Líf getur ekki þrifist á jörðinni án sólarinnar. Sólin sér trjánum fyrir orku til að mynda lauf, blóm, ávexti, hnetur og fræ. Sólin veldur því einnig að trén draga til sín vatn úr jarðveginum gegnum ræturnar og flytja það upp í laufin og þaðan gufar það upp í andrúmsloftið.

Rigningin er einstök gjöf frá Guði en hún gerir jörðinni kleift að framleiða fæðu handa okkur. Guð gefur okkur regn af himni og uppskerutíma. Hann veitir okkur næga fæðu og fyllir hjörtu okkar gleði.

Margir feður hafa áhyggjur af því að geta ekki séð fjölskyldu sinni fyrir nægum mat og fötum. Taktu eftir því sem segir í Ritningunni: „Virðið fyrir ykkur fugla himinsins. Þeir hvorki sá né uppskera né safna í hlöður en faðir ykkar á himnum fóðrar þá samt. Eruð þið ekki meira virði en þeir?“ – Matteus 6:25, 26.

„Lærið af liljum vallarins, hvernig þær vaxa ... en ég segi ykkur að jafnvel Salómon [konungur] í allri sinni dýrð var ekki eins fallega klæddur og ein þeirra. Fyrst Guð prýðir þannig gróður vallarins ... skyldi hann þá ekki miklu frekar klæða ykkur?“ – Matteus 6:28–30.

Fyrst Guð getur séð okkur fyrir mat og fötum getur hann án efa líka séð okkur fyrir öðrum lífsnauðsynjum. Ef við leggjum okkur fram um að gera vilja Guðs getur hann blessað viðleitni okkar til að rækta mat eða hjálpað okkur að finna vinnu svo að við getum keypt nauðsynjar. – Matteus 6:32, 33.

Þegar við hugsum um sólina, regnið, fuglana og blómin sjáum við að við höfum fulla ástæðu til að elska Guð. Næsta grein fjallar um hvernig skaparinn hefur átt samskipti við mennina.