kadagiti kasta a seremonia ta patienmi a maikontra dagita kadagiti sursuro ti Biblia. Apresiarenmi no respetuen ti dadduma dagiti patpatienmi no kasano a resrespetuenmi met dagiti patpatienda.

Iti daytoy nga artikulo

•  Ania ti isursuro ti Biblia maipapan iti daytoy?

•  Kasanon no kiddawen ti linteg a makipasetkami?

•  Adda kadi ilablaban dagiti Saksi ni Jehova a sosial wenno politikal nga isyu?

 Dagitoy ti dua nga isursuro ti Biblia no apay a kasta ti desisionmi:

•   Ti Dios laeng ti maikari a daydayawenmi. Kuna ti Biblia: “Ni laeng Jehova a Diosmo ti masapul a pagdayawam, ket isu laeng ti masapul a pangipaayam iti sagrado a panagserbi.” (Lucas 4:8) Dagiti sapata iti pagilian ken kanta ti pagilian ket masansan a naglaon kadagiti kari nga ad-adda nga ayatem ti pagilian ngem iti aniaman. Isu a saan nga ipalubos ti konsiensia dagiti Saksi ni Jehova a makipasetda kadagiti kasta a seremonia.

   Patien met dagiti Saksi ni Jehova a ti panagsaludo iti bandera ket maysa a panagdaydayaw, wenno idolatria, nga iparit ti Biblia. (1 Corinto 10:14) Bigbigen ti dadduma a historiador a dagiti bandera ti nasion ket maibilang a narelihiosuan a simbolo. “Ti nasionalismo ket kas iti maysa a relihion a ti kangrunaan a simbolo ken mausar iti panagdaydayaw iti dayta ket ti bandera,” insurat ti historiador a ni Carlton J. H. Hayes. a Maipapan kadagiti nagkauna a Kristiano, insurat ti autor a ni Daniel P. Mannix: “Agkedked dagiti Kristiano . . . nga agdaton kadagiti anghel de la guardia dagiti [Romano] nga emperador—a kapada dayta ita iti panagkedked nga agsaludo iti bandera.” b

  Agpayso a saan nga agsalsaludo iti bandera dagiti Saksi ni Jehova. Ngem saanmi a suratsuratan dayta, puoran, wenno mangaramid iti aniaman a mangipakita a saanmi a resrespetuen dayta wenno ti aniaman a simbolo ti nasion.

•   Patas ti amin a tao iti sanguanan ti Dios. (Aramid 10:34, 35) Kuna ti Biblia a ti Dios “inaramidna ti tunggal nasion dagiti tattao manipud iti maysa a tao.” (Aramid 17:26) Gapu iti dayta, patien dagiti Saksi ni Jehova a di umiso nga idaydayaw ti aniaman a puli wenno nasionalidad. Padpadayawanmi ti amin a tattao, aniaman ti nagtaudanda a lugar wenno paggigiananda.—1 Pedro 2:17.

 Saan a kontra iti gobierno dagiti Saksi ni Jehova. Patienmi a dagiti gobierno ket paset ti “urnos ti Dios” nga impalubosna nga agturay. (Roma 13:1-7) Patienmi met a masapul nga agtulnog dagiti Kristiano kadagiti sekular nga autoridad.—Lucas 20:25.

 Kasanon no agkontra ti linteg ti gobierno ken dagiti linteg ti Dios? Iti dadduma a kaso, posible a kiddawenmi iti gobierno a mai-adjust dagiti linteg. c No saan a posible dayta, sirerespeto a pilien dagiti Saksi ni Jehova ti ‘agtulnog iti Dios kas agturay imbes a kadagiti tattao.’—Aramid 5:29.

 Awan. Awan ti supsuportaran dagiti Saksi ni Jehova a sosial wenno politikal nga isyu. No agkedkedkami nga agsapata iti nasion, agsaludo iti bandera, wenno mangkanta iti kanta ti pagilian, saan a gapu ta kumonkontrakami iti gobierno wenno aktibistakami. Imbes ketdi, sursurotenmi dagiti naibatay iti Biblia a patpatienmi maipapan kadagitoy a seremonia.