Bhi ẹwẹ ẹbho ne bunbun ne nyẹnlẹn bhi Latin America, ene bunbun mhọn urolo nin ele zẹ bi uwedẹ kẹkẹ nin ele rẹ lu emhin. Eso bhi ene ẹbho nan hi ibhio mhan nin mhan ko ga nan miẹn ghe uwedẹ nan rẹ lu emhin bhi isele ti ele bhọ. Nin ele rẹ sabọ rẹkpa ẹbho ne bunbun rẹ dọ lẹn iJehova, ele da zedu ebe nin Esali Jehova lu dagbare bhi urolo ne gbera 130 bhi ẹwẹ urolo nan zẹ bhi Latin America. a Ọrẹyiriọ, a da ha kpokpo eso bhi ẹwẹ ene ibhio mhan nan ranmhude ghe, ele zẹ rẹ ha ga iJehova, bi ranmhude ghe, ele ideba lu emhin ne bha diẹn mun Baibo nan lu bhi agbaẹbho nọnsele. Uwedẹ nela a sẹ rẹ noo igho nin ibha re re rẹ rẹkpa ene ibhio mhan nan?

 Ibhio mhan ne nyẹnlẹn bhi iHuichol nọn ribhi eji oke ye bhi agbaẹbho natiọle Jalisco bhi otọ iMexico, da re ekpẹn-ekpẹn rẹ yọle ghe ele ida deba bhi iluemhin ọsi oga ne bha diẹn mun Baibo. b Sokpan, ẹkẹ da ha khọ eso bhi enin ranmhude ọnan. Bhi December 4, 2017, usun ẹbho eso da mun okhọn bu Esali Jehova eso bi ẹbho eso ne ribhi eji ele ye. Ele da khu ene Esali Jehova sibhi ọne agbaẹbho nọnsele re, yẹ riia emhin nesele a. Ele da yẹ taman ele ghe ele dẹ gbe ele a sade ele kie vae bhi uwa.

 Esali Jehova ne ribhi agbaẹbho ne sikẹ ele da re ẹjẹje rẹkpa ene ibhio mhan nan. Ọkpakinọn, be a ha rẹ rẹkpa ele rẹ fikie diọbhi uwa yẹ? Obhio mhan ọkpa natiọle Agustín da yọle: “Mhan bha manman ha mhọn igho nin mhan rẹ mun ilọya, sẹyẹ, mhan bha lẹn ọria nọn ha sabọ re ibhude nin mhan nọn ha rẹkpa mhan bhi ọne ẹmhọn.”

 Beji a miẹn ghe ọne ẹmhọn rẹso isẹhoa nin ene ibhio mhan mhọnlẹn nin ele rẹ zẹ oga nin ele ha deba, Bẹtẹ nọn ribhi Central America da re ẹjẹje talọ ọbhi ọne ẹmhọn. Emhin ọhẹnhẹn nin ele lu hi, ele da taman ene mhọn obọ bhọ nan rẹ guanọ ebe sunu bhi ọne agbaẹbho, nin ele dọ guanọ otọ ọne ẹmhọn nọnsẹn. Ele ki lu ọnin fo, Otu Nọn Sun Oga ọsi Esali Jehova da yọle ghe nin Depatmẹnt nọn mhọn obọ bhi iguẹzọ, nọn ribhi Bẹtẹ nọn kokhun nẹ, dọ rẹkpa ene ibhio mhan ne ribhi Huichol mun ọne ẹzọ ha khian ikotu. Akizẹbue, ọne ẹmhọn da sẹbhi kotu nọn kokhun nẹ bhi Mexico natiọle, Supreme Court of Justice of the Nation.

 Usun ilọya ne nabhi agbaẹbho kẹkẹ vae da muegbe ebi ele ha ta nin ele rẹ ji ene ẹbho lẹn ghe, beji ọ rẹ khẹke nin ẹbho ne nyẹnlẹn bhi ọne agbaẹbho rẹ ha mun ekpẹn nin uhi ne ribhi ọne agbaẹbho, iriọ ọ yẹ rẹ khẹke nin ọne agbaẹbho rẹ ha mun ekpẹn nin ẹbho ne nyẹnlẹn bhọ, yẹ ha re otọ nin ele rẹ zẹ ebi ele ha lu. Ọrebhe mhọn isẹhoa nin ele rẹ zẹ ebi ele ha lu, bhi eji ọ hi ki rẹ ha khin nin ele da nyẹnlẹn.

 Kotu natiọle, Supreme Court of Justice ki gui ọne ẹzọ fo bhi July 8, 2020, ele da yọle ghe Esali Jehova bha lu khọlọ. Bhiriọ, ele da yọle nin ene ẹbho ji ọrebhe nin ele khu fia fikie vae bhi agbaẹbho nọnsele. Agustin nin mhan ka tẹmhọnlẹn ki ha ta ebi ọne ẹmhọn nan rẹ ti ọle bhọ bi ẹbho nekẹle yẹ, ọle da yọle: “Ebi ibhio mhan lu nin mhan wo manman ti mhan bhọ, sẹyẹ, ọ wo rẹ mhan ghọnghọn. Sade ọ iyi ele ne rẹkpa mhan nọn, mhan irẹ sabọ tobọmhan lu emhin soso.”

 San Juan de Ilumán bhi agbaẹbho natiọle Ecuador, ọle ẹbho ne bunbun ne nabhi Otavalo Valley vae da nyẹnlẹn. Ibhio mhan ne ribhi enin da yẹ miẹn ekpokpo nọn dia iriọ bhi egbe. Bhi 2014, ẹghe nin ele rẹ re ebe nan rẹ bọn uwa bhi obọ igovamẹnt fo, ele da munhẹn ha bọn iKindọn Họọ nọnsele. Ọkpakinọn, ifada nọn ribhi enin da sun ẹbho ne bun gbera itue 100 rẹ dọ de idobolo ọbhi ọne iwẹnna. Bhiriọ, ọne agbaẹbho da yọle ghe nin Esali Jehova bhi enin hẹi yẹ do ikolo oga nọnsele.

 Ọfisi nọn mhọn obọ bhi ẹzọ nan gui, nọn ribhi Bẹtẹ bhi Ecuador bi ọnọn ribhi Bẹtẹ nọn kokhun nẹ da kugbe dọ rẹkpa ene ibhio mhan nan, nin ele da sabọ kie ha do ikolo oga nọnsele. Ene ibhio mhan nan da mun ọne ẹzọ ha khian ikotu. Ranmhude ọnan, ọne agbaẹbho da yọle nin ene Esali Jehova kie munhẹn ha do ikolo nọnsele yẹ dọ ha bọn iKindọn Họọ nin ele rẹ ha bọn. Beji a ha da miẹn ghe emhin nọn sẹ inian ida kie zegbere bhi ẹghe odalo, ene ibhio mhan ne mhọn obọ bhi ẹzọ nan gui da yọle ghe nin kotu ne kokhun bhi ọne agbaẹbho re unun ọbhi ọne inọnta nan: Ọ be khẹke nin agbaẹbho ha mun ekpẹn nin uhi nọn gbega agbaẹbho rebhe?

 Bhi July 16, 2020, a da gui ọne ẹzọ nan bhi kotu nọn kokhun nẹ bhi Ecuador natiọle, Constitutional Court of Ecuador. Ilọya ne yi Esali Jehova bhi Ecuador da mundia nin ene ibhio mhan. Yẹ deba ọnin, ibhio mhan enẹn ne yi ilọya bhi agbaẹbho kẹkẹ, ne lẹn ẹlo uhi ọsi agbaẹbho kẹkẹ da yẹ deba gui ọne ẹzọ. Sokpan, ranmhude icorona virus, ele bha sabọ sikoko bhi kotu. Bhiriọ, ele da noo ividio rẹ talọ. Ọnan hi ọsi ọhẹnhẹn nin kotu sẹ rẹ ji Esali Jehova bhi otọ agbọn rebhe da re inian guẹzọ nọnsele. c Ene ilọya da sounun bhi uhi ne mun agbaẹbho rebhe mhọnlẹn rẹ yọle ghe, isẹhoa nin ẹbho mhọn rẹ zẹ ebi ele ha lu, ọ bha khẹke nin ele mun fia ranmhude idunmhun nin ele ye.

 Ejayenan nian, ene ibhio mhan bhi Otavalo Valley wo khẹ ebi ọne ikotu ha ta yẹ bhi ọne ẹmhọn. Urẹkpa nin ene ibhio mhan sẹ re nin ele wo ti ele bhọ. Ọwanlẹn ọkpa natiọle César, nọn ga bhi agbotu natiọle Ilumán Quichua da yọle: “Jehova ọkpa hi ọnọn ha sabọ noo agbotu nọnsọle rẹ lu emhin nọn kpọnọ rẹ rẹkpa ikpeta ẹbho.”

 Esali Jehova, ọle ene ilọya rebhe ne rẹkpa ene ibhio mhan gui ọne ẹzọ khin. Arẹmiẹn ghe, ọ wo gbe ene ilọya ẹghe bi igho nin ele rẹ sabọ guanọ otọ ọne ẹmhọn, yẹ muegbe ebi ele ha rẹ gui ọne ẹzọ yẹ bhi kotu, ele da wo ha ghọnghọn ghe, ele sabọ noo ebi ele guẹle rẹ rẹkpa ene ibhio mhan ọsọhẹ. Ọ gbera uri-agogo 380 nin ene ilọya nesẹmhan bi ibhio mhan nekẹle rẹ muegbe ọne ẹzọ nan. Sẹyẹ, ele da noo uri-agogo 240 rẹ zedu ebe nin ele ha rẹ gui ọne ẹzọ diọbhi urolo Mexico. Khere kẹre nin ibhio mhan nin lọya ne wẹnna ọbhi ọne ẹzọ nan gui bhi Ecuador rẹ bun sẹbhi 40. Ele wo gbe uri-agogo ne bunbun bhi ọne ẹzọ nan. Be imhan rẹ sabọ miẹn igho yẹ nan rẹ gui ọne ẹzọ nan? Igho nin ibha noo uwedẹ kẹkẹ nan tẹmhọnlẹn bhi donate.pr418.com re re, ọle mhan rẹ sabọ lu ọle. Mhan yi ibha obulu bhi ọkhọle nan rẹ zẹ emhin bhi obọ nin bha mhọnlẹn.