Ni Daiane ket maysa kadagiti Saksi ni Jehova idiay Brazil a full-time a manangaskasaba. Naminsan, bayat a mangaskasaba babaen ti telepono, adda ubing pay nga agassawa a nakasaritana a nangipakita iti interes. Imbagada ken Daiane nga umakarda iti nasulinek a purok nga awan man la koriente wenno Internet-na, ken awan ti Saksi ni Jehova sadiay. Tapno agtultuloy ti panagsasaritada maipapan iti Biblia, inted dagiti agassawa ken Daiane ti numero ti pangpubliko a telepono iti purok a papananda ket nagtutulagda no ania nga aldaw ken oras nga agsasaritada manen.

 Idi nadanon ti nagtutulaganda a tiempo, tinawagan ni Daiane ti numero ti telepono nga intedda ket simmungbatda. Iti simmaruno a dua a lawas, namitlo pay a nakapagsasaritada maipapan iti Biblia.

 Ngem kalpasan dayta, saanen a simmungbat ti agassawa kadagiti tawag ni Daiane. Saan a naupay ni Daiane isu nga intultuloyna latta ti timmawag mamitlo iti kada lawas. Kasabaan ni Daiane ti asinoman a sumungbat iti telepono. Kas resultana, nakairugi iti sumagmamano a panangyadal iti Biblia kadagiti tattao iti dayta a purok.

 Naminsan, iyad-adalan da Daiane ken ni lakayna ti maysa nga agkabannuag a lalaki babaen ti pangpubliko a telepono. Nangngeg ti lider ti simbaan iti dayta a purok ti panagsasaritada. Nagtakder iti abay ti mayad-adalan tapno mangngegna a naimbag ti pagsasaritaanda. Idi kuan, imbaga ti lider ti simbaan a kayatna a kasarita da Daiane ken ni lakayna. Nagustuanna unay ti nangngegna isu a kayatna met ti makipagadal iti Biblia!

 Idi agangay, innemen ti iyad-adalan da Daiane ken ni lakayna babaen ti telepono iti dayta a nasulinek a purok, a pakairamanan ti lider ti simbaan. Adda payen dagiti iyad-adalanda nga umat-atender kadagiti gimong babaen ti isu met laeng a telepono. Maysa kadakuada ti nangaramid pay ketdi iti bangko a pagtugawanda bayat ti panagadalda iti Biblia.

 Agyamyaman da Daiane ken ni lakayna iti gundawayda a mangipakaammo iti mensahe ti Pagarian iti dayta a nakaad-adayo a purok. Imbaga ni Daiane, “Kaya ni Jehova nga idanon ti naimbag a damag iti asinoman, uray kadagiti aggigian kadagiti nasulinek a lugar.”