Idi 2005, natay ti dungdungnguen nga asawa ti maysa a babai a taga-India nga agnagan Sowbhagya. Adda tallo ti tawenna nga anakda nga agnagan Meghana. Inaywanan ida a naimbag ni lakayna idi sibibiag pay. Ngem ita, marigatan ni Sowbhagya a mangisakad iti panagbiagda nga agina.

 Nakarkaro pay, ipuerpuera ti dadduma ni Sowbhagya. Kasla agpalpalama ti panangtrato kadakuada ti pamiliana, ket maulit-ulit nga imbagada a makapadagsenda laeng kadakuada. Nakimisa ni Sowbhagya iti maysa a simbaan ta kayatna ti maliwliwa, ngem nababa ti panagkita kenkuana dagiti tattao sadiay gapu ta pobre. Inkagumaan ni Sowbhagya ti agbirok iti trabaho tapno maipaayna ti kasapulanda nga agina, ngem awan ti nabirokanna.

 Imbaga ni Sowbhagya: “Nariknak nga awanen ti namnamak, isu a napanunotko ti agpakamatay. Ngem ammok nga adunto ti problema ti anakko no awanakon. Isu a maymayat laengen no duakami a matay.” Gapu ta narikna ni Sowbhagya nga awan serserbina ken awan ti mangay-ayat kenkuana, napan gimmatang iti sabidong.

 Bayat nga agaw-awid ni Sowbhagya a nakasakay iti tren, immasideg ken nakisarita kenkuana ni Elizabeth a maysa a Saksi ni Jehova. Imbaga ni Sowbhagya nga awan ti trabahona, isu a siaasi nga imbaga ni Elizabeth a tulonganna nga agbirok iti trabaho. Naibaga met ni Elizabeth a mapan mangyadal iti Biblia. Nasdaaw ni Sowbhagya ta uray adun a simbaan ti simrekanna, awan pay a pulos ti nangnangngegna a tattao nga agad-adal iti Biblia. Inawis ni Elizabeth ni Sowbhagya a bumisitanto kenkuana tapno maammuanna ti ad-adu pay maipapan iti panagadal iti Biblia.

 Idi nakaawiden ni Sowbhagya, pampanunotenna latta ti agpakamatay. Ngem adda kabagianna a nangipasiar ken Meghana, isu a nagdesision nga ituloynanto lattan ti planona inton makasangpeten ti anakna.

 Kabayatanna, binisitana ni Elizabeth, a siraragsak a nangawat kenkuana. Impakita kenkuana ni Elizabeth ti libro nga Ania a Talaga ti Isursuro ti Biblia? Naginteres ni Sowbhagya iti kapitulo a “Sadino ti Ayan Dagiti Natay?” gapu ta nabiit pay a natay ni lakayna. Iti dayta met la nga aldaw, nagpayadal iti Biblia ni Sowbhagya.

 Inawis ni Elizabeth ni Sowbhagya iti kombension iti sumaruno a lawas ket inawatna dayta. Natignay ti pusona iti programa isu a kayatna ti agbalin a Saksi ni Jehova. Idi nakaawiden manipud iti kombension, adda naawatna a trabaho.

 Intultuloy ni Sowbhagya ti nakipagadal iti Biblia. Saannan a kayat ti agpakamatay ta addan direksion ti biagna. Nagpabautisar, ket idi agangay, nagpabautisar met ti anakna a ni Meghana. Ita, regular pioneer-dan a dua ken remote volunteer ni Meghana iti maysa kadagiti translation office idiay India.

 Anian a yaman da Sowbhagya ken Meghana ta immasideg ni Elizabeth ken Sowbhagya iti tren, impakitaanna iti interes, ken inranudna kenkuana ti kinapudno! Agyamyamanda unay ken Jehova. Imbaga ni Meghana: “Nabayagkami koman a natay no saanmi a naammuan ti kinapudno iti dayta nga aldaw. Nakaragragsakkami itan. Padpadaananmi ken Nanang ti aldaw a maarakupmi manen ni Tatang, maisuromi kenkuana ti maipapan ken Jehova, ken maibagami no kasano nga inispal ni Jehova ti biagmi.”