1. Pétursbréf 5:1–14
5 Sem samöldungur ykkar, vottur að þjáningum Krists og þátttakandi í þeirri dýrð sem á eftir að opinberast, bið ég því* öldungana á meðal ykkar:
2 Gætið hjarðar Guðs sem hann hefur falið ykkur. Verið umsjónarmenn hennar,* ekki tilneyddir heldur af fúsu geði frammi fyrir Guði, ekki af gróðafíkn heldur af áhuga.
3 Drottnið ekki yfir þeim sem eru arfleifð Guðs heldur verið fyrirmynd hjarðarinnar.
4 Og þegar yfirhirðirinn birtist hljótið þið dýrðarsveiginn sem aldrei fölnar.
5 Á sama hátt skuluð þið ungu menn vera eldri mönnunum* undirgefnir. En íklæðist* allir auðmýkt* hver gagnvart öðrum því að Guð stendur gegn hrokafullum en auðmjúkum sýnir hann einstaka góðvild.
6 Auðmýkið ykkur því undir máttuga hönd Guðs til að hann upphefji ykkur þegar þar að kemur
7 og varpið öllum áhyggjum* ykkar á hann því að hann ber umhyggju fyrir ykkur.
8 Hugsið skýrt, verið á verði. Andstæðingur ykkar, Djöfullinn, gengur um eins og öskrandi ljón í leit að bráð til að gleypa.
9 Standið gegn honum staðföst í trúnni og vitið að allt bræðrasamfélag* ykkar um allan heim verður fyrir sömu þjáningum.
10 En eftir að þið hafið þjáðst um stutta stund mun Guð, sem sýnir einstaka góðvild í ríkum mæli, ljúka þjálfun ykkar, hann sem kallaði ykkur til eilífrar dýrðar sinnar vegna þess að þið eruð sameinuð Kristi. Hann mun efla ykkur, styrkja og gera óhagganleg.
11 Honum sé mátturinn að eilífu. Amen.
12 Með hjálp Silvanusar,* sem ég álít trúfastan bróður, hef ég skrifað ykkur í fáum orðum til að hvetja ykkur og til að vitna einlæglega um að Guð hafi sannarlega sýnt ykkur einstaka góðvild sína. Verið staðföst í henni.
13 Hún* sem er í Babýlon, og er útvalin eins og þið, biður að heilsa ykkur, og sömuleiðis Markús sonur minn.
14 Heilsið hvert öðru með kærleikskossi.
Megið þið öll sem eruð sameinuð Kristi eiga frið.
Neðanmáls
^ Eða „hvet ég því eindregið“.
^ Eða „Fylgist náið með henni“.
^ Eða „öldungunum“.
^ Eða „gyrðist“.
^ Eða „lítillæti“.
^ Eða „kvíða“.
^ Orðrétt „bræðralag“.
^ Einnig nefndur Sílas.
^ Fornafnið „hún“ virðist eiga við söfnuð.
