Hver eða hvað er Orð Guðs?

SPILA

Svar Biblíunnar

Orðasambandið „orð Guðs“ á yfirleitt við boðskap frá Guði. (Lúkas 11:28) Á nokkrum stöðum er „Orð Guðs“ eða „Orðið“ notað sem titill persónu. – Opinberunarbókin 19:13; Jóhannes 1:14.

Boðskapur frá Guði. Spámennirnir sögðu oft að boðskapurinn sem þeir færðu væri orð Guðs. Jeremía hóf til dæmis spádómlegan boðskap sinn á því að segja: „Orð Jehóva kom til mín.“ (Jeremía 1:4, 11, 13; 2:1) Áður en spámaðurinn Samúel tilkynnti Sál að Guð hefði valið hann sem konung sagði hann: „Staldra þú við … svo að ég geti flutt þér orð Guðs.“ – 1. Samúelsbók 9:27.

Titill persónu. „Orðið“ kemur líka fyrir í Biblíunni sem titill Jesú Krists, bæði sem andi á himni og sem maður á jörðinni. Skoðum nokkrar ástæður fyrir því að við segjum það:

Orðið var til á undan allri annarri sköpun. „Í upphafi var Orðið … Hann var í upphafi hjá Guði.“ (Jóhannes 1:1, 2) Jesús er „frumburður alls sem er skapað. Hann var til á undan öllu öðru.“ – Kólossubréfið 1:13–15, 17.
Orðið kom til jarðar sem maður. „Orðið varð maður, hann bjó meðal okkar.“ (Jóhannes 1:14) Jesús Kristur „afsalaði sér öllu og varð eins og þræll, eins og hver annar maður“. – Filippíbréfið 2:5–7.
Orðið er sonur Guðs. Eftir að Jóhannes sagði: „Orðið varð maður“, eins og nefnt var hér á undan, sagði hann: „Við sáum dýrð hans, slíka dýrð sem einkasonur fær frá föður.“ (Jóhannes 1:14) Jóhannes skrifaði líka: ‚Jesús er sonur Guðs.‘ – 1. Jóhannesarbréf 4:15.
Orðið býr yfir guðlegum eiginleikum. „Orðið var guð“, eða „guðlegt“. (Jóhannes 1:1, neðanmáls) Jesús er „endurskin dýrðar Guðs og nákvæm eftirmynd hans“. – Hebreabréfið 1:2, 3.
Orðið ríkir sem konungur. Í Biblíunni segir að á höfði Orðs Guðs séu „mörg konungleg höfuðbönd“. (Opinberunarbókin 19:12, 13, neðanmáls) Orðið er líka kallað „konungur konunga og Drottinn drottna.“ (Opinberunarbókin 19:16) Jesús er einnig kallaður „konungur konunga og Drottinn drottna“. – 1. Tímóteusarbréf 6:14, 15.
Orðið er talsmaður Guðs. Titillinn „Orðið“ á greinilega við um þann sem Guð notar til að koma á framfæri upplýsingum og leiðbeiningum. Jesús sagðist sinna því hlutverki: „Faðirinn sem sendi mig [hefur] sagt mér hvað ég eigi að segja og um hvað ég eigi að tala … Allt sem ég segi tala ég því eins og faðirinn hefur sagt mér.“ – Jóhannes 12:49, 50.