Bhi Jẹnuare 2021, Otu Nọn Sun Oga da re ebe ọgbọn dagbare nan ha rẹ ha man ẹbho Baibo. Ọne ebe hi, Sọnyẹnmhẹn bhi Ighegheghe! a Be ọ dia uwẹ yẹ bhi egbe ẹghe nan rẹ yọle ghe a dẹ re ọne ebe dagbare? Matthew, nọn nyẹnlẹn bhi Canada da yọle: “Mẹn da wo ghọnghọn, manman nọn ẹghe nan rẹ ha re ọta bi vidio kẹkẹ man ne tẹmhọn ebezẹle nan da lu ọne ebe, bi ebi a sẹ rẹ dọnmhẹn ọne ebe yẹ. Ọ da wo dia mẹn bhi egbe ghe, nan re ọne ebe dagbare ẹjẹje nin mẹn da munhẹn ha noo ọle.”

 Uwedẹ ọgbọn a rẹ noo ọne ebe nan rẹ man ẹbho Baibo. Emhin ebhebhe yẹ ribhọ nọn re ọle dikẹ bhi ene ebe nin mhan ka noo khẹ. Ahamiẹn ghe Sọnyẹnmhẹn bhi Ighegheghe! nan printi nọn ribhọ uwẹ noo, uwẹ ki daghe ọle ghe ọ dikẹ bhi ebe nekẹle bhi obọ. Nin uwẹ rẹ lẹn ebezẹle nọn da dia iriọ, ji mhan ka zilo nyan ebi a rẹ lu ọne ebe yẹ.

 Ebe nọn ziẹnlẹn a rẹ lu ọle. Bezẹle nan da noo ebe ne ziẹnlẹn? Ọ gbera ifoto 600 ne ribhi ẹkẹ Sọnyẹnmhẹn bhi Ighegheghe! Khere kẹre nọn rẹ sẹ igba igbe nin foto ne ribhọ rẹ bun nẹ ọsi ebe natiọle Be Imhan Ha Miẹn Luẹ bhi Baibo? Ọne ebe ọgbọn yẹ mhọn ijeso nan bha gbẹn emhin ọi bhi apapale ne ribhọ. Sade ebe nọn dia fẹghẹ-fẹghẹ a rẹ printi ọle, a ki ha na odalo apapale ọkpa daghe ifoto ne ribhi ikeke ọle. Beji a ha da miẹn ghe ọ bha dia iriọ, ibhio mhan ne wẹnna bhi dipatmẹnt nọn printi ebe, natiọle International Printing Department (IPD) bhi Wallkill, New York, U.S.A., da dọnmhẹn ebe enẹn kẹkẹ nin agbotu noo rẹ printi ebe. Otu Nọn Mhọn Obọ bhi Ebe Nan Gbẹn ki fẹ ene ebe nan ghe, ele da zẹ ebe nan imanman daghe ikeke ọle nọn ribhọ. Arẹmiẹn ọne ebe nan nin ele zẹ ghan nẹ ebe nin mhan noo rẹ printi ebe nekẹle, ọle ọnọn mhẹn nẹ nan ha noo bhi Sọnyẹnmhẹn bhi Ighegheghe! ranmhude, ọria a ha tie apapale ọkpa, ifoto ne ribhi ikeke ọle ida ha gue ebi ọle tie.

 Ebe ikẹ a rẹ lu ikeke ọne ebe. Ọne ebe nan yẹ dikẹ bhi ebe nekẹle ranmhude ebe ikẹ a rẹ lu ikeke ọle. Unan ebe nọn kpo a rẹ lu ikeke ebe nekẹle, sokpan ọne a noo bhi ọne ebe ọgbọn ikpo. Ranmhude ọnan, foto nọn ribhọ wo dagbare nọnsẹn. Aharẹmiẹn ghe a manman noo ọne ebe nan, ọ ida kẹ riia. Ọkpakinọn, ọne ikeke ebe nan re igba isẹn ghan gbera ọnọn kpo nọn ribhọ. Beji a miẹn ghe iriọ nọn, Bẹtẹ kẹkẹ da ko zilo nyan ọne ikeke ebe nọn ikpo, nọn lo nẹ nin ele ha dẹ.

 Bezẹle nan da ki zẹ ọne unan ọlẹn nan nọn ghan nẹ? Obhio mhan ọkpa nọn wẹnna bhi IPD da yọle: “Mhan lẹnmhin ẹbho dẹ wo manman ha noo ọne ebe nan. Bhiriọ, mhan guanọ nan miẹn ghe ele ha rẹ manman ha noo ọle, ọ ki sẹyẹ ha mhẹn bhi ẹlo.” Eduardo, nọn wẹnna bhi Ọfisi Nan Da Printi Ebe bhi Bẹtẹ nọn ribhi Brazil da yọle: “Ọ wo re mhan ghọnghọn rẹ daghe ebi agbotu nọnsi Jehova rẹ noo ebe nọn manman ziẹn yẹ lọ a bhi obọ rẹ lu ọne ebe nọn mhọn-ose a nan. Ọne ebe rẹ mhẹn an sẹ iriọ, ele da yẹ sabọ te igho ọsi agbotu.”

 March 2021 mhan rẹ munhẹn ha printi Sọnyẹnmhẹn bhi Ighegheghe! Ọne ẹghe nan bha lẹkhẹ ranmhude emianmhẹn COVID-19. Bhi ọne ẹghe nin, a da khue Bẹtẹ. Ibhio mhan ne rẹ ha na ole vae dọ ha rẹkpa, bha yẹ sabọ vae, sẹyẹ a bha sabọ tie ẹbho ọgbọn vae dọ lu ọne iwẹnna. Ranmhude ọnan, Bẹtẹ eso bha ha mhọn ẹbho ne bun rẹ lu ọne iwẹnna. Sẹyẹ, a da zobọ bhọ rẹ ha printi bhi Bẹtẹ eso ranmhude uhi ọsi govamẹnt.

 Be a ki rẹ sabọ lu ọne iwẹnna yẹ? Ẹghe nan ki rẹ kie munhẹn a printi ebe, a da tie ibhio mhan eso bhi ẹkẹ Bẹtẹ nin ele vae dọ rẹkpa bhi ọne iwẹnna nan rẹ printi ebe nan. Joel, nọn wẹnna bhi IPD da yọle: “Ọkhọle nan rẹ zegbere rẹ luẹ iwẹnna ọgbọn nin ene ibhio mhan nan mhọnlẹn zẹle nan da sabọ lu ọne udede ẹsọn nan.”

 Ọkuẹsẹ ọne eghe nin, agbotu da sabọ sẹ printi ọne ebe natiọle Sọnyẹnmhẹn bhi Ighegheghe! ne bunbun. Emhin kẹkẹ bọsi, ebi a rẹ toman ikpebe ọkuẹsẹ a printi ọle, ebi a rẹ lu ikeke ene ebe, alo kẹkẹ nan rẹ gbẹn ebe, ebi a rẹ gban ele kugbe, bi emhin nekẹle. Bhi ẹkẹ uki isẹn, agbotu da noo igho nọn gbera $2.3 million (U.S.) bhi emhin nan dẹ rẹ lu ene ebe. Nan agbotu rẹ sabọ te igho, eka ebe nin ibhio mhan yọle ele guanọ, ọle ọkpa a sẹ sabọ printi.

 Be ibhio mhan bi ẹbho nin ele man Baibo ta yẹ rẹji ọne ebe ọgbọn nan? Obhio mhan natiọle Paul, nọn nyẹnlẹn bhi Australia da yọle: “Sọnyẹnmhẹn bhi Ighegheghe! wo manman yẹẹ mẹn rẹ ha noo rẹ man ẹbho Baibo. Uwedẹ nan rẹ lu ọne ebe re ọle lẹkhẹ nan rẹ ha ne ẹbho zilo. Ọ lẹkhẹ nan rẹ tie, sẹyẹ inọnta, vidio, ifoto, bi emhin nekẹle ne ribhọ dẹ manman rẹkpa ene luẹ Baibo. Uwedẹ nan rẹ wo manman lu ọne ebe wo re ọle lẹkhẹ nin mẹn rẹ ha man emhin gbera ọnikhẹ.”

 Ọria ọkpa bhi ẹwẹ ene a man ele Baibo bhi United States da yọle: “Ọne ebe ọgbọn nan wo yẹẹ mẹn. Ifoto ne ribhọ re ọle lẹkhẹ nin mẹn rẹ lẹn otọ emhin kpataki ne ribhọ. Sẹyẹ, vidio ne ribhọ wo rẹso mẹn bhi ọkhọle yẹ rẹ mẹn lu ebe khẹke.” Igba eva ọne ọria nan luẹ Baibo bhi uzana, sẹyẹ, ọle wo yo ikolo oga ẹghe-ẹghe.

 Mhan bha sẹ sabọ printi Sọnyẹnmhẹn bhi Ighegheghe! ne bunbun bhi urolo ne bunbun. Sokpan, bhi ejayenan nian, urolo ne bun sẹbhi 710, ọle Otu Nọn Sun Oga re obọ ọi nan zedu ọne ebe diọ. Urolo 340 ọne ebe nan rẹ bun gbera urolo nan zedu Be Imhan Ha Miẹn Luẹ bhi Baibo? diọ!

 Ijela mhan da miẹn igho nan rẹ printi ọne ebe nan? Igho nin ibhio mhan kẹ noo donate.pr418.com re re, nan rẹ robọkpa iwẹnna itẹmhọn Osẹnobulua nan lu bhi otọ agbọn rebhe, ọle mhan noo rẹ lu ọle. Ọkhọle nan rẹ zẹ emhin bhi obọ nin bha mhọnlẹn wo manman ti mhan bhọ. Ọ rẹkpa mhan rẹ ha lu ebe ne ha rẹkpa ẹbho ne guanọ nin ele lẹn Jehova yẹ “sọnyẹnmhẹn bhi iẹnlẹn rẹ ha khian ighegheghe.”​—Psalms 22:26.