Fyrri Kroníkubók 13:1–14
13 Davíð ráðfærði sig við höfðingja þúsund manna flokka og hundrað manna flokka og alla hina leiðtogana.+
2 Síðan sagði Davíð við allan söfnuð Ísraels: „Ef ykkur líst vel á og ef það er Jehóva Guði okkar að skapi skulum við senda eftir bræðrum okkar sem eftir eru í öllum héruðum Ísraels og einnig prestunum og Levítunum sem búa í borgum sínum+ með tilheyrandi beitilöndum.
3 Við skulum sækja örk+ Guðs okkar.“ En fólkið hafði verið áhugalaust um örkina á dögum Sáls.+
4 Allur söfnuðurinn samþykkti þetta því að fólkinu fannst tillagan góð.
5 Davíð safnaði þá saman öllum Ísrael, frá Egyptalandsá* allt til Lebó Hamat,*+ til að sækja örk hins sanna Guðs til Kirjat Jearím.+
6 Davíð og allur Ísrael fór upp til Baala+ í Júda, það er að segja til Kirjat Jearím, til að sækja örk Jehóva, hins sanna Guðs sem situr í hásæti sínu yfir kerúbunum,*+ en frammi fyrir henni ákallar fólk nafn hans.
7 Örk hins sanna Guðs var sótt á nýjum vagni+ úr húsi Abínadabs. Ússa og Ahjó stjórnuðu vagninum.+
8 Davíð og allur Ísrael fögnuðu frammi fyrir hinum sanna Guði af öllum mætti, sungu og léku á hörpur og önnur strengjahljóðfæri, tambúrínur,+ málmgjöll+ og lúðra.+
9 En þegar þeir komu á þreskivöll Kídons lá við að uxarnir veltu vagninum. Þá rétti Ússa út höndina og greip í örkina.
10 Reiði Jehóva blossaði upp gegn Ússa og hann greiddi honum banahögg vegna þess að hann hafði gripið í örkina.+ Hann lét þar lífið frammi fyrir Guði.+
11 En Davíð gramdist það* að reiði Jehóva skyldi hafa brotist út gegn Ússa. Staðurinn var nefndur Peres Ússa* og heitir það enn þann dag í dag.
12 Davíð varð hræddur við hinn sanna Guð þennan dag og sagði: „Hvernig get ég flutt örk hins sanna Guðs til mín?“+
13 Davíð flutti ekki örkina heim til sín í Davíðsborg heldur lét fara með hana heim til Óbeðs Edóms í Gat.*
14 Örk hins sanna Guðs var á heimili Óbeðs Edóms í Gat í þrjá mánuði og Jehóva blessaði heimilisfólk hans og allt sem hann átti.+
Neðanmáls
^ Eða „Síhor í Egyptalandi“.
^ Eða „staðarins þar sem farið er inn í Hamat“.
^ Eða hugsanl. „á milli kerúbanna“.
^ Eða „féll það þungt“.
^ Sem þýðir ‚brýst út gegn Ússa‘.
^ Ef til vill er átt við borgina Gat Rimmon.