FYRIR meira en 550 árum hóf þýski uppfinningamaðurinn Jóhannes Gutenberg að prenta með lausu letri. Fyrsta markverða bókin, sem kom úr prentvélinni, var Biblían. * Upp frá því hefur verið prentaður aragrúi bóka um allt milli himins og jarðar. Biblían ber hins vegar af þeim öllum.

• Áætlað er að prentaðir hafi verið yfir 4,7 milljarðar biblía (í heild eða hluta). Það eru meira en fimm sinnum fleiri eintök en af næstútbreiddasta ritinu, Rauða kverinu.

• Fyrir skemmstu var yfir 50 milljónum eintaka Biblíunnar eða hlutum hennar dreift á aðeins einu ári. „Biblían er metsölubók ársins á hverju ári,“ sagði í frétt í tímaritinu The New Yorker.

• Biblían hefur verið þýdd í heild eða að hluta á meira en 2400 tungumál. Yfir 90 prósent manna hafa aðgang að í það minnsta hluta Biblíunnar á sínu tungumáli.

• Um helmingur biblíuritaranna hafði lokið skrifum sínum fyrir fæðingu Konfúsíusar, hins þekkta kínverska heimspekings, og Siddharta Gautama, upphafsmanns búddatrúar.

• Biblían hefur haft geysimikil áhrif á listasöguna, þar á meðal á heimsins þekktustu málverk, tónverk og bókmenntir.

• Biblían hefur mátt þola bönn stjórnvalda, brennur trúarandstæðinga og árásir gagnrýnenda. Engin önnur bók sögunnar hefur sætt jafnmikilli andstöðu — og staðið hana af sér.

Finnst þér þessar staðreyndir ekki athyglisverðar? En að sjálfsögðu eru áhugaverðar staðreyndir og tölfræði ekki nægileg sönnun fyrir því að Biblían sé áreiðanleg. Næst skoðum við fimm ástæður sem hafa sannfært milljónir manna um að hægt sé að treysta Biblíunni.