Ibhio mhan ne bunbun ne zedu ebe nesẹmhan, ofisi nan da zedu ebe ele da wẹnna, ọ iyi Bẹtẹ. Bezẹle nin ọne emhanmhan nan da mhẹn? Be hi emhin kẹkẹ nọn khẹke nin ene zedu ebe ha mhọnlẹn bhi ọfisi nan da zedu ebe nọn ha rẹkpa ele ha wẹnna nọnsẹn? Sẹyẹ, uwedẹ nela eji ọne ọfisi nan ye ha rẹ sabọ rẹkpa ene zedu ebe ha zedu ebe nọnsẹn?

 Ranmhude eji a da zẹ ọne urolo a mun ọfisi nan da zedu ebe fiọ i, ibhio mhan ne zedu ebe ki sabọ ha nyẹnlẹn bhi ẹwẹ ẹbho ne zẹ ọne urolo. Obhio mhan nin Karin, nọn zedu ebe diọ bhi Low German da yọle: “Nin mhan rẹ diọ bhi ọne ọfisi bhi Cuauhtémoc, Chihuahua bhi Mexico, mhan ki wo zẹ urolo iLow German ẹghe rebhe. Mhan ki wo ne ene imhan ko zedu ebe, ene imhan kere bhi inẹbho, bi ene imhan ne dẹ emhin bhi ẹki zẹ ọne urolo. Urolo nọnsẹmhan, ọle mhan ki wo zẹ. Mhan wo kẹ họn itan nọn ki bue nin mhan họnlẹn, yẹ họn uwedẹ nin ẹbho ki rẹ zẹ ọne urolo bhi ẹghe nan nian.”

 Obhio man nin James nọn deba zedu ebe diọbhi urolo Frafra da yọle ghe, ọ ba ọle bhi egbe ghe ọle iyẹ wẹnna bhi ẹwẹ ibhio mhan ne ribhi Bẹtẹ. Sokpan ọle da yọle: “Ọ wo yẹẹ mẹn rẹ ha wẹnna bhi ọne ọfisi, yẹ re urolo nọnsẹmhan tẹmhọn Osẹnobulua. Sẹyẹ, uwedẹ nin ẹbho rẹ wo kaehọ ẹmhọanta nọnsẹn yẹ wo manman ti mẹn bhọ.”

 Be ibhio mhan rẹ lẹn yẹ eji ọ khẹke nan mun ọfisi nan da zedu ebe fiọ i? Obhio mhan nin Joseph, nin ọkpa bhi ene wẹnna bhi Ọfisi Nọn Mhọn Obọ bhi Uwa Oga Nan Bọn bhi Otọ Agbọn Rebhe, nọn ribhi Warwick, New York bhi U.S.A, da yọle: “Ọnọghọ ọkpa nin mhan miẹn hi, bhi ijeso, ukpa, amẹn la intanẹt nan rẹ wẹnna iribhọ. Bhiriọ, ahamiẹn mhan guanọ eji mhan ha mun ọne ọfisi fiọ i, mhan ki fẹ ije kẹkẹ nan da zẹ ọne urolo ghe, nin mhan da sabọ lẹn eje mẹn nẹ nan ha mun ọne ọfisi fiọ i.”

 Emhin nin agbotu kẹ lu rẹ te igho hi, ele ki mun ọne ọfisi fiọ bhi Asẹmbli Họọ, Kindọn Họọ la uwa ọsi ene imisiọnari nin ẹbho ne zedu ebe dọ ha wẹnna bhi enin. Ahamiẹn ghe ene uwa oga nan soso iribhi eji a ha mun ọne ọfisi ọi, agbotu ki dẹ uwa nin ele ha da sabọ ha nyẹnlẹn yẹ wẹnna. Bhiriọ, ahamiẹn emhin fidenọ bhi ẹghe odalo, agbotu ki sabọ khiẹn ene uwa nan yẹ noo ọne igho rẹ lu emhin ọbhebhe.

 Bhi ukpe iwẹnna oga ọsi 2020, mhan da noo $13,000,000 (U.S) rẹ dẹ emhin kẹkẹ nan noo bhi ene ọfisi. Emhin eso nan ne nin ibhio mhan ne wẹnna bhi ene ọfisi nan hi, ikọmputa, emhin nan noo bhi ẹkẹ ikọmputa, emhin kẹkẹ nan rẹ rẹkọd, intanẹt, bi emhin nekẹle. Igho nan rẹ dẹ ikọmputa ọkpa nin otuọnkpa ha noo bi ene emhin nekẹle nan noo rẹkhan ọlẹn dẹ sabọ ghan sẹbhi $750 (U.S.). A ki ne emhin nan rẹ zedu ebe ọbhọ bọsi, emhin natiọle Watchtower Translation System, nọn rẹkpa ele rẹ mhanmhan iwẹnna nesele, yẹ rẹ guanọ otọ ebi ele zedu ọle. A ki yẹ dẹ emhin kẹkẹ nekẹle nan noo bhi ẹkẹ ọle ọbhọ.

 Agbotu da yẹ ne ebi a rẹ rẹkọd nin ene ibhio mhan ne zedu ebe, nin ele ha noo ọle rẹ rẹkọd bhi ene ọfisi. Rẹ na ẹghe nin corona virus rẹ munhẹn, ibhio mhan ne bunbun ne zedu ebe da sabọ ne ene emhin nan rẹ rẹkọd ha khian uwa nọnsele, beji a da miẹn ghe, ele ki sabọ ha noo ele rẹ rẹkọd vidio bi emhin nekẹle bhi uwa.

 Ibhio mhan ne ribhi eji ene ọfisi nan ye wo miẹn ọne isẹhoa rẹ ha zegbere rẹ rẹkpa fẹ ebe nan zedu ọle diọbhi urolo nọnsele ghe, yẹ rẹkpa hẹnhẹn ene ọfisi. Obhio mhan natiọle Cirstin, nọn wẹnna bhi ọfisi nan da zedu ebe nesẹmhan diọbhi urolo Afrikaans, bhi Cape Town nọn ribhi South Africa da yọle: “Ibhio mhan ne bunbun, rẹ sẹbhi ene ekanẹfan wo miẹn ọne isẹhoa nian rẹ ha deba mhan wẹnna bhi enan.”

 Ọne isẹhoa nan rẹ zegbere wo manman yẹẹ ene ibhio mhan. Obhio mhan ọkpa nin okhuo yọle ghe, nan rẹ ha wẹnna bhi ọne ọfisi wo fu ọle bhi egbe. Ibhio mhan eso ne ribhi eji ọne ọfisi ye wo vae dọ ha rẹkpa rẹkọd. Juana, nin ọkpa bhi ibhio mhan ne zedu ebe diọbhi urolo Totonac bhi Veracruz nọn ribhi Mexico da yọle: “Beji a miẹn ghe mhan sikẹ eji a da zẹ urolo nin mhan zedu ọle, ọ ki wo lẹkhẹ nin ibhio mhan nin ikpea bi ikhuo rẹ vae dọ ha rẹkọd ividio nin mhan bi rẹkọd nan kaehọ ọle.”

 Ene ọfisi nan da zedu ebe nesẹmhan be sẹ rẹkpa ibhio mhan bhi uwedẹ nin ele rẹ zedu ebe? Ẹbho ne bunbun ne tie ebe nesẹmhan yọle ehe. Obhio mhan nin Cédric nọn wẹnna bhi ọfisi nan da zedu ebe nesẹmhan diọbhi urolo Kongo, bhi Democratic Republic of Congo da yọle: “‘Urolo iKongo ọsi ebe Watch Tower,’ ọle ibhio mhan rẹ ha tie urolo iKongo nin mhan ka rẹ ha zedu ebe nesẹmhan, ranmhude, ọ iyi uwedẹ nin ẹbho rẹ zẹ urolo iKongo ukpẹdẹ-ukpẹdẹ mhan rẹ ha zedu ebe nesẹmhan. Sokpan, ejayenan nian, uwedẹ nin ẹbho rẹ zẹ urolo iKongo ukpẹdẹ-ukpẹdẹ, ọle mhan ki rẹ zedu ebe nesẹmhan.”

 Obhio mhan nin Andile nọn zedu ebe nesẹmhan diọbhi urolo iXhosa yọle ghe iriọ ẹbho yẹ ta bhi South Africa. Ọle da yọle: “Ẹbho ne bunbun taman mhan ghe, ele daghe ọle ghe, uwedẹ nin mhan ki rẹ zedu ebe nesẹmhan nian wo fidenọ. Ibhokhan ne ka rẹ ha tie ebe Ọkhẹughe bhi urolo English ki tie ọsi urolo iXhosa nian. Uwedẹ nin mhan ki rẹ zedu New World Translation ọsọgbọn diọbhi urolo nọnsẹmhan nan noo ukpẹdẹ-ukpẹdẹ wo manman yẹẹ ele.”

 Igho nin bha re re nan rẹ rẹkpa iwẹnna oga nan lu bhi otọ agbọn rebhe, bi ọne ibha noo donate.pr418.com re re, ọle imhan rẹ ha lu ene ọfisi nan da zedu ebe nesẹmhan, hẹnhẹn ele, yẹ rẹ gbẹloghe ibhio mhan ne wẹnna bhọ.