En sumir makar leyfa tækninni að …

• ræna frá þeim dýrmætum samverustundum.

• verða til þess að þeir komi með vinnuna heim að óþörfu.

• skapa vantraust og jafnvel valda ótrúmennsku.

SAMVERUSTUNDIR

Eiginmaður sem heitir Michael segir: „Stundum þegar við hjónin erum saman er hún í raun víðs fjarri. Hún er á fullu í símanum og segir: ‚Ég hef ekki haft tíma til að skoða símann fyrr en núna.‘“ Eiginmaður sem heitir Jonathan segir að við slíkar aðstæður „geti hjón verið saman en samt sé órafjarlægð milli þeirra“.

TIL UMHUGSUNAR: Hversu oft gerist það að símhringing, skilaboð eða tilkynning í símann trufli gæðastund sem þú gætir átt með maka þínum? – EFESUSBRÉFIÐ 5:33.

VINNAN

Sumir þurfa vegna vinnu sinnar að vera til taks allan sólarhringinn. Aðrir sem ekki stunda svo krefjandi starf eiga engu að síður erfitt með að slíta sig frá vinnunni þegar vinnudeginum lýkur. „Ég á erfitt með að skoða ekki öll símtöl og skilaboð sem tengjast vinnunni, jafnvel á þeim stundum sem ég hef tekið frá til að vera með konunni minni,“ viðurkennir Lee. Joy, sem er eiginkona, segir: „Ég vinn heima hjá mér þannig að vinnan er alltaf á staðnum. Það er átak fyrir mig að gæta jafnvægis.“

TIL UMHUGSUNAR: Veitir þú maka þínum óskipta athygli þegar hann eða hún talar við þig? – LÚKAS 8:18.

TRYGGÐ

Könnun nokkur leiddi í ljós að notkun samskiptamiðla vekti oft grunsemdir sem aftur leiddu til hjónaerja. Tíu af hundraði þeirra sem voru spurðir viðurkenndu að þeir settu inn færslur á netið sem þeir héldu leyndum fyrir maka sínum.

Það er ekki að ástæðulausu að samskiptamiðlar hafi verið kallaðir „jarðsprengjusvæði fyrir hjónabönd“ og jafnvel „framhjáhaldsþjónusta“. Það kemur því ekki á óvart að lögfræðingar sem sinna skilnaðarmálum skuli segja að samskiptamiðlar eigi drjúgan þátt í mörgum skilnaðarmálum.

TIL UMHUGSUNAR: Felurðu samskipti við einstaklinga af gagnstæðu kyni fyrir maka þínum? – ORÐSKVIÐIRNIR 4:23.

FORGANGSRAÐAÐU

Sá sem ekki nærist getur ekki viðhaldið heilsunni. Eins er um þann sem vanrækir samverustundir með maka sínum – hann mun eiga erfitt með að viðhalda heilbrigðu hjónabandi. – Efesusbréfið 5:28, 29.

Ræðið tillögurnar hér að neðan eða skrifið niður ykkar hugmyndir um það hvernig þið getið komið í veg fyrir að tæknin trufli hjónabandið.

• Borða saman í það minnsta einu sinni á dag.

• Skapa okkur stundir þar sem við höfum slökkt á tækjunum.

• Skipuleggja stefnumótakvöld eða annan tíma saman.

• Hafa slökkt á tækjunum á nóttinni og taka þau ekki með inn í svefnherbergið.

• Taka frá 15 mínútur á dag til að tala saman og hafa tækin ekki innan seilingar.

• Slökkva á nettengingunni á vissum tíma.