“No talaga a kayatmo a maammuan ti maipapan iti Dios, itultuloymo ti makipagadal kadagiti Saksi ni Jehova.” Nasdaawak iti dayta a komento. Iti dayta a tiempo, nabayag bassiten a makipagad-adalak kadagiti Saksi ni Jehova. Ngem tapno maawatanyo no apay a kasta ti reaksionko, iyestoriak biit ti kapadasak.

 Nayanakak iti Quezaltepeque, a maysa nga ili iti El Salvador. Siak ti maikanem iti 15 nga annak. Pinadakkeldak dagiti nagannakko nga agbalin a napudno ken agtulnog iti linteg. Maysa pay, sagpaminsan nga umay ni Leonardo ken ti dadduma pay a Saksi ni Jehova tapno suruandakami iti Biblia. Ngem saanko nga inkaskaso dagiti naadalko ken nakaaramidak iti adu a di umiso a desision. Idi agtawenak iti 14, inrugik ti uminum iti arak ken agdroga a kadua dagiti gagayyemko iti eskuelaan. Nagsasarunoda a nagsardeng iti eskuelaan tapno makimiembroda iti gang, ket tinuladko ti dakes nga ehemploda. Naggigiankami kadagiti kalsada, pilitenmi dagiti tattao a mangted iti kuarta ken nagtakawkami tapno maitultuloymi ti bisiomi.

 Ti gang ti nagbalin a pamiliak. Mamatiak a masapul a matalekak kadakuada. Kas pagarigan, idi nakadroga ti maysa a kaduak iti gang, kinabilna ti maysa kadagiti kaarrubak. Ngem inabak ti kaarrubak ti gayyemko ken nagayab iti polis. Nakapungtotak ket pinangpang-orko ti lugan ti kaarrubak tapno palubosanna ti gayyemko. Nagpakaasi ti kaarrubak nga isardengkon a buongen dagiti tawa ken dadaelen ti luganna, ngem diak inkankano.

 Idi agtawenakon iti 18, nakilaban ti gang-mi kadagiti polis. Idi ipuruakko koman ti inar-aramidmi a bomba, bimtak dayta iti imak. Diak ammo no kasano a napasamak dayta. Ti laeng malagipko ket ti naderder nga imak ket natalimudawakon. Idi nakapuotak idiay ospital, naammuak a naputed ti kannawan nga imak, saanen a makangngeg ti kannawan a lapayagko, ken dandani nabulsek ti kannawan a matak.

 Uray no kasta ti napasamak, nagsubliak latta iti gang idi nakaruarak iti ospital. Ngem di nagbayag kalpasan dayta, inarestodak dagiti polis ket naibaludak. Ad-adda a timmibker ti relasionko kadagiti miembro ti gang sadiay. Agmalmalem nga agkakaduakami​—manipud iti pammigat, no agmarihuanakami, agingga a makaturogkami.

 Idi addaak iti pagbaludan, binisitanak ni Leonardo. Bayat nga agsarsaritakami, intudona ti tato iti kannawan a takiagko. Dinamagna: “Ammom kadi ti kaipapanan dayta tallo a tulnek a tatom?” Insungbatko: “Wen. Seks, droga, ken rock and roll.” Ngem kinuna ni Leonardo: “Saan. Ospital, pagbaludan, ken ipapatay. Naospitalkan, nakabaludka ita. Ammomon no ania ti sumaruno.”

 Nakigtotak iti imbaga ni Leonardo. Umiso ti imbagana. Kalkaliek ti bukodko a tanem babaen ti wagas ti panagbiagko. Inawisnak ni Leonardo a makipagadal kenkuana iti Biblia, ket immanamongak. Natignayak nga agbalbaliw gapu kadagiti naadalko iti Biblia. Kas pagarigan, kuna ti Biblia a ti “dakes a kakadua dadaelenda dagiti nasayaat a kababalin.” (1 Corinto 15:33, footnote) Gapuna, ti maysa kadagiti immuna nga inaramidko ket agbirok kadagiti baro a gagayyem. Saanakon a napnapan kadagiti miting ti gang no di ket napanak kadagiti gimong dagiti Saksi ni Jehova a maang-angay iti pagbaludan. Iti gimong dagiti Saksi, naam-ammok ti padak a balud a ni Andrés, a nabautisaran kas Saksi ni Jehova iti uneg ti pagbaludan. Inawisnak a makipammigat kenkuana. Sipud idin, saankon a rugrugian ti aldawko babaen ti marihuana. Imbes ketdi, binigat a pagsaritaanmi ken Andrés ti maysa a teksto iti Biblia.

 Dagus a nadlaw dagiti miembro ti gang a nagbalbaliwakon. Gapuna, imbaga ti maysa a lider ti gang a kayatnak a kasarita. Nagbutengak. Diak ammo no ania ti aramidenna kaniak no maammuanna ti kayatko nga aramiden, ta kasla imposible ti umikkat iti gang. Imbagana: “Nakitami a saankan nga um-umay kadagiti mitingtayo no di ket makigimgimongka kadagiti Saksi ni Jehova. Ania kadi ti planom?” Imbagak a kayatko nga itultuloy ti agadal iti Biblia ken agbalbaliw. Nasdaawak ta imbagana a raemen ti gang ti desisionko no la ket ta mapaneknekak a kayatko ti agbalin a Saksi ni Jehova. Imbagana pay: “No talaga a kayatmo a maammuan ti maipapan iti Dios, itultuloymo ti makipagadal kadagiti Saksi ni Jehova. Namnamaenmi nga isardengmon dagiti dakes nga aramidmo. Maragsakanak para kenka. Umiso ti ar-aramidem. Talaga a matulongandaka dagiti Saksi. Nakipagadalak kadakuada idiay United States, ken Saksi ni Jehova ti dadduma a kapamiliak. Dika agbuteng. Itultuloymo dayta.” Mabutbutengak pay laeng, ngem maragragsakanak unay. Naimpusuan nga agyamyamanak ken Jehova a Dios. Kaslaak la billit a nakaruar iti kulonganna, ket naawatak daytoy nga imbaga ni Jesus: “Maammuanyonto ti kinapudno, ket ti kinapudno wayawayaannakayto.”​—Juan 8:32.

 Ngem sinubokdak ti dadduma a dati a gagayyemko babaen ti panangtedda kaniak iti droga. Aminek nga adda dagiti gundaway a nasulisogak. Ngem idi agangay, kalpasan ti adu a napasnek a panagkarkararagko, naisardengko met laengen dagiti bisiok.​—Salmo 51:10, 11.

 Idi nawayawayaanak, adu ti namati nga agsubliak iti dati a wagas ti panagbiagko, ngem diak inaramid dayta. Imbes ketdi, nagsubliak iti pagbaludan tapno iranudko kadagiti dadduma a balud dagiti naadalko iti Biblia. Kombinsido met laengen dagiti dati a gagayyemko a talaga a nagbalbaliwakon. Ngem makapaladingit ta saan a kasta dagiti dati a kalabanko.

 Maysa nga aldaw bayat a mangaskasabakami, pinalikmutandakami dagiti armado a miembro ti kalabanmi idi a gang a mayat a mangpapatay kaniak. Sidadayaw ken situtured nga inlawlawag ti kaduak a saanakon a miembro ti gang. Inkagumaak met ti agtalinaed a kalmado. Kinabkabildak ken imbagada a saanakon a mapmapan iti dayta a lugar. Kalpasanna, imbabada dagiti armasda sa pinalubosandakamin. Talaga a binalbaliwan ti Biblia ti biagko ta no idi, saan a mabalin a diak agibales. Ngem ita, inyaplikarko ti balakad ti Biblia iti 1 Tesalonica 5:15: “Siguraduenyo nga awan kadakayo ti agibales iti dakes nga inaramid ti sabali, no di ket kanayon nga aramidenyo ti naimbag iti sabsabali ken iti amin.”

 Manipud idi nagbalinak a Saksi ni Jehova, inkagumaak ti agbalin a napudno. Saan a nalaka dayta. Ngem nagballigiak babaen ti tulong ni Jehova a Dios, ti balakad manipud iti Biblia, ken ti suporta dagiti baro a gagayyemko. Diak pulos kayat ti agsublin iti dati nga aramidko.​—2 Pedro 2:22.

 Naranggas ken managpungpungtotak idi. Mamatiak a natayak koma itan no intultuloyko ti naranggas a wagas ti panagbiagko. Nagbalbaliwak gapu kadagiti naadalko iti Biblia. Insardengko dagiti bisiok. Nasursurok ti makikappia kadagiti dati a kalabanko. (Lucas 6:27) Maragragsakanak itan ta adda dagiti gagayyemko a tumultulong kaniak a maaddaan kadagiti nasayaat a kababalin. (Proverbio 13:20) Naragsak ken adda panggep ti biagko itan, ta agserserbiak iti Dios a sidadaan a mangpakawan iti amin a dakes nga inaramidko.​—Isaias 1:18.

 Idi 2006, nakaawatak iti espesial a pannakasanay iti eskuelaan para kadagiti awan asawana a Kristiano nga ebanghelisador. Kalpasan ti sumagmamano a tawen, inkasarko ti napintas nga asawak ken naaddaankami iti anak a babai. Us-usarek itan ti ad-adu a tiempok a mangisuro iti sabsabali kadagiti prinsipio ti Biblia a nakatulong kaniak. Agserserbiak met kas panglakayen iti kongregasionmi, ken ikagkagumaak a tulongan dagiti agtutubo a mangliklik kadagiti kamali a naaramidko idi agtawenak iti kas kadakuada. Imbes a kaliek ti bukodko a tanem, agibangbangonak itan para iti agnanayon a masanguanan nga ikarkari ti Dios iti Biblia.