666 — ekki aðeins ráðgáta

„Að enginn geti keypt eða selt, nema hann hafi merkið, nafn dýrsins, eða tölu nafns þess. Hér reynir á speki. Sá sem skilning hefur reikni tölu dýrsins, því að tala manns er það, og tala hans er sex hundruð sextíu og sex.“ — Opinberunarbókin 13:17, 18.

ÞAÐ er fátt í Biblíunni sem hefur vakið jafnmikinn áhuga og spádómurinn um hið dularfulla merki eða nafn „dýrsins“, það er að segja talan 666. Endalausar getgátur um merki dýrsins hafa verið í sjónvarpi, kvikmyndum, bókum, blöðum og á Netinu.

Sumir trúa því að 666 sé merki andkrists sem Biblían talar um. Aðrir segja að talan tákni einhvers konar merki, eins og húðflúr eða örflögu með stafrænum kóða sem grædd sé í fólk gegn vilja þess og merki það sem þjón dýrsins. Enn aðrir telja 666 vera merki páfadómsins. Þeir taka eina mynd af opinberum titli páfans, Vicarius Filii Dei (fulltrúi sonar Guðs), setja rómverska tölustafi í stað bókstafanna, hagræða tölunum lítið eitt og fá þá út 666. Því hefur einnig verið haldið fram að sömu tölu megi reikna út úr latnesku nafni rómverska keisarans Díókletíanusar og hebresku nafni Nerós keisara. *

Þessar langsóttu og óraunhæfu túlkanir á merki dýrsins eru hins vegar mjög frábrugðnar því sem Biblían segir um málið eins og við munum sjá í næstu grein. Biblían greinir frá því að þeir sem hafi merki dýrsins muni finna fyrir reiði Guðs þegar hann bindur enda á núverandi heimskerfi. (Opinberunarbókin 14:9-11; 19:20) Að skilja merkingu tölunnar 666 er því annað og meira en að leysa athyglisverða ráðgátu. Sem betur fer hefur Jehóva Guð, sem er persónugervingur kærleikans og uppspretta andlegs ljóss, upplýst þjóna sína um þetta mikilvæga mál. — 2. Tímóteusarbréf 3:16; 1. Jóhannesarbréf 1:5; 4:8.

[Neðanmáls]