“Diak pulos impagarup a kastoy kaadu ti maaramidak para ken Jehova.” Kasta ti narikna ni Gwen a taga-England maipapan iti panagboluntariona iti lugar a dakdakkel ti panagkasapulan iti agibumbunannag idiay Albania. a

 Maysa ni Gwen iti adu a Saksi nga immakar idiay Albania tapno tumulong a mangurnong kadagiti “napateg a bambanag manipud iti amin a nasion.” (Haggeo 2:7) Ania ti nangtignay kadagitoy a manangaskasaba? Ania dagiti panagbalbaliw nga inaramidda tapno makapagserbida iti sabali a lugar? Ken ania dagiti bendision a nakatulong kadakuada tapno makapagtultuloyda uray narigat dagiti situasion?

 Maymaysa ti rason ti amin a kakabsat a napan timmulong idiay Albania: Ay-ayatenda ni Jehova ken kayatda a tulongan ti dadduma a mangam-ammo kenkuana.

 Sakbay nga immakarda, nangaramidda kadagiti panagbalbaliw tapno mapalawada ti ministerioda. Nakatulong dayta tapno mapagballigianda dagiti karit iti panagserbi iti sabali a lugar. Imbaga ni Gwen: “Ti umuna nga inaramidko ket immakarak iti grupo nga agsasao iti Albanian iti lugarmi. Kalpasanna, nakikombensionak iti Albania. Idi agangay, nagsubliak manen iti apagbiit tapno masursurok a naimbag ti lengguaheda.”

 Agtawen iti 23 ni Manuela idi immakar iti sabali a paset ti pagilianda nga Italy tapno tumulong iti bassit a kongregasion. Imbagana: “Nagserbiak sadiay iti uppat a tawen. Idi kuan, naammuak a dakdakkel ti panagkasapulan idiay Albania. Isu nga implanok ti agpayunir sadiay iti sumagmamano a bulan.”

 Pito laeng ti tawen ni Federica idi nangngegna iti maysa a kombension ti report manipud iti Albania. Kunana: “Imbaga ti brother a nangted iti report nga adu a panangyadal iti Biblia ti mairugrugi dagiti kakabsat idiay Albania ken makigimgimong dagiti interesado. Imbagak kadagiti nagannakko a kayatko ti mapan idiay Albania. Nasdaawda idi imbagak dayta, ngem kuna ni tatang, ‘Ikararagmo dayta ken Jehova, ket no pagayatanna, denggenna.’ Mano a bulan laeng, naawiskami a pamilia nga agserbi idiay Albania!” Kalpasan ti adu a tawen, nakiasawan ni Federica. Agserserbida ita ken lakayna a ni Orges kas amin-tiempo a manangaskasaba idiay Albania.

 Kalpasan a nagretiro ni Gianpiero, immakarda ken baketna a ni Gloria idiay Albania. Imbagana: “Pinadakkelmi ti lima nga annakmi a lallaki idiay Italy. Tallo kadakuada ti immakar iti lugar nga addaan iti panagkasapulan. Natignaykami iti maysa nga artikulo ti Pagwanawanan a napauluan, ‘Mabalinmo Kadi ti Umallatiw iti Macedonia?’ Implanomi no kasanomi nga iyan-anay ti pensionko iti panagserbimi idiay Albania.”

 Masapul nga agplano a naimbag ken mangaramid kadagiti panagbalbaliw dagiti agboluntario iti sabali a lugar sakbay nga umakarda. (Lucas 14:28) Masapul met a mangbirokda kadagiti pamay-an tapno masuportaranda ti bagida. Idi adda pay laeng idiay England ni Gwen, a nadakamat itay, nakipagyan ken manangna tapno makissayan dagiti paggastuanna. Malagip pay da Sophia ken Christopher, a taga-England met laeng: “Inlakomi ti luganmi ken ti dadduma a gamitmi. Pampanunotenmi idi a bareng makapagboluntariokami idiay Albania uray makatawen laeng.” Makaparagsak ta nabaybayag ngem iti dayta ti panagserbida sadiay.

 Dadduma a kakabsat ti agserbi idiay Albania iti sumagmamano a bulan, agsublida iti pagilianda tapno agtrabaho ken agurnong iti kuarta, sa agsublida manen idiay Albania. Kasta ti inaramid da Eliseo ken Miriam. Imbaga ni Eliseo: “Naggapu ni Miriam iti lugar iti Italy a pagpasiaran dagiti turista, isu a nalaka laeng ti agbirok sadiay kadagiti part-time a trabaho. Mapankami iti lugarda ken agtrabahokami iti tallo a bulan iti summer sa usarenmi ti naurnongmi nga agserbi idiay Albania iti siam a bulan. Inaramidmi dayta iti lima a tawen.”

 No addan dagiti kakabsat kadagiti pagboluntarioanda, masapul nga ag-adjust-da kadagiti baro a kasasaad. Ngem makatulong ti ibaga ken ar-aramiden dagiti lumugar a Saksi tapno mapagballigianda dagiti narigat a situasion. Imbaga ni Sophia, a nadakamat itay: “Bayat ti winter idiay Albania, adayo a nalamlamiis dagiti balay ngem iti pagilian a naggapuak. Nasursurok a balbaliwan ti panagbadbadok idi nakitak no kasano ti panagbadbado dagiti lumugar a sister.” Dagiti agassawa a da Grzegorz ken Sona, a taga-Poland, ket timmulong iti napintas nga ili ti Prizren idiay Kosovo. b Imbaga ni Grzegorz: “Nakapakpakumbaba, nakaim-imbag, ken nakaan-anus dagiti kakabsat ditoy! Tultulongandakami a makasursuro iti lengguaheda ken iti dadduma pay. Kas pagarigan, sinuruandakami no sadino ti paggatanganmi iti nalaka, ken no kasano ti makitienda.”

 Pagsayaatan dagiti agboluntario iti sabali a lugar no makisinningedda kadagiti lumugar a Saksi ken am-ammuenda ida a naimbag. Kuna ni Sona: “Nakitak no kasano a mamagbalbaliw iti biag ti ayat ni Jehova. Napabileg ti pammatik ta nakitak no kasano a naan-anay a binaliwan dagiti kakabsat dagiti patpatienda ken ti biagda idi naam-ammoda ni Jehova. Nariknami a kasapulandakami ken adda maar-aramidanmi iti kongregasion. Idi nakipagtrabahokami kadagiti kakabsat, nagbalinda a gagayyemmi.” (Marcos 10:29, 30) Imbaga ni Gloria: “Adu ti am-ammok a sister a nangibtur iti panangidadanes dagiti bumusbusor kadagiti Saksi iti lugarda. Naparegtaak unay idi nakitak ti dakkel a panagayatda ken Jehova.”

 Adu met ti napateg a masursuro dagiti agboluntario iti sabali a lugar a mabalin a saanda a masursuro iti naggapuanda a lugar. Kas pagarigan, masursuroda a mangyeg iti ragsak no padasen ti maysa ti dadduma a pamay-an ti panagserbi ken Jehova a dina pay napadasan. Imbaga ni Stefano: “Iti pagilianmi, kaaduanna a mangasabakami babaen ti intercom, ken ababa laeng ti pannakisaritami. Ngem kaykayat dagiti Albanian ti makiinnestoria, lallalo no agkapkapeda. Managbabainak, isu nga idi damo, diak ammo no ania ti ibagak. Ngem idi agangay, nasursurok nga ipakita ti personal nga interes kadagiti tattao, ket maen-enjoy-kon ti makiinnestoria kadakuada. Adayo a nabungbunga itan ti ministeriok.”

 Immakar idiay Albania ti agassawa a da Leah ken William, a taga-United States. Imbaga ni Leah: “Adu ti nasursuromi ken limmawa ti pannakaawatmi idi nagserbikami ditoy. Ad-adda a nakasursurokami maipapan iti kinamanagpadagus, panagraem, ken pannakigayyem! Nasursuromi dagiti baro a pamay-an ti panangasaba, panangilawlawag iti Kasuratan, ken panangyebkas iti kapanunotan wenno rikriknami.” Imbaga ni William: “Kaaduan a bumisbisita iti Albania ket magusgustuanda dagiti nagpipintas a baybay. Kaykayatko met ti ag-hiking iti rangrangkis ti Albanian Alps. Ngem dagiti tattao ti talaga a makagapu no apay a nagtalinaedkami ditoy! Adu a purok iti teritoriami ti makasabaan laeng bayat dagiti special campaign. No mapankami sadiay, busbosenmi no dadduma ti agmalmalem tapno makisarita iti sumagmamano laeng a pamilia.”

 Para kadagiti agbolboluntario iti sabali a lugar, ti kangrunaan a mangparagsak kadakuada ket no awaten dagiti tattao ti naimbag a damag. (1 Tesalonica 2:19, 20) Imbaga ti single a sister a ni Laura nga immakar idiay Albania: “Nagserbiak apagbiit idiay Fier. Dua ket kagudua a tawen laeng, addan 120 a kabbaro a nagbalin a manangaskasaba! Disisais kadakuada ti inyadalak!” Malagip ti sabali pay a sister a ni Sandra: “Kinasabaak ti maysa a babai nga agtrabtrabaho iti tiendaan. Nagbalin a Saksi isuna ken nagsubli iti lugarda. Iti naudi a damagko, nakairugi isuna iti 15 a panangyadal iti Biblia!”

 Naragsak latta nga agserserbi ti dadduma a nagboluntario idiay Albania uray no adu a tawenen ti limmabas. No dadduma, masorpresada ta dagiti nakasabaanda idi ket immawat met laeng iti kinapudno idi agangay. (Eclesiastes 11:6) Kuna ni Christopher, a nadakamat itay: “Nakasaritak manen ti lalaki a narugiak nga iyadalan iti Biblia idi kaak-akarko ditoy Albania. Urayak la nakalua idi nalagipna dagiti damo a saritaanmi maipapan iti Biblia. Bautisadoda itan nga agassawa kas Saksi ni Jehova.” Kuna ni Federica, a nadakamat itay: “Iti maysa a kongregasion, inasitgannak ti maysa a sister ken dinamagna no malagipko pay isuna. Imbagana a nakasabaak isuna siam a tawenen ti napalabas. Sumagmamano a tiempo kalpasan nga immakarak iti sabali nga ili, nakipagadal gayam iti Biblia agingga a nagpabautisar. Impagarupko idi a saan a nabunga dagiti immuna a tawtawen ti panagserbimi iti Albania. Ngem kamaliak gayam!”

 Agyamyaman dagiti kakabsat nga immakar idiay Albania wenno Kosovo ta nakitada no kasano a bembendisionan ni Jehova dagiti panagsakripisioda ken nagbalin a naragsak ti biagda. Adu a tawenen nga agserserbi ni Eliseo idiay Albania. Imbagana maipapan iti panagserbina sadiay: “Kas tattao, nalakatayo laeng a maallilaw iti kapanunotan a natalged ti biagtayo no agtalektayo kadagiti ibilbilang ti lubong a mangted iti komportable a biag. Ngem saan a husto dayta. Imbes ketdi, dagiti prinsipio ni Jehova ti mangted kadatayo iti panggep ken kinatalged. Ti panagboluntariok iti sabali a lugar ti nakatulong tapno silalagipak iti dayta. Mariknak nga adu ti pakaus-usarak ken maipatpategak. Addaanak kadagiti pudno a gagayyem ken agpapada ti kalatmi.” Umanamong ni Sandra: “Idi immakarak iti lugar a dakdakkel ti panagkasapulanna, nariknak nga inikkannak ni Jehova iti gundaway a manggaw-at iti nabayagen a kalatko nga agbalin a misionera. Diak pulos pagbabawyan ti panagakarko iti Albania. Naragragsakak itan.”