ÞEGAR við fáum einstaka gjöf ættum við að finna okkur knúin til að sýna þakklæti okkar. Jesús benti á það þegar hann hafði læknað tíu menn af sjúkdómi sem var ólæknandi á þeim tíma. Einn af mönnunum tíu „sneri aftur ... og lofaði Guð hárri raustu“. Jesús sagði: „Urðu ekki allir tíu hreinir? Hvar eru hinir níu?“ (Lúkas 17:12-17) Af þessu má sjá að við getum verið fljót að gleyma því góða sem gert er fyrir okkur.

Lausnarfórnin er einstök gjöf. Hún er mesta gjöf sem nokkurn tíma hefur verið gefin. Hvernig ættum við þá að bregðast við því sem Guð hefur gert fyrir okkur?

• Kynnstu gefandanum. Lausnarfórnin færir ekki öllu mannkyni sjálfkrafa eilíft líf. Jesús sagði í bæn til Guðs: „Það er hið eilífa líf að þekkja þig, hinn eina sanna Guð, og þann sem þú sendir, Jesú Krist.“ (Jóhannes 17:3) Ef einhver segði þér að ákveðinn maður hefði bjargað lífi þínu þegar þú varst barn, hefðirðu þá ekki áhuga á að fræðast um hann og fá að vita hvers vegna hann bjargaði þér? Jehóva Guð gaf lausnarfórnina sem bjargar lífi fólks og  hann vill ekki bara að þú vitir hver hann er heldur að þú eignist náið vináttusamband við hann. Biblían hvetur okkur: „Nálægið ykkur Guði og þá mun hann nálgast ykkur.“ – Jakobsbréfið 4:8.

• Trúðu á lausnarfórnina. „Sá sem trúir á soninn hefur eilíft líf.“ (Jóhannes 3:36) Hvað felst í því að trúa? Trúna þarf að sýna í verki. (Jakobsbréfið 2:17) Hvaða verk sýna að við trúum? Þú þarft að þiggja gjöf til að hún verði þín. Þú verður því að þiggja lausnarfórnina. Hvernig geturðu gert það? Með því að kynna þér hvernig Guð vill að þú verjir lífinu og breyta síðan í samræmi við það. * Biddu Guð um fyrirgefningu og hreina samvisku. Nálgastu hann í fullu trausti þess að lausnarfórnin tryggi öllum sem trúa á hana eilífa framtíð í friði, öryggi og hagsæld. – Hebreabréfið 11:1.

• Vertu viðstaddur minningarhátíðina um dauða Jesú. Jesús stofnaði til árlegrar minningarhátíðar til að minna okkur á lausnarfórnina. Hann sagði um þessa hátíð: „Gerið þetta í mína minningu.“ (Lúkas 22:19) Vottar Jehóva minnast dauða Jesú eftir sólarlag þriðjudaginn 11. apríl 2017. Dagskráin stendur yfir í um það bil eina klukkustund. Fluttur verður fyrirlestur um hvaða þýðingu fórnardauði Jesú hefur og hvernig hann gagnast mönnum, bæði nú og í framtíðinni. Í fyrra voru um 20 milljónir viðstaddar minningarhátíðina um allan heim. Við bjóðum þig hjartanlega velkominn að vera með okkur þetta kvöld í þakklætisskyni fyrir mestu gjöf Guðs.