Uwedẹ ọsọgbọn, ọle mhan rẹ do usikoko nọn nẹ nọnsẹmhan bhi 2020. Ọne ukpe nin, ọle ọsi ọhẹnhẹn nin mhan rẹ rẹkọdi usikoko nọn nẹ nọnsẹmhan yẹ gha ọle ọbhi itanẹti. Sokpan, bhi Malawi bi Mozambique, ibhio mhan ne bunbun bha sabọ noo itanẹti rẹ ghe usikoko nọn nẹ nọnsele. Bhiriọ, be ele ki rẹ do ọsi ele yẹ?

 Otu ọsi Ewanlẹn Ne Sun Otu Nekẹle bi Otu Nọn Mhọn Obọ bhi Iman-emhin da re obọ ọbhọ ghe, nan noo tẹlẹvishọn bi redio rẹ re ọne usikoko man ibhio mhan ne ribhi Malawi bi Mozambique. Bezẹle nin ele da yọle nan lu ọle iriọ? Ranmhude Malawi deba agbaẹbho nin deta da manman ghan bhi otọ agbọn rebhe. Bhiriọ, ikpeta bhi ibhio mhan ọkpa ha sabọ dẹ deta rẹ nabhi itanẹti. William Chumbi nin Ọkpa bhi Otu Nọn Sun IBẹtẹ nọn ribhi Malawi da yọle: “Redio bi tẹlẹvishọn, ele ọkpa ibhio mhan ha sabọ noo rẹ do usikoko nọnsele.” Sẹyẹ, Luka Sibeko, nọn yẹ yi Ọkpa bhi Otu Nọn Sun IBẹtẹ nọn ribhi Malawi da yọle: “Sade mhan bha noo tẹlẹvishọn bi redio rẹ do usikoko nọnsẹmhan nọn, ikpeta bhi ibhio mhan bhi agbaẹbho nọnsẹmhan ọkpa ha rẹ sabọ miẹn elele bhi ọne usikoko nan.” Re deba ọnin, bhi Mozambique, ikpeta bhi ibhio mhan ọkpa ha sabọ dẹ ifoni nan rẹ sabọ nabhi itanẹti arẹbiẹn nan rẹ dẹ deta nan rẹ nabhi itanẹti.

 Ranmhude emianmhẹn corona virus, a da ha noo tẹlẹvishọn bi redio steshọn eso rẹ re ikolo oga nesẹmhan man. a Ibhio mhan eso da dọ bu ene steshọn eso nan dọ taman ele, nin ele re ẹho nin ele rẹ re usikoko nọn nẹ nọnsẹmhan man. Sokpan, ẹghe nin ele ha noo, dẹ gbera ọne ele noo bhi ikolo oga nesẹmhan.

 Sokpan bhi Malawi, ibhio mhan da kuẹlo da ọnọghọ eso. Bhi steshọn nan da re ọta man, uri-agogo ọkpa ele re nin eria rẹ re ọta nọnsele man. Ene ẹbho da yọle ghe, emhin nan rẹman ha tan gbe, ọ iyẹẹ ẹbho. Ene ibhio mhan da taman ele ghe, iwẹnna nọnsẹmhan rẹkpa ẹbho. Arẹmiẹn ẹbho bha yẹ sabọ ha dagbare, mhan da yẹ sabọ ha noo ọta nọn ribhi Baibo rẹ re ikoudure nin ẹbho nọn ha sabọ rẹkpa ele rẹ ha nyẹnlẹn nọnsẹn yẹ mhọn azagba-uwa nin eghọnghọn ye. Ẹghe nin ene ibhio mhan ki rẹ ta ọnan man ele fo, ele da re ẹho nin ele rẹ re ọne usikoko nọn nẹ man.

 Bhi Malawi, tẹlẹvishọn steshọn ọkpa bi redio steshọn ọkpa, ọle a noo rẹ re ọne usikoko man. Ọne tẹlẹvishọn bi redio steshọn sabọ wo re ọta man bhi ọne agbaẹbho rebhe, bhiriọ ẹbho ne bunbun ki sabọ ghe ọle. Bhi Mozambique, tẹlẹvishọn steshọn ọkpa bi redio steshọn ne bun sẹbhi 85, ele a noo rẹ re ọne usikoko man.

 Igho nan noolo rẹ re ọne usikoko man bhi ene agbaẹbho veva nan da ha yi $28,227 b. Sẹyẹ, khere kẹrẹ nọn rẹ sẹbhi $20,000 nan noolo rẹ re ọne usikoko nọn nẹ man bhi redio steshọn. Igho nan noolo bhi redio steshọn nan rẹ re ọta man bhi eje bha manman kpọnọ, da ha yi $15. Sokpan, igho nan ha bhi steshọn nan da re ọta man bhi ene agbaẹbho rebhe, da ha yi $2,777.

 Ibhio mhan da wo wẹnna kaka nin ele da sabọ te igho ọsi Agbotu nonsẹn. Bhi ọsi ijiẹmhin, bhi Malawi, ele da dọ guanọ eje no nẹ nin ele ha da re ọne usikoko man. Bhi ijan ọkpa nin ele yo, a da hian ive re otọ nin ele. Ọnan da rẹkpa ele te igho nọn sẹbhi $1,711. Bhi Mozambique, steshọn eso da hian igho re otọ nin ibhio mhan ranmhude mhan wo haosa bhi ẹghe bi eka nin mhan ko re obọ ọi.

 Ọ wo manman ti ene ibhio mhan bhọ rẹ sabọ ka ehọ la ghe ọta usikoko nan rẹman bhi tẹlẹvishọn la redio bhi agbaẹbho nọnsele. Patrick, nin ọkpa bhi ewanlẹn bhi Malawi da yọle: “Mhan wo khuẹnmhẹn Otu Nọn Sun Oga bhi emhanmhan nin ele lu nin mhan bhi ọne ẹghe corona virus nan.” Isaac nọn yẹ nabhi Malawi vae da yọle: “Mhan imhọn ifoni la kọmputa nin mhan rẹ ghe ọta usikoko nan rẹman. Mhan wo khuẹnmhẹn agbotu nọnsi Jehova nin ele rẹ mhanmhanlẹn nin mhan rẹ sabọ kaehọ ọta nan rẹman bhi redio. Ranmhude ọne emhanmhan nan, imẹn bi azagba-uwa nọnsẹmhẹn da sabọ miẹn elele bhi ọne usikoko. Ọnan wo rẹman mhan ghe, Jehova wo manman hoẹmhọn ẹbho nesọle.”

 Usikoko nọn nẹ nan do bhi 2020 da ha yi usikoko ọsi ọhẹnhẹn nin obhio mhan ọkpa bhi Mozambique sẹ yo. Bhiriọ ọle da yọle: “Ọne emhanmhan nan rẹ ghe ọne usikoko nọn nẹ nan bhi tẹlẹvishọn wo rẹman mẹn ghe, Jehova hi Osẹ nọn ke okhun nẹ. Corona virus bha sabọ de Jehova idobolo nin ọle rẹ ne ebale oriọn nin mhan, yẹ gha ọle nin mẹn bhi ẹkẹ ugha nọnsẹmhẹn. Mẹn wo daghe oyẹẹ nọn ribhi ẹwẹ ẹbho nesi Jehova. Ọnan da wo re mẹn rẹọbhọ ghe, ọnan hi oga ẹmhọanta.”

 Ọwanlẹn ọkpa natiọle Wyson da yọle: “Mẹn guanọ nin mẹn yi Otu Nọn Sun Oga obulu bhi uwedẹ nin ele rẹ ha gbẹloghe mhan bhi ọne ẹghe corona virus nan. Ọne emhanmhan nan nin ele rẹ re ọta usikoko man bhi TV bi redio, wo rẹkpa ene bunbun bhi ẹwẹ mhan ne imanman mhọn emhin, ne nyẹnlẹn bhi agbaẹbho nin igho imanman ye, re sabọ miẹn elele bhi ọne usikoko nan.”

 Otu ọsi Ewanlẹn Ne Sun Otu Nekẹle bi Otu Nọn Mhọn Obọ bhi Iman-emhin da yẹ re obọ ọbhọ nan re ọta usikoko ọsi 2021 man bhi tẹlẹvishọn bi redio bhi agbaẹbho eso. Ijela mhan ki da miẹn igho rẹ sabọ re ọne ọta usikoko man bhi tẹlẹvishọn bi redio? Igho nin bha noo uwedẹ kẹkẹ bhi donate.pr418.com re re, nan rẹ re iyobo nin ibhio mhan bhi otọ agbọn rebhe, ọle mhan rẹ sabọ lu ọle. Mhan yi bha obulu bhi ọkhọle nan re zẹ emhin bhi obọ nin bha mhọnlẹn.