Otọ nin Esali Jehova da ha lu iwẹnna oga yẹ re iyobọ ne ẹbho bun gbera 200. Sokpan, otọ ne bun sẹbhi 35, ele ọkpa mien igho re re, nọn ha sẹ nan rẹ lu ebi a guanọ nan lu bhi eji ele ye. Bhiriọ, be a rẹ miẹn igho rẹ lu emhin ne khẹke yẹ bhi agbaẹbho ne imanman mhọn igho?

 Otu Nọn Sun Oga ọsi Esali Jehova gbẹlokotọ bhi emhin ne ha rẹkpa Esali Jehova rẹ sabọ ha ga iJehova bhi otọ agbọn nan rebhe, yẹ ha lu iwẹnna itẹmhọn Osẹnobulua. A ha lu emhanmhan ọsi ebi a ha rẹ noo igho yẹ, a ki yẹ re obọ rẹkhan ọne emhanmhan. Ahamiẹn ẹsọn ribhọ nan ho nan miẹn bhi agbaẹbho, sokpan igho nan rẹ re iyobọ re nan rẹ miẹn ọne ẹsọn nan kpọnọ gbera eka nan guanọ, a ki noo ọnọn kere rẹ rẹkpa agbaẹbho ne imanman mhọn. Ọne emhanmhan nan wo diẹn mun ebi Kristiẹn bhi ore nin ohẹnhẹn lu. Ele da rẹkpa ọdeọde beji ọrebhe ha da sabọ ha mhọnlẹn. (2 Corinthians 8:14) Ene manman mhọn emhin da re ebi ele mhọn rẹkpa Kristiẹn ebhebhe ne imanman mhọnlẹn.

 Be ọ dia ibhio mhan bhi egbe yẹ, ne miẹn urẹkpa bhi obọ ọsi agbaẹbho ọbhebhe? Bhi ọsi ijiẹmhin, bhi agbaẹbho natiọle Tanzania, igho nin ẹbho ne bunbun ne nyẹnlẹn bhi enin miẹn rẹ gbẹlọghe egbe bhi ukpẹdẹ, ọ bha sẹbhi ẹkpa-enẹn (₦800), bhiriọ, igho nin ibhio mhan bhi agbaẹbho ebhebhe re re, ọle a miẹn noo rẹ hẹnhẹn iKindọn Họọ nin agbotu natiọle Mafinga noo. Ọne agbotu da gbẹn yọle: “Nan rẹ hẹnhẹn iKindọn Họọ nọnsẹmhan, ẹbho ne ki vae bhi ikolo oga nesẹmhan wo kie manman ha bun ọbho! Mhan manman khuẹnmhẹn agbotu nọnsi Jehova bi ibhio mhan bhi otọ agbọn rebhe bhi uwedẹ nin ele rẹ zẹ emhin bhi obọ. Ọnan zẹle nin mhan da sabọ ha mhọn eje mhọn ose sẹnian nin mhan da ga iJehova.”

 Ranmhude emianmhẹn KOVID-19, ibhio mhan eso bhi Sri Lanka bha yẹ manman miẹn ebale ha le. Obhio mhan natiọle Imara Fernando bi ọmọn nọnsọle natiọle Enosh ribhi ẹwẹ ene ẹbho nan. Ranmhude iyobọ ọsi ibhio mhan ne ribhi agbaẹbho ebhebhe, a da sabọ re emhin nin ele guanọ rẹ rẹkpa ele. Ele da gbẹn ebe ọbhi kadi yọle: “Mhan khuẹnmhẹn ene ibhio mhan ne re oyẹẹ man mhan bhi ọne ẹghe ọkakale nan, ọ ti mhan bhọ ghe, mhan yi ọkpa bhi ọne azagba-uwa nan. Mhan wo nan erọnmhọn ghe, nin Jehova rẹkpa ibhio mhan rebhe bhi ọne ẹghe ọkike nan.”

 Eji ọ hi ki rẹ khin nin ibhio mhan da ha nyẹnlẹn, ele muegbe nin ele rẹ noo emhin nin ele mhọnlẹn rẹ rẹkpa ibhio ele. Bhi ọsi ijiẹmhin, Enosh da lu obhi ẹkpẹti nin ọle miẹn rẹ ha re igho ya, beji ọle ha da miẹn igho rẹ rẹkpa azagba-uwa ne ribhi ọnọghọ. Ọkhọle nọn sẹnian, ọle obhio mhan nin Guadalupe Álvarez yẹ ha mhọnlẹn. Mexico ọle ha da nyẹnlẹn. Bhi enin, ẹbho nin ene gbẹloghe ha osa uki-uki, la nin tobele wẹnna ha miẹn ighogho uki-uki bha bun. Ọrẹyiriọ, ọle da yẹ re eka nin ahu nọnsọle gbe rẹ re iyobọ nin agbotu. Ọle da gbẹn yọle: “Mẹn manman khuẹnmhẹn iJehova ranmhude umhẹnmhin nọnsọle bi ahoẹmhọn-egbe nọn ibeghe nin ọle rẹ man. Mẹn lẹn sẹ ghe, obhi igho nin mẹn re re, a dẹ re ọle ba ọsi ibhio mhan ebhebhe. A dẹ miẹn ọlẹn noo rẹ rẹkpa ibhio mhan ne ribhi ọnọghọ.”

 Bẹtẹ kẹkẹ ne je igho diọbhi eji a da guanọ urẹkpa, manman wo ghọnghọn rẹ lu iriọ. Obhio mhan natiọle Anthony Carvalho, nọn yi ọkpa bhi Ene Sun Bẹtẹ nọn ribhi Brazil da yọle: “Bhi ẹkẹ ikpe ne bunbun, mhan da ha guanọ iyobọ ọsi agbaẹbho ebhebhe beji mhan ha da sabọ miẹn igho rẹ ha lu iwẹnna oga bhi agbaẹbho nọnsẹmhan. Ranmhude urẹkpa ọsi ibhio mhan, iwẹnna oga nọnsẹmhan da wo tuẹn okhun. Ejayenan nian, idia nin mhan ye wo fidenọ, mhan ki sabọ rẹkpa ẹbho ebhebhe nian. Ibhio mhan ne ribhi enan wo ria ẹmhọn ibhio mhan bhi otọ agbọn rebhe sade ele re iyobọ re. Bosi edibo nesi Jesu, ele guanọ nin ele noo ebe ele mhọnlẹn rẹ rẹkpa ibhio ele.”

 Uwedẹ nọn mhẹn nẹ nela Esali Jehova ha rẹ sabọ re iyobọ nin ibhio ele ne guanọ urẹkpa? Ọ iyi nin mhan rẹ wo je igho ji Bẹtẹ bhi agbaẹbho ọbhebhe, sokpan, mhan ki ha re igho rẹ rẹkpa bhi iwẹnna itẹmhọn Osẹnobulua nan lu bhi otọ agbọn nan rebhe. Nin mhan rẹ lu ọnan, mhan sabọ rẹ re igho ọbhi ọne ẹkpẹti nan gbẹn “Worldwide Work” ọi, nọn ribhi Kindọn Họọ nọnsẹmhan. La noo donate.pr418.com rẹ re igho re. Iyobọ ne sẹnian manman wo ti mhan bhọ.