HALTU VÖKU ÞINNI

Miklir þurrkar – hvað segir Biblían?

SPILA

„Kína greinir frá mestu hitabylgju og þriðja þurrasta sumri síðan mælingar hófust.“ – The Guardian, 7. september 2022.
„Hluti af Afríku þarf að þola hræðilega þurrka fimmta árið í röð.“ – UN News, 26. ágúst 2022.
„Einhvers konar þurrkaviðvörun er í gildi fyrir tvo þriðju hluta af Evrópu. Þetta er líklega versta slíka tilfellið í 500 ár.“ – BBC News, 23. ágúst 2022.

Margir sérfræðingar segja að slíkir þurrkar eigi eftir að halda áfram og jafnvel versna. Er einhver von um betri framtíð? Hvað segir Biblían?

Þurrkar og biblíuspádómar

Biblían sagði fyrir um okkar daga:

„Það verða hungursneyðir … á einum stað eftir annan.“ – Matteus 24:7.

Þurrkar leiða oft til hungursneyða. Þessar hungursneyðir, og þær þjáningar og dauði sem þær hafa í för með sér, uppfylla biblíuspádóm. – Opinberunarbókin 6:6, 8.

Hvers vegna eru þurrkar að versna?

Biblían segir frá einni meginástæðu þess að þurrkar fara versnandi. Hún segir:

„[Maðurinn] getur ekki einu sinni stýrt skrefum sínum á göngunni.“ – Jeremía 10:23.

Þetta þýðir að menn geta ekki með góðum árangri „stýrt skrefum sínum“, eða stjórnað sér sjálfum. Slæmar ákvarðanir þeirra leiða oft til þurrka og vatnsskorts.

Flestir vísindamenn eru sammála um að hlýnun jarðar sé af mannavöldum, en hún veldur því að það verða þurrkar um alla jörð.
Græðgi og skammsýnar stefnur leiða til skógareyðinga, mengunar og misnotkunar á náttúruauðlindum sem allt setur dýrmætan vatnsforða í hættu.

En Biblían gefur okkur von.

Er einhver von um framtíðina?

Biblían lofar að Guð muni leysa vatnsskortinn sem við búum við núna. Hvernig?

1. Guð mun „eyða þeim sem eyða jörðina“. (Opinberunarbókin 11:18) Hann mun fjarlægja eina af orsökum vatnsskorts – vont og gráðugt fólk sem fer illa með umhverfið. – 2. Tímóteusarbréf 3:1, 2.
2. „Sviðin jörðin verður að seftjörn.“ (Jesaja 35:1, 6, 7) Guð mun bæta allan þann skaða sem þurrkar hafa valdið og breyta jörðinni í paradís með nægum vatnsbirgðum.
3. „Þú annast jörðina, gerir hana frjósama og gjöfula.“ (Sálmur 65:9) Guð mun blessa jörðina og hún framleiða meira en nóg af góðum mat og hreinu vatni fyrir alla.