Gagangay a simple ken nadayaw ti seremonia ti kasar dagiti Saksi ni Jehova ken adda ababa a palawag a naibatay iti Biblia. Kalpasan ti seremonia, mabalin nga adda panagpapangan. a Immatender idi ni Jesus iti kasar iti siudad ti Cana idi rugrugi ti ministeriona.—Juan 2:1-11.

•  Ania ti maar-aramid iti seremonia ti kasar?

•  Pakaang-angayan ti kasar dagiti Saksi ni Jehova?

•  Siasino dagiti mabalin nga umatender?

•  Ania a klase ti bado ti mabalin nga usaren dagiti umatender?

•  Mabalin kadi ti agregalo?

•  Mabalin kadi ti ag-toast?

•  Mabalin kadi ti agipuruak iti bagas wenno confetti?

•  Adda kadi maidasar a makan ken mainum?

•  Adda kadi musika wenno panagsasala?

•  Agselselebrar kadi dagiti Saksi ni Jehova iti anibersario ti kasar?

 Ti kapatgan a paset ti kasar ket ti palawag nga agpaut iti 30 a minuto nga iparang ti maysa a ministro dagiti Saksi ni Jehova. Ipaganetget ti makaparegta a palawag no kasano a makatulong ti Biblia kadagiti agassawa tapno manayon ken naragsak ti panagasawada ken saan a bumaaw ti ayatda.—Efeso 5:33.

 Iti adu a pagilian, ipalubos ti gobierno a mangkasar dagiti ministro dagiti Saksi ni Jehova. Iti ngudo ti palawag, agkinnari ti nobio ken ti nobia. Mabalinda met nga ikkan iti singsing ti maysa ken maysa. Kalpasanna ideklara ti ministro nga agassawadan.

 Iti dadduma a pagilian, ikalikagum ti linteg a ti agnobio ket kasaren ti maysa nga opisial ti gobierno. Aramidenda dayta sakbay unay ti palawag ti kasar. No saan a nagkinnari ti agnobio bayat ti panangkasar kadakuada ti maysa nga opisial ti gobierno, aramidenda dayta kalpasan ti palawag ti kasar. Ngem no nakapagkinnaridan, mabalinda nga uliten dayta ngem ibagada iti porma a napalabasen (past tense). Agngudo ti palawag babaen ti kararag tapno dawatenda ti pamendision ti Dios kadagiti kakaskasar.

 Kaykayat ti adu a Saksi ti agkasar iti Kingdom Hall no posible. b No adda panagpapangan kalpasan ti kasar, aramidenda dayta iti sabali a lugar.

 No maaramid ti kasar iti Kingdom Hall, mabalin nga umatender ti asinoman, Saksi man wenno saan. No adda inyurnos ti kakaskasar a panagpapangan, isuda ti mangpili iti imbitaranda.

 Uray awan ti espesipiko a klase ti bado nga isuot dagiti umatender iti Kingdom Hall, ikagkagumaan dagiti Saksi ni Jehova a suroten ti balakad ti Biblia nga agbadoda iti naemma ken nadayaw. Maapresiarda no kasta met ti aramiden ti dadduma. (1 Timoteo 2:9) Siempre, agaplikar met laeng dayta a prinsipio iti lugar a pakaaramidan ti panagpapangan, no adda man.

 Iparparegta ti Biblia ti panagbalin a naparabur. (Salmo 37:21) Naragsak dagiti Saksi ni Jehova a mangted ken umawat kadagiti regalo iti kasar. (Lucas 6:38) Ngem saan a dumawdawat dagiti Saksi kadagiti regalo ken saanda nga iyanunsio iti publiko ti nagan dagiti nagregalo. (Mateo 6:3, 4; 2 Corinto 9:7; 1 Pedro 3:8) Saan a maitunos dayta iti Biblia ken mabalin a mabainan dagiti umatender.

 Saan. Gapu ta dayta nga aramid ket nagtaud iti kaugalian ti ulbod a relihion. c Iyeb-ebkas dagiti Saksi ti nasayaat a dawatda para kadagiti kakaskasar ngem saan a babaen ti panag-toast.

 Saan. Iti dadduma a lugar, agipuruak dagiti tattao iti bagas, confetti, wenno kaasping dayta kadagiti kakaskasar. Mamatida a daytoy ti mangted iti suerte, ragsak, ken atiddog a biag kadagiti agassawa. Ngem saan nga ar-aramiden daytoy dagiti Saksi ni Jehova ta naibatay iti inaanito a patpatien. Karaman ditoy ti panagdawat iti suerte a maikontra kadagiti prinsipio ti Biblia.—Isaias 65:11.

 Awan ti makan ken mainum bayat ti seremonia ti kasar iti Kingdom Hall. Adda dagiti agassawa a mangyurnos iti panagpapangan kalpasan ti kasar ket dita a maidasar dagiti makan ken mainum. (Eclesiastes 9:7) No adda idasarda nga arak, siguraduenda a kalkalainganna laeng ken awan ti uminum a menor de edad.—Lucas 21:34; Roma 13:1, 13.

 No mangyurnos dagiti agassawa iti panagpapangan, adda kadakuada no adda musika ken panagsasala. (Eclesiastes 3:4) Mapili a naimbag dagiti musika ngem agdepende iti kayatda ken iti kulturada. Gagangay nga adda musika a naibatay iti Biblia kadagiti seremonia ti kasar iti Kingdom Hall.

 Awan ti mabasa iti Biblia a mangiparit wenno mangipalubos kadagiti anibersario ti kasar. Adda kadagiti agassawa a Saksi no selebraranda dayta wenno saan. No agselebrarda, mabalinda nga aramiden dayta nga is-isuda wenno kadua dagiti gagayyem ken pamiliada.