„Matartímarnir styrkja fjölskylduböndin“

BORÐAR fjölskylda þín saman að minnsta kosti einu sinni á dag? Því miður eru allir svo uppteknir nú á dögum að á mörgum heimilum eru matmálstímar orðnir fremur handahófskenndir og fólk borðar hvert á sínum tíma. En auk þess að næra líkamann geta sameiginlegir matmálstímar fjölskyldunnar stuðlað að einhverju sem við höfum jafnvel enn meiri þörf fyrir — hlýlegum tjáskiptum og sterkum fjölskylduböndum.

Algirdas býr í Litháen ásamt konu sinni Rimu og þrem dætrum. „Þótt ég vinni úti og stelpurnar séu í skóla skipuleggjum við okkur þannig að við getum borðað kvöldmat saman,“ segir hann. „Þegar við sitjum saman við matarborðið geta allir tjáð sig opinskátt og sagt frá því sem á daginn hefur drifið, talað um vandamál sín, hugsanir, áætlanir og hvað þeim líkar og hvað ekki. Við notum þennan tíma líka til að ræða um andleg málefni. Það er engin spurning að matartímarnir styrkja fjölskylduböndin.“

Rima bætir við: „Þegar ég matbý með stelpunum gefur það okkur líka tækifæri til að tala saman um persónuleg mál. Stelpunum finnst gaman að vinna saman í eldhúsinu og um leið öðlast þær færni í verklegum þáttum. Þannig getum við sameinað vinnu og skemmtun.“

Algirdas, Rima og dæturnar hafa haft mikið gagn af því að taka sér tíma til að borða saman. Ef þú gerir það ekki nú þegar væri þá ekki tilvalið að haga málum svo að fjölskyldan geti borðað saman að minnsta kosti einu sinni á dag, líka ef þú ert einstætt foreldri? Það sem þú leggur á þig muntu fá margfalt til baka.