Hósea 1:1–11
1 Orð Jehóva sem kom til Hósea* Beerísonar á dögum Ússía,+ Jótams,+ Akasar+ og Hiskía+ Júdakonunga+ og á dögum Jeróbóams+ Jóassonar+ Ísraelskonungs.
2 Þegar Jehóva byrjaði að boða boðskap sinn fyrir milligöngu Hósea sagði Jehóva við hann: „Farðu og gifstu konu sem leggst í vændi* og eignast lausaleiksbörn því að landið hefur algerlega yfirgefið Jehóva með vændi* sínu.“+
3 Hann fór þá og giftist Gómer Diblaímsdóttur. Hún varð barnshafandi og fæddi honum son.
4 Þá sagði Jehóva við hann: „Láttu hann heita Jesreel* því að innan skamms dreg ég ætt Jehú+ til ábyrgðar fyrir blóðsúthellingar Jesreel* og bind enda á konungdæmi Ísraelsmanna.+
5 Á þeim degi brýt ég boga Ísraels í Jesreeldal.“*
6 Hún varð aftur barnshafandi og fæddi dóttur. Guð sagði við Hósea: „Láttu hana heita Ló Rúhama* því að ég mun ekki lengur miskunna+ Ísraelsmönnum heldur hrekja þá burt.+
7 En ég mun miskunna Júdamönnum+ og ég, Jehóva Guð þeirra, bjarga þeim.+ Ég bjarga þeim ekki með boga, sverði, bardaga, hestum né riddurum.“+
8 Þegar hún hafði vanið Ló Rúhama af brjósti varð hún aftur barnshafandi og fæddi son.
9 Þá sagði Guð: „Láttu hann heita Ló Ammí* því að þið eruð ekki fólk mitt og ég verð ekki Guð ykkar.
10 Ísraelsmenn verða eins margir og sandkorn sjávarins sem hvorki er hægt að mæla né telja.+ Og þar sem sagt var við þá: ‚Þið eruð ekki fólk mitt,‘+ þar verður sagt við þá: ‚Synir hins lifandi Guðs.‘+
11 Júdamönnum og Ísraelsmönnum verður safnað saman sem einni heild.+ Þeir munu velja sér einn leiðtoga og leggja af stað út úr landinu. Þetta verður stórkostlegur dagur fyrir Jesreel.+
Neðanmáls
^ Stytting nafnsins Hósaja sem merkir ‚bjargað af Jah; Jah hefur bjargað‘.
^ Eða „er siðlaus; er lauslát“.
^ Eða „siðleysi; lauslæti“.
^ Sem þýðir ‚Guð mun sá fræi‘.
^ Borgin þar sem konungar norðurríkisins Ísraels höfðu aðsetur.
^ Eða „á Jesreelsléttu“.
^ Sem þýðir ‚ekki miskunnað‘.
^ Sem þýðir ‚ekki fólk mitt‘.