Þú átt vin af hinu kyninu sem skilur þig. Þið getið talað um hvað sem er og það gerið þið. Þú telur þér trú um að þið séuð bara vinir. En maki þinn gæti verið á öðru máli ef hann vissi hvað þið eruð vön að tala lengi saman.

Þið eruð sennilega nú þegar of nánir vinir. Þú þarft að horfast í augu við það og gera eitthvað í málinu. En fyrst þarftu að átta þig á því hvers vegna þú hefur verið opinn fyrir slíku sambandi.

Þörf fyrir viðurkenningu. Það er einfaldlega þannig að flestum þykir gott að fá athygli frá hinu kyninu. Það kitlar hégómagirndina að vita að einhver kann að meta okkur og okkur finnst við aðlaðandi. Eftir dágóðan tíma í hjónabandi gæti þér fundist gott að fá viðurkenningu frá vini af hinu kyninu. En þú mátt vera viss um að það kostar sitt að leita út fyrir hjónabandið til að fá slíkum þörfum fullnægt. Þegar þú tengist öðrum en maka þínum tilfinningaböndum veikist samband ykkar hjónanna. Að vissu leyti ertu að svíkja maka þinn um þá ástúð sem þú ættir að sýna honum.

• Spyrðu þig: Hvaða þarfir hef ég sem þessi vinátta uppfyllir en væri betur sinnt innan hjónabandsins?

Athyglisþörf. Í Biblíunni kemur fram að hjónabandi fylgja alltaf einhverjir erfiðleikar. (1. Korintubréf 7:28) Stundum gæti þér til dæmis fundist að maki þinn vanræki þig eða meti þig ekki að verðleikum. Kannski hefurðu alið með þér gremju út af óleystum ágreiningi og maki þinn reynir að forðast að ræða slík mál. Það ergir þig og þú ert veikur fyrir athygli frá öðrum. Að sögn sumra sérfræðinga er það ávísun á óhamingju í hjónabandi að sópa vandamálunum undir teppið og getur jafnvel leitt til skilnaðar.

• Spyrðu þig: Er eitthvað sem vantar upp á samband okkar hjóna sem gerir mig veikari fyrir athygli frá hinu kyninu?

Þekktu hætturnar. Biblían segir: „Getur nokkur borið glóð í klæðafaldi án þess að föt hans sviðni?“ (Orðskviðirnir 6:27) Það er skaðlegt að leyfa sterkum tilfinningum til annars en maka síns að þróast. (Jakobsbréfið 1:14, 15) Málið snýst ekki bara um hvað getur gerst heldur hvað hefur þegar gerst. Ef þú sýnir öðrum óviðeigandi athygli ertu í rauninni að neita maka þínum um athyglina sem hann ætti að fá frá þér.

Ekki blekkja þig. Náin vinátta fær þig kannski til að velta fyrir þér hvernig lífið hefði orðið ef þið hefðuð gifst. En að öllum líkindum ertu að bera saman styrkleika vinar þíns eða vinkonu og veikleika maka þíns. Það er ósanngjarn samanburður, svo ekki sé meira sagt. Og gleymdu ekki að tilfinningin, sem vinur þinn eða vinkona kveikir hjá þér, er sennilega sú sama og þú barst í fyrstu til maka þíns. – Meginregla: Jeremía 17:9.

Settu mörk. Fólk setur upp þjófavarnarkerfi á heimilum sínu og í ökutækjum. Þú getur gert eitthvað svipað fyrir hjónaband þitt. „Varðveit hjarta þitt framar öllu öðru,“ segir Biblían. (Orðskviðirnir 4:23) Hvernig fer maður að því? Prófaðu þetta:

• Sýndu að þú sért frátekinn. Það geturðu meðal annars gert með því að hafa mynd af maka þínum á vinnustaðnum. – Meginregla: 1. Mósebók 2:24.

• Ákveddu hvar mörkin liggja í samskiptum þínum við hitt kynið. Til dæmis væri varla viðeigandi að ræða um vandamál ykkar hjóna eða fara út að borða með vinnufélaga af hinu kyninu.

• Ef þú ert of náinn einhverjum af hinu kyninu skaltu slíta sambandinu. Ef þér finnst það of mikið mál ættirðu að spyrja þig hvers vegna. Í stað þess að verja vináttusambandið skaltu standa vörð um hjónaband þitt og hugsa um maka þinn. – Meginregla: Orðskviðirnir 5:18, 19.