Nayanakak iti siudad ti Calgary iti Alberta, Canada. Idi tagibiak pay, nagdiborsio dagiti nagannakko, ket immakarkami ken ni Nanang iti balay dagiti apongko. Ay-ayatendakami da Lolo ken Lola, ket nakaragragsakak. Malaglagipko pay dagiti nagraragsak a tawen ti kinaubingko.

 Idi pito ti tawenko, nagbalbaliw ti biagko idi nagsinnublianan da Nanang ken Tatang ken immakarkami iti St. Louis, Missouri, United States. Idi kuan, naammuak a naranggas gayam ni Tatang. Kas pagarigan, idi nagawidak kalpasan ti umuna nga aldawko iti baro nga eskuelaak, naammuanna nga adda nang-bully kaniak ngem saanak a nagibales. Nakapungtot ket dinanognak—napigpigsa pay dayta ngem iti inaramid kaniak dagiti kaeskuelaak! Gapu iti dayta, nasursurok ti makilaban uray idi pito pay laeng ti tawenko.

 Masuron ni Nanang ta nalaka nga agpungtot ni Tatang, isu a masansan nga agapada. Nangrugiak nga agdroga ken uminum iti arak idi 11 ti tawenko. Lallalo a nagbalinak a naranggas ken kanayon a makiapaak kadagiti tattao iti kalsada. Kimmaro pay ti kinaranggasko idi naggraduarak iti hayskul.

 Idi 18 ti tawenko, simrekak iti U.S. Marine Corps. Nasursurok iti training-ko no kasano ti pumatay iti tao. Kalpasan ti lima a tawen, nagikkatak kas soldado tapno agadal iti psychology ta kayatko ti agtrabaho iti Federal Bureau of Investigation. Nageskuelaak idiay United States ken intuloyko dayta idi immakarak idiay Canada.

 Idi ages-eskuelaak, kasta unay ti pannakadismayak kadagiti tattao. Ti laeng bagbagida ti pampanunotenda, kasla awan serserbi dagiti bambanag iti lubong, ken kasla awan solusion dagiti problema ti tattao. Saanakon a mamati a mapasayaat pay dagiti tattao ti lubong.

 Gapu ta awan direksion ti biagko, agrikrikus laengen dayta iti arak, droga, kuarta, ken seks. Kanayonak iti party ken agduduma a babbai ti kadendennak. Gapu iti training-ko kas soldado, naturedak a makiapa. Gapu ta iti panagkunak ket ammok ti naimbag ken dakes, komprontaek ti asinoman a panagriknak ket saan a patas ti panangtratona iti sabali. Ngem ti agpayso, nagbalinak nga adipen ti kinaranggas.

 Maysa nga aldaw iti basement ti balayko, bayat a naka-high-kami iti droga iti gayyemko ken isagsaganami dagiti maipuslit a marihuana, dinamag ti gayyemko no mamatiak iti Dios. Insungbatko, “No ti Dios ti makimbasol iti panagrigrigat dagiti tattao iti lubong, saanko a kayat a maam-ammo!” Kabigatanna, iti umuna nga aldawko iti baro a trabahok, dinamag ti katrabahuak a maysa a Saksi ni Jehova, “Mamatika kadi a ti Dios ti makimbasol iti panagrigrigat dagiti tattao iti lubong?” Nakigtotak ta dayta ti sungbatko iti saludsod ti gayyemko isu a naginteresak. Iti sumaruno nga innem a bulan, adu ti napagsaritaanmi, ken impakitana kaniak dagiti sungbat ti Biblia iti dadduma kadagiti karirigatan a saludsodko iti biag.

 Saan a kayat ti nobiak, a kalib-live in-ko, nga ibagak kenkuana dagiti maad-adalko. Iti maysa a Domingo, imbagak kenkuana nga inawisko dagiti Saksi iti balaymi tapno agadalkami iti Biblia. Kabigatanna, idi nagawidak manipud iti trabaho, nakitak nga awanen ti amin a gamit iti balay ken pinanawannak. Rimmuarak ket nagsangsangitak. Nagkararagak iti Dios nga agpakpakaasi a tulongannak. Dayta ti umuna a gundaway nga inusarko ti personal a nagan ti Dios a Jehova iti kararagko.—Salmo 83:18.

 Dua nga aldaw kalpasan dayta, nangrugiak a makipagadal iti Biblia iti agassawa a Saksi. Idi nakapanawda, intuloyko a binasa ti libro a Mabalinyo ti Agbiag nga Agnanayon iti Paraiso a Daga, ket nalpasko dayta iti dayta met laeng a rabii. a Dimmanon iti pusok ti naammuak maipapan ken Jehova a Dios ken iti Anakna, ni Jesu-Kristo. Naammuak a ni Jehova ket naasi ken masaksaktan no makitkitana nga agrigrigattayo. (Isaias 63:9) Ti ayat ti Dios ken ti sakripisio ti Anakna nga inaramidna para kaniak ti talaga a nangtukay iti pusok. (1 Juan 4:10) Sigurado nga inan-anusannak ni Jehova “ta saanna a kayat a madadael ti asinoman no di ket kayatna nga agbabawi ti amin.” (2 Pedro 3:9) Nariknak a kayat ni Jehova nga agbalinak a gayyemna.—Juan 6:44.

 Rinugiak ti nakigimong iti dayta met laeng a lawas. Atiddog ti buokko, nakaaritosak, ken nakabutbuteng ti itsurak, ngem trinatodak dagiti Saksi a kas kapamilia a nabayag a saanda a nakitkita. Impakitada a pudnoda a Kristiano. Nariknak a kasla addaak iti balay da apongko, ngem nasaysayaat nga amang daytoy.

 Gapu kadagiti maad-adalko iti Biblia, nagbalbaliw ti biagko. Nagpapukisak, insardengko ti amin nga immoral nga aramid, ken saanakon nga agdrogdroga ken agbarbartek. (1 Corinto 6:9, 10; 11:14) Kayatko a paragsaken ni Jehova. Isu a no maammuak nga adda ar-aramidek a saanna a kayat, saanko nga irasrasonan dayta no di ket masansan a mariknak a kasla naduyok ti pusok. Ibagbagak iti bagik, ‘Saanen a mabalin a kastoy ti ar-aramidek.’ Isu nga ikagumaak a baliwan a dagus ti panagpampanunot ken panagtigtignayko. Kas resultana, nariknak a simmayaat ti biagko idi inaramidko ti kayat ni Jehova nga aramidek. Innem a bulan kalpasan ti umuna a pannakipagadalko iti Biblia, nabautisaranak kas Saksi ni Jehova idi Hulio 29, 1989.

 Binalbaliwan ti Biblia ti personalidadko. Idi, masansan a makiapaak a dagus no komprontaennak ti naunget a tao. Ngem ita, ikagkagumaak ti “makikappia iti amin a tao.” (Roma 12:18) Saanko a kabaelan ti agbalbaliw a bukbukodko no di ket agyamanak ken Jehova ta gapu iti Saona ken iti nasantuan nga espirituna, nagbalbaliw ti biagko.—Galacia 5:22, 23; Hebreo 4:12.

 Imbes nga agpaadipenak iti droga, kinaranggas, ken immoral a tarigagay, ikagkagumaak itan a paragsaken ni Jehova a Dios ken ipaay kenkuana ti kasayaatak. Karaman iti dayta ti panangtulongko iti dadduma a mangam-ammo kenkuana. Sumagmamano a tawen kalpasan a nabautisaranak, immakarak iti sabali a pagilian tapno tumulong a mangasaba iti lugar a dakdakkel ti panagkasapulanna. Iti napalabas a tawtawen, maragragsakanak a mangisuro iti adu a tattao ken makakita a simmayaat ti biagda gapu iti Biblia. Maragragsakanak met ta nagbalin a Saksi ni Jehova ni Nanang. Dakkel ti naitulong ti nakitana a panagbalbaliw ti kababalin ken aramidko.

 Naggraduarak iti maaw-awagan itan kas School for Kingdom Evangelizers idi 1999, idiay El Salvador. Dayta nga eskuelaan ti nangsanay ken nangtulong kaniak a mangidaulo iti trabaho a panangasaba, panangisuro, ken panangipastor iti kongregasion. Iti dayta met laeng a tawen, inkasarko ni Eugenia, ti ay-ayatek nga asawak. Agserserbikami a dua kas amin-tiempo a manangaskasaba iti Guatemala.

 Ita, imbes a dismayadoak iti biagko, nakaragragsakak. Ti panangyaplikarko kadagiti sursuro ti Biblia ti nangwayawaya kaniak iti seksual nga immoralidad ken kinaranggas ken naaddaanak iti biag a napno iti pudno nga ayat ken talna.