Kas Saksi ni Jehova, ikagkagumaanmi nga annuroten ti kita ti Kristianidad nga insuro ni Jesus ken sinurot dagiti apostolna. Ilawlawag daytoy nga artikulo dagiti kangrunaan a patpatienmi.

1.   Dios. Daydayawenmi ti maymaysa a pudno ken Mannakabalin-amin a Dios, ti Namarsua, nga agnagan Jehova. (Salmo 83:18; Apocalipsis 4:​11) Isu ti Dios da Abraham, Moises, ken Jesus.​—Exodo 3:6; 32:11; Juan 20:17.

2.   Biblia. Bigbigenmi ti Biblia kas mensahe nga impaltiing ti Dios para kadagiti tattao. (Juan 17:17; 2 Timoteo 3:​16) Naibasar dagiti patpatienmi iti amin nga 66 a libro dayta, a pakairamanan ti “Daan a Tulag” ken ti “Baro a Tulag.” Maitutop ti panangdeskribir ni Professor Jason D. BeDuhn iti panangisuratna a dagiti Saksi ni Jehova “ibatbatayda dagiti patpatien ken al-alagadenda iti talaga nga isursuro ti Biblia, a saanda nga ikeddeng a nasaksakbay no ania ti ipagarupda a kuna ti Biblia.” a

    Nupay akseptarenmi ti intero a Biblia, saankami a pundamentalista, a mangmatmat a literal ti kayulogan ti intero a Biblia. Bigbigenmi nga adda dagiti paset ti Biblia a naisurat a piguratibo wenno simboliko, a saan a literal ti kaipapananna.​—Apocalipsis 1:1.

3.   Jesus. Sursurotenmi dagiti pannursuro ken ulidan ni Jesu-Kristo ken bigbigenmi kas Manangisalakan ken Anak ti Dios. (Mateo 20:28; Aramid 5:​31) Isu a Kristianokami. (Aramid 11:26) Nupay kasta, naadalmi iti Biblia a ni Jesus ket saan a Mannakabalin-amin a Dios ken saan a naibasar iti Biblia ti sursuro a Trinidad.​—Juan 14:28.

4.   Ti Pagarian ti Dios. Daytoy ket pudpudno a gobierno idiay langit, saan ket a kasasaad iti puso dagiti Kristiano. Sukatannanto ti gobierno ti tao ken ibanagna ti panggep ti Dios iti daga. (Daniel 2:​44; Mateo 6:​9, 10) Dandaninan aramiden dagitoy, ta ipakita dagiti padto iti Biblia nga agbibiagtayon iti ‘maudi nga al-aldaw.’​—2 Timoteo 3:​1-5; Mateo 24:​3-​14.

    Ni Jesus ti Ari iti Pagarian ti Dios idiay langit. Nangrugin nga agturay idi 1914.​—Apocalipsis 11:15.

5.   Pannakaisalakan. Nagbalin a posible ti pannakaisalakan manipud basol ken ipapatay gapu iti daton a sakripisio ni Jesus. (Mateo 20:28; Aramid 4:​12) Tapno mabenepisiaran dagiti tattao iti sakripisio, saanda laeng nga ipakita ti pammati ken Jesus no di ket masapul a balbaliwanda pay ti panagbiagda ken agpabautisarda. (Mateo 28:19, 20; Juan 3:​16; Aramid 3:​19, 20) Makita a nabiag ti pammati ti maysa a tao babaen iti ar-aramidna. (Santiago 2:​24, 26) Nupay kasta, saan a mateggedan ti pannakaisalakan. Magun-odan dayta gapu iti “di kaikarian a kinamanangngaasi ti Dios.”​—Galacia 2:​16, 21.

6.   Langit. Ni Jehova a Dios, ni Jesu-Kristo, ken dagiti matalek nga anghel agnanaedda iti naespirituan a lugar. b (Salmo 103:19-​21; Aramid 7:​55) Ti bassit a bilang dagiti tattao, a 144,000, ket mapagungar idiay langit a makipagturay ken Jesus iti Pagarian.​—Daniel 7:​27; 2 Timoteo 2:​12; Apocalipsis 5:​9, 10; 14:​1, 3.

7.   Daga. Pinarsua ti Dios ti daga tapno pagtaengan dagiti tattao iti agnanayon. (Salmo 104:5; 115:16; Eclesiastes 1:4) Dagiti natulnog a tattao ket bendisionanto ti Dios iti perpekto a salun-at ken biag nga agnanayon iti paraiso a daga.​—Salmo 37:11, 34.

8.   Kinadakes ken panagrigrigat. Nangrugi dagitoy idi nagrebelde ti maysa nga anghel ti Dios. (Juan 8:​44) Daytoy nga anghel, a naawagan iti “Satanas” ken “Diablo” kalpasan a nagrebelde, inallukoyna ti umuna a pagassawaan a sumurot kenkuana, ket nagdakes ti epekto dayta kadagiti kaputotanda. (Genesis 3:​1-6; Roma 5:​12) Tapno masungbatan ti isyu a pinataud ni Satanas, impalubos ti Dios ti kinadakes ken panagrigrigat, ngem saanna nga ipalubos nga agtultuloy dagita iti agnanayon.

9.   Ipapatay. Dagiti tattao a matay awandan. (Salmo 146:4; Eclesiastes 9:​5, 10) Saanda a matutuok iti umap-apuy nga impierno.

    Pagungarento ti Dios ti binilion a tattao a natay. (Aramid 24:15) Ngem dagidiay dida kayat ti agpaisuro iti daldalan ti Dios kalpasan a mapagungarda ket madadaelto iti agnanayon. Awanen ti namnamada a mapagungar.​—Apocalipsis 20:14, 15.

10.   Pamilia. An-annurotenmi ti orihinal a pagalagadan ti Dios maipapan iti panagasawa kas panagtipon ti maysa a lalaki ken maysa a babai, a ti seksual nga immoralidad ti kakaisuna a pangibatayan ti diborsio. (Mateo 19:​4-9) Kombinsidokami a makatulong ti sirib a masarakan iti Biblia tapno agballigi dagiti pamilia.​—Efeso 5:22–​6:1.

11.   Ti panagdaydayawmi. Saankami nga agdaydayaw iti krus wenno aniaman nga imahen. (Deuteronomio 4:​15-​19; 1 Juan 5:​21) Dagitoy dagiti kangrunaan a paset ti panagdaydayawmi:

    •   Panagkararag iti Dios.​—Filipos 4:6.

    •   Panagbasa ken panagadal iti Biblia.​—Salmo 1:​1-3.

    •   Panangutob kadagiti naadalmi iti Biblia.​—Salmo 77:12.

    •   Panaggigimong tapno agkararag, agadal iti Biblia, agkanta, pagsasaritaan dagiti naespirituan a bambanag, ken paregtaen dagiti padami a Saksi ken ti dadduma.​—Colosas 3:​16; Hebreo 10:23-​25.

    •   Panangikasaba iti “naimbag a damag ti pagarian.”​—Mateo 24:14.

    •   Panangtulong kadagiti agkasapulan.​—Santiago 2:​14-​17.

    •   Panagibangon ken panangmantener kadagiti Kingdom Hall ken dadduma pay a pasdek a maus-usar para iti pannakaidur-as ti sangalubongan a trabahomi a panangisuro iti Biblia.​—Salmo 127:1.

    •   Pannakiraman iti panangsaranay kadagiti naapektaran iti kalamidad.​—Aramid 11:27-​30.

12.   Ti organisasionmi. Naorganisarkami babaen kadagiti kongregasion, a ti tunggal maysa kadagitoy ket iwanwanwan ti bagi dagiti panglakayen. Nupay kasta, dagiti panglakayen ket saan a buklen ti klase klero wenno papanguluen, ken saanda a masuelsuelduan. (Mateo 10:8; 23:8) Saankami a mangmangted iti apagkapullo, ken awan ti maar-aramid a panagkolekta kadagiti gimongmi. (2 Corinto 9:7) Amin nga aktibidadmi ket supsuportaran dagiti donasion, a saan a nainaganan ti nangted.

     Ti Bagi a Manarawidwid, a bassit a grupo dagiti nataengan iti naespirituan a Kristiano nga agserserbi iti sangalubongan a hedkuartermi, ti mangiwanwanwan kadagiti Saksi ni Jehova iti intero a lubong.​—Mateo 24:45.

13.   Ti panagkaykaysami. Agtutunos ti patpatienmi iti intero a lubong. (1 Corinto 1:​10) Ikagkagumaanmi met a maikkat ti panangidumduma iti puli, tribu, wenno saad ti panagbiag. (Aramid 10:34, 35; Santiago 2:4) Nupay agkaykaysakami, mabalinmi ti mangaramid iti personal a panagpili. Nawaya ti tunggal Saksi a mangaramid iti desisionna maitunos iti nasanay iti Biblia a konsiensiana.​—Roma 14:​1-4; Hebreo 5:​14.

14.   Ti konduktami. Ikagkagumaanmi nga ipakita ti saan a managimbubukodan nga ayat iti amin a tigtignaymi. (Juan 13:34, 35) Likliklikanmi dagiti aramid a kagura ti Dios, a pakairamanan ti saan nga umiso a panangusar iti dara babaen ti panagpayalison iti dayta. (Aramid 15:28, 29; Galacia 5:​19-​21) Mannakikappiakami ken saankami a makiramraman iti gubat. (Mateo 5:9; Isaias 2:4) Raraemenmi ti gobierno iti lugar a pagnanaedanmi ken sursurotenmi dagiti maipatpatungpal a linteg no la ketdi saan a maikontra dagita kadagiti linteg ti Dios.​—Mateo 22:21; Aramid 5:​29.

15.   Ti relasionmi iti sabsabali. Imbilin ni Jesus: “Masapul nga ayatem ti padam a tao a kas iti bagim.” Imbagana pay a dagiti Kristiano “saanda a paset ti lubong.” (Mateo 22:39; Juan 17:16) Isu nga ikagkagumaanmi nga ‘aramiden ti naimbag kadagiti amin,’ ngem agtalinaedkami a neutral iti politika ken likliklikanmi ti makitimpuyog iti sabali a relihion. (Galacia 6:​10; 2 Corinto 6:​14) Nupay kasta, raraemenmi no ania ti pilien ti dadduma maipapan kadagita a banag.​—Roma 14:12.

 No adda pay saludsodmo maipapan kadagiti patpatien dagiti Saksi ni Jehova, mabalinmo a basaen ti ad-adu pay maipapan kadakami iti website-mi, kontaken ti maysa kadagiti opisinami, umatender iti gimongmi iti Kingdom Hall a kaasitgan kenka, wenno makisaritaka iti maysa a Saksi iti lugaryo.