Saan nga agselselebrar iti birthday dagiti Saksi ni Jehova gapu ta mamatikami a kagura ti Dios ti kasta a selebrasion. Saan a direkta nga iparit ti Biblia ti panangselebrar iti birthday ngem makatulong dayta tapno maawatantayo ti kaipapanan dagiti kangrunaan nga impormasion maipapan iti birthday ken tapno matarusantayo ti panangmatmat ti Dios iti daytoy a selebrasion. Usigem ti uppat kadagita ken dagiti nainaig a prinsipio ti Biblia.

1.   Pagano ti nagtaudan ti panangselebrar iti birthday. Sigun iti Funk & Wagnalls Standard Dictionary of Folklore, Mythology, and Legend, daytoy a selebrasion ket nagtaud iti pammati nga iti birthday ti maysa a tao, “mabalin a madangran ti ag-birthday gapu kadagiti dakes nga espiritu ken impluensia” ket “agserbi a proteksion ti kaadda dagiti gagayyem ken ti panangkablaawda kenkuana.” Kuna ti libro a The Lore of Birthdays nga idi un-unana, ti panangirekord iti birthday ket “napateg iti panagaramid iti horoscope” a naibatay iti “siensia ti astrolohia.” Innayon pay daytoy a libro a “sigun iti patpatien dagiti nagkauna a tattao, dagiti kano kandela ket addaan iti naisangsangayan a magic a mangtungpal kadagiti kiddaw.”

    Ngem kondenaren ti Biblia ti panagusar iti magic, panagipadles (panangibaga iti mapasamak iti masanguanan babaen ti karkarna a pamay-an), espiritismo, wenno ‘aniaman a kas iti daytoy.’ (Deuteronomio 18:14; Galacia 5:​19-​21) Kinapudnona, ti maysa a rason a kinondenar ti Dios ti nagkauna a Babilonia ket gapu iti aramid dagiti umili a mainaig iti astrolohia a maysa a kita ti panagipadles. (Isaias 47:11-​15) Saan a nakapokus dagiti Saksi ni Jehova iti panangammo iti nagtaudan ti tunggal kostumbre; ngem no mangipaay ti Biblia iti kasta a nalawag nga instruksion, saanmi a tagtagilag-anen dagita.

2.   Saan a nagselebrar iti birthday dagiti nagkauna a Kristiano. Kuna ti The World Book Encyclopedia nga “imbilangda a pinapagano ti panangselebrar iti birthday ti asinoman.” Ipakita ti Biblia a dagiti apostol ken dadduma pay a direkta a sinursuruan ni Jesus ket nangipasdek iti pagtuladan a rumbeng a suroten ti amin a Kristiano.—2 Tesalonica 3:6.

3.   Ti laeng pasamak a manamnama a selebraran dagiti Kristiano ket saan a ti pannakaiyanak no di ket ti ipapatay ni Jesus. (Lucas 22:17-​20) Saantayo a pagsiddaawan daytoy ta kuna ti Biblia a ‘nasaysayaat ti aldaw ti ipapatay ti maysa ngem iti aldaw ti pannakayanakna.’ (Eclesiastes 7:1) Idi nagngudo ti biagna ditoy daga, nakaaramid ni Jesus iti naimbag a nagan iti imatang ti Dios, a namagbalin iti aldaw ti ipapatayna a napatpateg ngem iti aldaw ti pannakayanakna.—Hebreo 1:4.

4.   Awan mabasa iti Biblia nga adipen ti Dios a nangselebrar iti birthday. Saan a gapu ta nalipatan la a nairekord dayta. Ngamin adda dua a birthday a nairekord iti Biblia a sinelebraran dagiti saan nga agserserbi iti Dios. Ngem agpada a saan a nasayaat ti pakasaritaan dagita a selebrasion.—Genesis 40:20-​22; Marcos 6:​21-​29.

 Kas iti amin a nasingpet a nagannak, iparparikna dagiti Saksi ti ayat kadagiti annakda iti intero a tawen, kas iti panangtedda iti regalo ken panangyurnosda kadagiti makaparagsak a panaglalangen wenno gathering. Ikagkagumaanda a tuladen ti nagsayaat nga ulidan ti Dios, a kanayon a mangmangted kadagiti naimbag a banag kadagiti annakna. (Mateo 7:​11) Saan a marikna ti annak dagiti Saksi a maikapkapisda kas ipakita dagitoy a komento:

•   “Naragragsakka no makaawatka iti regalo a dimo ninamnama.”—Tammy, 12 anyos.

•   “Uray no awan agregalo kaniak no bertdeyk, adda no kua latta gundaway a regaluandak da nanang ken tatangko. Magusgustuak ti kasta ta masorpresaak.”—Gregory, 11 anyos.

•   “Party kadi kenkan ti sangapulo minuto, ken no adda cupcake, ken kanta? Umayka ‘diay balay tapno makitam ti agpaypayso a party!”—Eric, 6 anyos.