“Bhi ẹghe nọn bha ree gbe nian, mhan da ha riale ghe, ọ ida lẹkhẹ nin mhan rẹ ha nabhi intanẹt ha le ebale oriọn.” Uwẹ be yẹ ye ene ikpọta nin re nin obhio mhan nin Geoffrey Jackson tale bhi vidio ọsi Ebi Otu Nọn Sun Oga Ji Mhan Lẹn bhi Ukpe 2020 #6? Ọle da yẹ yọle: “Sokpan, bhi ọne ẹghe corona virus nan nian, be ọ ha rẹ dia yẹ sade mhan imhọn JW Library? Otọ ree nin Jehova mọn da rẹkpa mhan nin mhan da sabọ muegbe khẹ emhin ne sẹnian ne da sunu.”

 Be Jehova rẹ ha mun mhan egbe khẹ ene emhin nan yẹ? Iwẹnna nela ibhio mhan lu, nin ele rẹ sabọ lu JW Library app? Iwẹnna nela ribhọ nan rẹ sabọ ha ne emhin ba ọne JW Library yẹ hẹnhẹn ọle ọi?

 Bhi Mee 2013, Otu Nọn Sun Oga da taman dipatmẹnt natiọle MEPS Programming bhi Bẹtẹ nọn kokhun nẹ ghe, nin ele lu app ọkpa nan ha sabọ mun Baibo natiọle New World Translation nan kie zedu ọle ọi. Obhio mhan nin Paul Willies, nin ọkpa bhi ene wẹnna bhi dipatmẹnt ọsi MEPS Programming da yọle: “Rẹ sẹ ọne ẹghe nin, mhan bha sẹ ka ha mhọn app soso khẹ. Mhan da mhanmhan usun nọn ha lu ọne iwẹnna nan, mhan da zobọ bhi iwẹnna eso fo, yẹ deba dipatmẹnt kẹkẹ lu ọne app nan, yẹ mhanmhan emhin nan ha ne ku ọbhọ. Mhan da ha nan erọnmhọn ẹghe rebhe. Jehova da wo rẹkpa mhan. Bhi ẹkẹ uki isẹn, mhan da sabọ lu ọne app fo yẹ re ọle dagbare bhi ikolo ukpe nan do bhi ọne ukpe nin!”

 Ẹsọn nọn sẹ ọle bhi egbe hi, ebi a ha rẹ sabọ lu ọne app yẹ nọn kiẹn aza nan ha sabọ ha ne ebe ne bunbun ọi bhi urolo kẹkẹ. Bhi Jẹnuare 2015, ebe nan gbẹn bhi urolo ebo, ọle ọkpa ha ribhi ọne app. Sokpan, uki ehan ki gbera, ẹbho da sabọ ha danlod ene ebe bhi urolo ne bunbun nekẹle.

 Rẹ na ẹghenin ha vade, ene ibhio mhan wo lu iwẹnna kẹkẹ nin ele da sabọ ha ne emhin ba ọle, emhin bọsi vidio nesẹmhan. Ele da yẹ sabọ ne ebe bi vidio nan noo bhi ikolo oga ọbhi ijan ọkpa, sẹyẹ, ele da yẹ sabọ lu ọle nan miẹn ghe, ọria ha tie Baibo, ọle ki sabọ noo Research Guide rẹ guaotọ ọne ulọnlẹn nin ọle tiele.

 Ọ gbera foni la kọmputa ẹbo 8 ne nabhi JW Library ẹdẹ-ẹdẹ. Sẹyẹ, ọ gbera foni la kọmputa ẹbo 15 ne nabhọ uki-uki! Be ọ khẹke nan lu beji a ha da miẹn ghe, JW Library ki sabọ ha wẹnna nọnsẹn bhi ene foni la kọmputa? Obhio mhan nin Willies da yọle: “A ida sabọ noo ẹho nọn ribhi app ọkpa fo. Mhan wo wẹnna kaka nin mhan rẹ ha ne emhin ọgbọn ba ọle, beji a ha da miẹn ghe ọ ki ha lẹkhẹ nan rẹ noo. Beji a miẹn ghe ene lu foni la kọmputa ne emhin ọgbọn ọbhọ nin ele sabọ ha wẹnna nọnsẹn, iriọ mhan yẹ rẹ wẹnna bhi ọne app nan, beji a ha da miẹn ghe ọne app ki sabọ ha wẹnna bhi ene foni la kọmputa. Ọ yẹ khẹke nin mhan ha hẹnhẹn eji mhan ne emhin ọi bhi ẹkẹ intanẹt, beji a ha da miẹn ghe vidio bi ebe kẹkẹ nan ne dagbare ki sabọ ha nabhi JW Library beji a miẹn ghe ele ki ha bun ọbhọ.” A ha ka ebe rebhe nan zedu ọle diọbhi urolo kẹkẹ ne ribhi JW Library, ọ sẹbhi 200,000, sẹyẹ, vidio bi rẹkọd nan kaehọ ọle ne ribhi ẹkẹ ọle gbera 600,000!

 Nin ọne JW Library app rẹ sabọ ha wẹnna nọnsẹn, ọ iyi kọmputa khọnkhan ọkpa a ha noo rẹ ha wẹnna ọbhọ, ọ yẹ khẹke nan ha haosa ọbhi ọne emhin nan rẹ wẹnna bhi ẹkẹ ọle. Igho nan ha bhi ọkpa bhi ene emhin ukpe-ukpe sẹbhi ₦629,250 ($1,500 ọsi U.S.). Rẹ deba ọnin, ukpe-ukpe, ọle dipatmẹnt ọsi MEPS Programming rẹ noo igho nọn sẹbhi ₦4,195,000 ($10,000 ọsi U.S.) bhi foni bi kọmputa nin kọpini kẹkẹ lu, beji a ha da miẹn ghe ọne JW Library ki sabọ ha wẹnna bhi foni la kọmputa ọsọgbọn.

 Ranmhude JW Library nin mhan ki noo, igho nin mhan rẹ print ebe, nin mhan rẹ gban ebe, bi nin mhan rẹ je ọle ji ibhio mhan ki manman si re otọ. Bha ji mhan noo ebe natiọle Ha Luẹ IBaibo Ukpẹdẹ-ukpẹdẹ rẹ lu ijiẹmhin. Bhi ukpe 2013, khere kẹre nọn rẹ sẹ ẹbo 12 nan print bhi ọne ebe. Sokpan bhi ukpe 2020, ebe sẹbhi ẹbo isẹn ọkpa mhan print, arẹmiẹn ghe bhi otọ agbọn rebhe, itue 700,000 mhan rẹ bun gbera ọsi 2013. Bezẹle nọn da ki re iriọ si re otọ? JW Library a ibhio mhan ne bunbun ki noo rẹ tie ebe-ukpẹdẹ.

 Ene noo JW Library wo miẹn elele ne bunbun bhọ. Geneviève, nọn nyẹnlẹn bhi Canada yọle ghe, ọne app nan wo rẹkpa ọle rẹ ha luẹ Baibo gbera ọnikhẹ. Ọle da yọle: “Nin mẹn ta ẹmhọanta, sade ebe kẹkẹ mẹn yono dagbare rẹ luẹ Baibo, mẹn irẹ sabọ ha luẹ Baibo ọsewewiẹ ukpẹdẹ-ukpẹdẹ. Sokpan, mẹn ha wo tuje JW Library a bhi foni nọnsẹmhẹn, emhin rebhe wo ribhi ẹkẹ ọle nin mẹn ha noo rẹ lu iluẹmhin Baibo nọnsẹmhẹn. Ọne iluẹmhin Baibo nin mẹn lu ẹghe-ẹghe nan, ki wo dọ ziẹn urẹọbhọ nọnsẹmhẹn yẹ re mẹn ha lu re alo bhi oga.”

 Ọne app manman wo rẹkpa bhi ọne ẹghe corona virus nan. Charlyn nọn nyẹnlẹn bhi United States da yọle: “Ranmhude emianmhẹn corona virus nọn gba otọ agbọn rebhe, ọ gbera ukpe ọkpa nian nin mẹn bha sẹ rẹ miẹn ebe ọsọgbọn nin agbotu ne dagbare. Sokpan, ranmhude JW Library, mhan da wo sabọ ha miẹn ebale oriọn le. Mẹn wo manman khuẹnmhẹn Jehova bhi emhin nọn sẹnian.”

 Obhio mhan nin Faye, nọn nyẹnlẹn bhi Philippines da yọle: “Ọne JW Library app nan wo manman rẹkpa mẹn rẹ sikẹ Jehova. Ọle hi emhin nin mẹn ka tie ọsewewiẹ, ọle hi emhin nin rẹ kaehọ illo sade mẹn wẹnna bhi uwa, ọle mẹn yẹ noo rẹ muegbe ikolo oga. Ọle mẹn noo rẹ luẹ Baibo nọnsẹmhẹn. Mẹn ghe vidio bhi ẹkẹ ọle sade mẹn re egbe re ahoho. Mẹn re ọle tie Biabo bi uhọnmhọn-ọta kẹkẹ bhi eji ọ hi ki rẹ khin nin mẹn ye. A imiẹn ebi a rẹ khọkhọ ọle!” Beji ọ dia obhio mhan nin Faye bhi egbe, iriọ ọ yẹ dia ibhio mhan ne bunbun bhi egbe.

 Ọne app nan wo manman rẹkpa ibhio mhan bhi iwẹnna itẹmhọn Osẹnobulua. Bhi ọsi ijiẹmhin obhio mhan nin okhuo nọn nyẹnlẹn bhi Cameroon da ha guanọ nin ọle tie ijan ọkpa bhi Baibo nin obhio mhan nin okhuo ọbhebhe ka noo bhi uzana eso ne gbera. Sokpan, ọle bha yẹ yere ọne ulọnlẹn nin ọne obhio mhan tie. Ọle da yọle: “Ebe rẹkpa mẹn hi, mẹn da ye ikpọta eso re bhi ọne ulọnlẹn. Mẹn ki tuje ọne app a, diọbhi Baibo, mẹn da gbẹn ene ikpọta ọbhi eji a da guanọ ikpọta. Ẹjẹje, ọne Baibo da wo zegbere. Ọne app nan sẹ rẹkpa mẹn miẹn eji mẹn guanọ bhi Baibo nin mẹn kẹ yele a.”

 Igho nin bha noo donate.pr418.com re re, ọle mhan rẹ lu ọne JW Library app nan, hẹnhẹn ọle ọi, yẹ ne emhin ọbhọ, beji ibhio mhan bhi otọ agbọn rebhe ha da sabọ ha noo ọle. Bha obulu bhi ọkhọle nan rẹ zẹ emhin bhi obọ nin bha mhọnlẹn.

1. Ọtoba 2013—A da re ọne app dagbare, Baibo natiọle New World Translation nan kie zedu ọle da ha ribhi ẹkẹ ọle

2. Jẹnuare 2015—A da ne ebe kẹkẹ nan re urolo ebo gbẹn ọbhọ, akizẹbue, a da zedu ene ebe diọbhi urolo ne bunbun

3. Novẹmba 2015—A da ne alo nan rẹ re iyaman bhi ebe ọbhọ

4. Mee 2016—A da lu obọ nan ne emhin nan noo bhi ikolo oga ọi ọbhọ

5. Mee 2017—A da re eji a sabọ gbẹn emhin ọi ọbhọ

6. Dizẹmba 2017—A da re Study Bible ọbhọ

7. Mach 2019—A da lu ọle beji a da sabọ ha danlod rẹkọd nan kaehọ ọle, yẹ ha ghe vidio bhi ẹkẹ ọle aharẹmiẹn a bha danlod ọne vidio, sẹyẹ, a da mun Research Guide ọbhọ

8. Jẹnuare 2021—A da re ebe natiọle Sọnyẹnmhẹn bhi Ighegheghe! ọbhọ bi emhin kẹkẹ ne ribhi ẹkẹ ọle