Ni Danielle a maysa a Saksi ni Jehova idiay South Africa ket nakakita iti bag a nabati ti kostumer iti maysa a coffee shop. Naglaon ti bag iti pitaka nga adda nagyanna a kuarta ken adu a credit card. Gapu ta determinado ni Danielle a mangisubli iti bag, kinitana iti bag no adda adres wenno numero ti telepono ngem nagan laeng ti lalaki ti nakitana. Pinadasna a kontaken babaen ti bangko ti lalaki ngem napaay. Ngem saan a simmardeng ni Danielle. Tinawaganna ti numero ti doktor nga adda iti resibo a nakitana iti bag. Imbaga ti receptionist a simmungbat nga itedna ti numero ni Danielle iti lalaki.

 Nasdaaw ti lalaki idi nakaawat iti tawag manipud iti klinika ti doktorna a mangibagbaga a nakita ni Danielle ti bagna ken kayatna nga isubli. Idi simmangpet ti lalaki tapno alaenna ti bag, kinablaawan ni Danielle ken ni tatangna. Imbagada ti rason no apay nga inaramidda ti amin a kabaelanda a mangbirok kenkuana. Inlawlawagda a kas Saksi ni Jehova, ikagkagumaanda a suroten dagiti prinsipio ti Biblia, isu a kanayon a kayatda ti agbalin a mapagtalkan.—Hebreo 13:18.

 Kalpasan ti sumagmamano nga oras, nagteks ti lalaki kada Danielle ken tatangna ket nagyaman manen gapu ta insublida ti bag ken pitakana. Kinunana: “Agyamanak unay ta inkagumaandak a biroken. Maragsakanak ta naam-ammokayo ken ti pamiliayo. Diakto malipatan ti kinaimbag ken kinasingpetyo. Kas panagyaman, kayatkay nga ikkan iti donasion. Ammok nga agsaksakripisiokayo tapno maaramidyo ti misionyo para iti Dios. Nakitak a nasayaatkayo a tattao, ta mapagtalkan ken mapagpiaran ni Danielle. Isu nga agyamanak manen ken sapay koma ta bendisionan ti Dios ti ministerioyo.”

 Sumagmamano a bulan kalpasanna, nagkita manen ti tatang ni Danielle ken ti lalaki. Inyestoria ti lalaki nga iti nabiit pay, adda pitaka a napidutna bayat ti panag-shopping-na. Idi nabirokanna ti babai a makinkukua iti pitaka ken insublina dayta, inlawlawagna no apay a kasta ti inaramidna. Imbagana nga iti nabiit pay, adda mapagpiaran a tao a nangisubli iti pitakana. Kinunana: “Ti bassit a kinamapagpiaran ken kinaimbag ket pagtitinnuladan, a mangparagsak iti amin.”