Maysa a Saksi a taga-Asia nga agnagan Yanmei ti timmulong iti maysa a bulsek a babai nga agnagan Mingjie a bumallasiw iti kalsada. a Kuna ni Mingjie: “Agyamanak. Sapay koma ta bendisionannaka ni Apo Dios!” Kalpasanna, dinamag ni Yanmei ken Mingjie no kayatna nga agkitadanto manen tapno pagsaritaanda ti Biblia. Idi agangay, imbaga ni Mingjie nga inaldaw nga agkarkararag tapno mabirokanna ti pudno a kongregasion ti Dios. Apay a kasta ti ikarkararagna?

 Imbaga ni Mingjie nga idi 2008, inawatna ti awis ti maysa a bulsek a gayyemna nga umatender iti simbaan ti maysa a relihion a tumultulong kadagiti adda depektona. Kalpasan ti sermon, dinamag ni Mingjie iti padi no ania a libro ti nangibatayanna iti imbagana. Imbaga ti padi nga iti Biblia, ti pudpudno a Sao ti Dios. Gapu ta kayat unay ni Mingjie a basaen dayta, nangala iti Chinese a braille a Biblia ket binasana ti 32 a volume iti uneg ti innem a bulan. Iti panagbasbasa ni Mingjie iti Biblia, naammuanna a di umiso ti doktrina a Trinidad a maisursuro iti relihion a pakiat-atenderanna. Naammuanna met nga adda nagan ti Dios, Jehova.

 Idi agangay, nadismaya ni Mingjie iti ar-aramid dagiti miembro dayta a relihion. Nadlawna a saanda nga ar-aramiden ti mabasbasana iti Biblia. Kas pagarigan, mangmangtedda iti makan iti amin, ngem tedtedda laeng ti itedda kadagiti bulsek. Nasaktan ni Mingjie iti dayta a panangidumduma isu a nagbirok iti sabali a relihion iti lugarda. Dayta ti rason nga ikarkararag ni Mingjie a masarakanna koma ti pudno a kongregasion Kristiano.

 Gapu ta natignay iti kinasingpet ni Yanmei, nakipagadal kenkuana ni Mingjie iti Biblia. Idi agangay, nakigimongen ni Mingjie kadagiti Saksi ni Jehova. Kuna ni Mingjie: “Diak pulos malipatan ti damo a pannakigimongko. Siaayat nga inabrasadak dagiti kakabsat. Urayak la makasangit. Uray bulsekak, nariknak a saanak a maidumduma ken maipatpategak.”

 Nasayaat ti panagrang-ay ni Mingjie ken regularen a makigimgimong. Magusgustuanna ti agkanta kadagiti kanta ti Pagarian, ngem marigatan gapu ta awan ti pagkantaan a braille. Iti tulong dagiti kakabsat, nagaramid ni Mingjie iti bukodna a pagkantaan. Iti uneg ti 22 nga oras, nakopiana ti 151 a kanta! Idi Abril 2018, nakiramanen ni Mingjie iti panangasaba iti publiko ket agarup 30 nga oras ti maus-usarna a mangasaba iti kada bulan.

 Tapno makapagsagana ni Mingjie iti panagbautisarna, inrekord ni Yanmei dagiti saludsod ken teksto ti Biblia iti libro nga Organisado a Mangaramid iti Pagayatan ni Jehova. Nabautisaran ni Mingjie idi Hulio 2018. Kunana: “Natukay ti pusok iti ayat nga impakita dagiti kakabsat iti kombension. Urayak la nakasangit gapu ta pasetak met laengen ti pudno a kongregasion ti Dios.” (Juan 13:34, 35) Gapu ta kayat ni Mingjie nga ipakita ti ayat a kas iti naiparikna kenkuana, agserserbi itan kas amin-tiempo a manangaskasaba.