Bayat ti nabiit pay a COVID-19 pandemic, imbagay dagiti kakabsattayo ti pamay-an ti panangipakaammoda iti makaliwliwa a mensahe ti Biblia. Imbes nga ag-public witnessing wenno agbalaybalayda, impakaammoda ti mensaheda kangrunaanna babaen ti telepono ken sursurat. a Adu a tattao ti mangap-apresiar kadagiti ar-aramidenda ken nalawag a bembendisionan ni Jehova ti panagporsegida. (Proverbio 16:3, 4) Kitaentayo ti dadduma a kapadasan manipud iti maysa nga isla.

 Sakbay ti pandemia, regularen a bisbisitaen ni Helen ti maysa nga agtutubo a babai ken kanayon nga iyaw-awisna nga adalenda ti Biblia. Ngem kanayon met nga agsaan ti babai. Uray no kasta, iti aldaw sakbay ti lockdown gapu iti COVID-19, inikkan ni Helen isuna iti Biblia ken iti libro nga Ania ti Isuro ti Biblia Kadatayo? Bayat ti lockdown, inawis manen ni Helen ti babai nga adalenda ti Biblia. Imbagana nga agadalda no kua babaen ti telepono. Iti daytoy a gundaway, inawaten dayta ti babai. Permi a na-enjoy-na ti saritaanda ken idi kuan, imbagana payen ken Helen nga inaldaw nga agadalda! Sa inrugina metten ti regular a makigimong babaen ti telepono. Ket ita, saanna laengen nga iyap-aplikar dagiti sursuro ti Biblia no di ket ibagbagana metten dagiti nasursurona iti sabsabali.

 Kas paset ti personal a panangikagumaanda iti ministerio, nagsurat dagiti Saksi iti maysa a kongregasion kadagiti polis tapno iyebkas ti panagyamanda iti nagpateg a serbisioda. Nasorpresa dagiti polis kadagiti suratda. Imbaga ti maysa a polis ken ni Jefferson, a maysa a panglakayen iti dayta a kongregasion, “Panagkunak idi ket kontra dagiti Saksi ni Jehova kadagiti polis.” Ngem inlawlawag ni Jefferson a saan nga agpayso dayta. Naragsakan unay dagiti polis iti positibo a linaon dagiti surat, nga uray la indispleyda dagita iti entrance ti estasionda. Imbaga ti sabali pay a polis, “Baka makatulong daytoy tapno agbalin a positibo ti panangkita ti dadduma kadakami.”

 Da Edna ken Ednalyn ket agpada a regular pioneer. b Awan ti internet iti balayda isu a saanda a makaatender iti gimong babaen ti videoconferencing. Tinawaganda ngarud ti saan a Saksi a kaarrubada no mabalinda ti makiusar iti Wi-Fi ken imbagada a makibingayda iti bayad ti Internet. Ngem kuna ti babai nga agkonekda lattan nga awan bayadna. Inawis da Edna ken Ednalyn isuna a makigimong ket immatender ti babai. Ket ita, dayta a kaarruba, maysa kadagiti annakna, ken dua nga apokona ti makipagad-adalen kadagiti Saksi ken regularen nga umat-atender iti gimong.

 Inawis dagiti lumugar a kakabsat dagiti kaarrubada, katrabahuan, ken dadduma pay iti maysa a palawag publiko a maiparang babaen iti virtual a pamay-an wenno videoconferencing. Ni Ellaine nga agtrabtrabaho iti maysa nga ospital ket mabain idi damo a mangawis kadagiti katrabahuanna. Impapanna a negatibo ti panagkita ti dadduma a doktor kadagiti Saksi. Uray no kasta, nangi-send latta iti nainggayyeman a text message kadagiti doktor ti ospital tapno awisenna ida. Dua kadakuada ti nangnangruna a saan koma a kayat nga awisen ni Ellaine—ti agassawa a doktor. Ngem kalpasan a pinampanunotna ken inkarkararagna dayta, in-text-na ti imbitasion. Nag-reply ti doktora: “Kayatmo kadi a sawen a makimiembrokami iti relihionyo?” Imbaga ni Ellaine a mabalin a makigimong ti asinoman uray saan a Saksi ni Jehova. Kabigatanna, nasdaaw ni Elaine ta nasapa a nagkonek iti gimong ti agassawa! Imbagana: “Sakbay a nalpas ti gimong, nag-text kaniak ni doktora ket kunana: ‘First time-ko ti umatender iti gimong dagiti Saksi ni Jehova. Mayat. Nagragsak. Thank you ta inawisnak.’”

 Duapulo a doktor ti inawis ni Ellaine a makigimong ket naragsakan a makaammo a 16 kadakuada ti immatender. Kinotarna ti sasao ni apostol Pablo, idi imbagana: “Agyamanak ta naaddaanak iti ‘tured’ a mangikasaba iti ‘naimbag a damag ti Dios’ kadagiti katrabahuak.”—1 Tesalonica 2:2.

 Talaga a narigat ti pandemia para iti amin. Ngem dagiti kakabsattayo iti daytoy nga isla ken iti uray sadinoman, napetpetanda ti ragsakda ken nagtalinaedda a positibo ta inaramidda ti amin a kabaelanda a mangliwliwa ken tumulong iti sabsabali.—Aramid 20:35.