Á árunum 1997-2011 fannst fjöldi áður óþekktra tegunda plantna og dýra á Stór-Mekong-svæðinu en það nær yfir Kambódíu, Laos, Mjanmar, Taíland, Víetnam og Yunnan-hérað í Kína. Ein þeirra er rauðeygði grópsnákurinn (Trimeresurus rubeus). Af þeim tegundum, sem fundust árið 2011, voru 82 plöntur, 21 skriðdýr, 13 fiskar, 5 froskdýr og 5 spendýr. Þetta kemur fram í greinargerð Alþjóðanáttúruverndarsjóðsins (WWF).

Mansal er orðið alvarlegt vandamál í „öllum aðildarríkjum Evrópusambandsins,“ segir í frétt í dagblaðinu The Moscow Times. Fólk er selt í kynlífsþrælkun og þrælkunarvinnu og jafnvel er stunduð „ólögleg verslun með líffæri“. Þeir sem selja fólk mansali notfæra sér fátækt, atvinnuleysi og misrétti kynjanna.

Rannsakendur, sem könnuðu sjónvarpsáhorf barna og unglinga, ályktuðu að „tengsl séu á milli of mikils sjónvarpsgláps og andfélagslegrar hegðunar snemma á fullorðinsárunum“. Þeir segja niðurstöðurnar renna stoðum undir þær ráðleggingar að börn ættu að horfa á „vandað dagskrárefni og ekki lengur en í eina eða tvær klukkustundir á dag“.

Næstum öll þorp frumbyggja í Alaska liggja við strendur eða árbakka og 86 prósent þorpanna verða fyrir áhrifum flóða og landrofs. Sagt hefur verið að vegna hækkandi hitastigs myndist strandís heldur seinna á árinu og eru strendurnar því berskjaldaðri fyrir haustvindunum.

Þrátt fyrir gríðarlegar fjárfestingar í hreinni orku á borð við vind- og sólarorku er „meðal-orkueiningin, sem framleidd er nú til dags, álíka óhrein og fyrir 20 árum,“ segir Maria van der Hoeven, forstjóri Alþjóðaorkumálastofnunarinnar (IEA).