Nakapuesto ni Osman agraman ti asawa ken balasangna iti literature cart iti ruar ti maysa a sementerio idiay Chile. Pagammuan ta simmangpet ti dakkel a grupo dagiti makipamunpon a napigsa ti panagpatokarda. Impapan ti dadduma kadakuada a ni Osman ti pastor ti simbaanda, isu nga inasitganda, inarakupda, sa imbagada, “Agyamankami ta nasapakayo, Pastor. Imbag ta immaykayo!”

 Pinadas ni Osman nga ilawlawag a saan nga isu ti pastor, ngem saanda a naawatan gapu ta nakatagtagari dagiti tattao. Sumagmamano a minuto kalpasan a simrekda iti sementerio, adda dagiti nagsubli ket imbagada kenkuana, “Pastor, ur-urayendakan idiay.”

 Idi naulimeken ti aglawlaw, nailawlawag ni Osman no asino isuna ken no apay nga adda sadiay. Imbaga dagiti tattao a masuronda ta saan a simmangpet ti pastor, sa imbagada ken Osman, “Mabalin kadi a sika laengen ti umay mangibasa iti Biblia kadakami?” Immanamong ni Osman.

 Bayat a magmagnada a mapan iti pakaipumponan ti natay, nagdamag ni Osman iti sumagmamano a detalye maipapan iti tao a natay sa nangpanunot kadagiti teksto a mabalinna nga ibasa. Idi nakadanondan, inyam-ammona ti bagina ken inlawlawagna a kas maysa a Saksi ni Jehova, makiramraman iti trabaho a panangipakaammo iti naimbag a damag kadagiti tattao.

 Inusarna ti Apocalipsis 21:3, 4 ken Juan 5:28, 29 a nangilawlawag a saan a panggep ti Dios a matay dagiti tattao. Imbagana nga asidegen a pagungaren ti Dios dagiti natay, ket adda namnamada nga agbiag nga agnanayon ditoy daga. Idi nalpasen ni Osman, inarakup dagiti tattao sa nagyamanda iti “naimbag a damag a naggapu ken Jehova.” Kalpasanna, nagsublin ni Osman iti literature cart.

 Kalpasan ti pumpon, dadduma kadagiti natayan ti immasideg iti literature cart sa nagsaludsodda ken Osman ken iti pamiliana maipapan iti Biblia. Napaut ti panagsasaritada, ket idi agawiddan, dandani innalada ti amin a publikasion a nagyan ti literature cart.